2 Malikwa 2 - NABUWWA KEE MALIKWA

ELIYYAS QARAN FAN BEEN

¹ YALLI, Eliyyas mermerita caacayih addat qaran edde yayyaaqu waa wakti xayyooweh. Eliyyas kee Eliisaq Gilgal magaalak tewqeeh,

² gital Eliyyas Eliisaqak annah iyye, «Away YALLI ‹Beetal magaala gex› yok iyyeemih sabbatah gexah anik; atu akkel elle sug» kaak iyye. Eliisaq kaal gacsemii, «YALLAY waarahiyyah migaq kee ku manol xiibitah ani'mmay, kok maraaqa» kaak iyye. Tonna-leemik titta lih Beetal magaala gexen.

³ Butta takke nabuwway wokkel dabqih tanihiyya Eliisaq fan amma inteeh, «YALLI a saaku ku kabir kok beelem maay taaxigee?» kaak iyyen. Eliisaq keenil gacsemii, «Yeey, aaxigeh immay wohut yaabe waynay» keenik iyye.

⁴ Tohuk lakal Eliyyas Eliisaqak annah iyye. «YALLI ‹Yeriko fan gex› yok iyyek, atu away akkel elle sug» iyye. Eliisaq kaal gacsemii, «YALLAY waarahiyyah migaq kee ku manol xiibita'mmay, kok maraaqa» kaak iyye. Tonna-leemik titta lih Yeriko fan safren.

⁵ Sarrak butta takke nabuwway dabqih Yerikol tanihiyya Eliisaq fan amma 'teeh, «YALLI a saaku ku kabir kok beelem maay taaxigee?» kaak iyyen. Eliisaq keenil gacsemii, «Yeey, aaxigeh immay, wohut yaabe waynay» keenik iyye.

⁶ Tohuk lakal Eliyyas Eliisaqak iyyemii, «YALLI, ‹Ordon weeqaytu fan gex› yok iyyek, atu away akkel elle sug» kaak iyye. Eliisaqah tu gactek iyyemii, «YALLAY waarahiyyah migaq kee ku manol xiibita'mmay, kok maraaqa» iyye. Tonna-leemik sitta lih bisoh gexen.

⁷ Too waqdi kontom takke nabuwwa Ordon weeqaytu fan ken lakat gexxe. Sarrak Eliyyas kee Eliisaq weeqaytih qaxal solte. Too waqdi woo kontom takke nabuwwa keenik xayi ikkeek solla 'te.

⁸ Sarrak Eliyyas rarayto isik kalla heeh gabat makmakka heek lakal woo weeqaytu edde yootoke. Too waqdi woo weeqayti namma'kkel kurruume. Sarrak kaa kee Eliisaq kafin baaxok bagul weeqaytuk woo qaxa fan taben.

⁹ Tokkel Eliyyas Eliisaqak iyyemii, «Yoo beyaanamak dumal, maca koh abam faxxaa?» kaak iyye. Eliisaq kaal gacsemii, «Yalli koh yecee roocaaniyyak aki nabuwwah teceemik, namma gide yoh ucuy» kaak iyye.

¹⁰ Eliyyas kaak iyyemii, «Ah esseraanamah yacoonu duudaanamak tanih matana'mmay, yoo kok beyoonu waan waqdi gexah yoo tublek, geetto. Takkay immay gexah yoo able waytek mageyta» 'yaanam kaak iyye.

¹¹ Tonnal titta lih bisoh elle gexaanamal walalak gexen. Sarrak garciik girak bicsen gaariy girak bicsen faras giitak beytahiyya ken nammay fan temeeteeh, too waqdi Eliyyas mermeritta caacot qaran fan yewqe.

¹² Eliisaq toh yubleeh; too waqdi Eliyyasah deeriseeh, «Yi abbaw, yi abbaw, Israayil gaari kee faariisah maraw! Gexxeh, gexxeh!» iyye. Tohuk wadir Eliisaq, Eliyyas abaluk maraaqinna. Sarrak Eliisaqah abe rookah saro namma'kkel isik qanxise.

¹³ Tohuk lakal Eliyyas-raraytoy kaak radde yukkuqeh wadirih yuduureh, Ordon weeqaytih qaxal soole.

¹⁴ Too waqdi Eliyyas-raraytot woo weeqaytu yootokeeh, «YALLAY Eliyyas elle yaamine Dagelta kinnihiyya ankel yan?» iyye. Woo weeqaytu yootoke waqdi, weeqayti namma'kkel gace. Sarrak Eliisaq adda akak tabeh weeqaytuk woo qaxal yeede.

¹⁵ Yerikô-magaalal ten kontom takke nabuwwa tekkem tuble waqdi, «Eliyyas luk yen qande Eliisaqah raqteh tan» iyyen. Too waqdi kaat yangooroweeni'gidih, kaal yemeeteeniih, foocal kaak gommoh raden.

¹⁶ Sarrak iyyeenimii, «Cayla le kontomuy akkel yanihiyyak genxeh ku abbah yan num waginnu wayna. Yallih roocaaniyya beyya kaa hayteh qalek teenah amo akki kee, hinnay kaadu, golok teenah addal kaa qiddeh cabtam takkeh» kaak iyyen. Eliisaq, «Aleey magexina» keenik iyye.

¹⁷ Osonuuy, «Genxam meqe» 'yaanamak yaadiyoonu cineeniih; sarrakaay Eliisaq tibba keenik iyyeh gexoonay ken iyye. Too waqdi yakken kontomuk gexeeniih, sidooca ayroh kay goranah cabba heenih ikke maloonuy gorrisak kaa sugen. Sarrak kaa magennon.

¹⁸ Too waqdi Eliisaq fan yuduuren. Eliisaq Yerikô-magaalal keenih sugeeh, « ‹Magexina› siinik maxacciyoo?» keenik iyye.

ELIISAQ ABE ABLEWAYNUH TANIIMI

¹⁹ Yerikô-magaalah marak tu takkem kaal temeeteeh annah inte. «Atu akah taaxige innah, a magaala meqe aracal xiseeni'mmay, lee akak mameqeey, ta lee daro mataysubuka» iyyen.

²⁰ Too waqdi iyyemii, «Qusba sacnil qasboyta hayya haay yol baaha» iyye. Kaal baahen waqdi,

²¹ woo leeh-raceyna fanah gexxa 'yeeh woo qasboyta addat akak qide. Too waqdi afak iyyemii, «YALLI iyyam aha: ‹A lee saytun lee abeyyooh, ahak wadir sinam maqiddaay a lee daro aysubukele› iyya» iyye.

²² Too lee too ayrook wadirik xabba haanamaay a saaku fan, Eliisaq akah inxicca 'ye innah, temqeh ten.

²³ Sarrak Eliisaq Yeriko cabeh Beetal-magaalah-gexoh gital yan waqdi, lab-urri magaalak yewqeh kaal yemeeteeh; too waqdi, «Bidaarow, akkek gex! Bidaarow, akkek gex!» axcuk kaal anqaasen.

²⁴ Eliisaq wonnah wagga heeh ken yuble waqdi, YALLIH migaaqal ken abaare. Too waqdi say-alluwah-nammay coox addak eweqqa 'teh woo urrik morootom kee namma awka kitif kitif hayte.

²⁵ Tohuk lakal Eliisaq Karmel-deqsitta-qale yewqeeh, sarrak Samaariya fan yuduure.