2 Malikwa 19 - NABUWWA KEE MALIKWA

CISKIYYAAHU NABI YASAQYAH RUUBE FARMO

¹ Malik-Ciskiyyaahu a yab akah yoobbe innaak, sara isik qanxiseeh sartanah *qabuddat gacca 'yeh YALLIH Qibaadah-Qari gexe.

² Malik-qarih-abbah yan Elaakim kee, malik-qarih kutbe-abeenah yan Sebna kee, seekah abbobtih yan mara ken lih hayya heeh, Amox-baxa-nabi-Yasaqya fan farmoh ken ruube. Oson kaadu sartanah *qabuudut gaceenih gexen.

³ Malik keenil ruube farmo kaah warseeniih iyyeenimii, «Malik ku fanah farmo nel ruubeeh, nek iyyemii, Nabi Yasaqyak, ‹A saaki nek biyak ayrooy digaala net tekkeh tan. Addat akak nanim, qaybih taniimi; lacawat tan barray xaltu taffarehiyya nekkeh nan.

⁴ Assuuriyah-malik waara Yalla xaafa'gidih, qaskarak abbah-yan-num ruube. YALLAY ku Dagelta kinnihiyya a xaafu yoobbem takkeeh; tohuh ken digaalele. Tonna'mmay ni marak raaqe marah dooqa ab» 'yaanam farmoh kaah ruube.

⁵ Nabi-Yasaqya Ciskiyyaahu ruube farmo kaa gufte waqdi,

⁶ woo yaabal gacsemii, «Sin amoytak intaanamaa, ‹YALLI, Assuuriyah-malik ruube urri-xayli yoo xaafak siinih baahe farmok mameysitina, 'yaanam kok iyyah yan› inxica.

⁷ Toh lih kaadu kok iyyaamah, ‹Assuuriyah-malikil roocaaniyya ruubeyyo. Too waqdi asmat sinni xaagu aabbeleeh, isi baaxo fanah aduurele. Tokkel seefit kaa qidsiiseyyo› kok iyyah yan, kaak inxica› 'yaanam farmo baahe maral ruube.

ASSUURIYAH MARI MEYSISSO QAGSEH

⁸ Tohuk lakal taaxige qaskar-abbay Assuuriyah-malikih farmo baahehiyya, Assuuriyah-malik Laakis-magaalak gexeeh, wokkel xayi Libna-deqsitta-magaalal qeebit yan 'yaanamih xaagu yoobbe waqdi, wokke fanah gexe.

⁹ Assuuriyah malikik migaq Sanceeribik ten. Ta malik, «Masri-malikiy Tirhaaka deqsitaah Kuusuh yaabukehiyya foocat-akak-yan-qaskar, kay qaskarat qeebi abta'gidih tamaate» 'yaanamih xaagi yemeete. Assuuriyah-malik tah yoobbe waqdi, Malik-Ciskiyyaahu fanah qagseh farmo ruube.

¹⁰ Warkatal kaak iyyeemihii, «Atu elle taamine yalli, Yarusalaam-magaala Assuuriyah-malikih-gabat maradda, kok iyyaamah numma makkalin.

¹¹ Assuuriyah-malikwa mango doolatwal bahtem toobbe koo. Too-doolatwa inkitanuuk baysen. Kot kaadu toh akkelem maagamin.

¹² Yi kaxxa abbobti duma yan daban, Goodan kee Caaran kee Resef migaq luk ten magaalooli qeebit xabba heenih bayseeni'mmay, woo mari elle aamanuk suge yallitte keenih xiqtem mali. Talassar deqsitta'kkel suge Qadan mara seleh immay, too marih yalli kaadu tu keenih maxiqinna.

¹³ A saaku Camat kee Arfad kee Safarwayim kee, tonnah kaadu, Heenaq kee Qiwwa malikwa ankel tanim kot celta? Ta saaku ta amoytittek num mayan» 'yaanam warkatal yuktubeh, farmoh kaah ruube.

¹⁴ Ciskiyyaahu ta warkat kaa maadde waqdi, yubleeh, addal tanim yikriyeh. Sarrak too warkat gabat hayya heeh, YALLIH Qibaadah-Qari gexe. Tokkel too warkat YALLIH foocal hayya heeh,

¹⁵ YALLA kallace. Dooqah iyyemii, «YALLAW, Israayil doore Dageltaw, ku dardaarinnih korsi galwa leemik daga raqta. Addunya xiinissam, kooy; kook sah Yalli mayan. Qaran kee baaxo gintem koo.

¹⁶ YALLAW, ayti yoh ucuyaay yaaba yab yok oobbey. YALLAW, net takkem ubul. Sanceerib kooy waara Yalla kinnihiyyak xaafuh inxicca iyyem oobbey.

¹⁷ YALLAW, Assuuriyah-amoytitte nummah mango doolatwa bayisseeh; ken baaxooxa abur abeenih caben.

¹⁸ Too mari Yallih aftoh luk suge duyye keenik carriseenih foyya abeenim numma. Takkay immay woh sahdayti isi gabak xeet kee cooxuk bicse duyye ikkal, Yalla hinna.

¹⁹ Tonna'mmay ta saaku, YALLAW, ni Dageltaw, ta numih gabat rade nee kal. Ta numih gabak nee teyyeeqek, YALLAW, kok sa Yalli ane waam, baadal tan doolatwa inkih aaxigele» 'yaanam dooqah iyye.

YASAQYA MALIK CISKIYYAAHUH RUUBE FARMO

²⁰ Tohuk lakal Amóx-Yasaqya, Malik-Ciskiyyaahuh farmo ruubeeh, kaak iyyemii, «YALLAY Israayil doore Dagelta kinnihiyya kok iyyamaa: ‹Sanceerib giddinaamak abte dooqa kok raabiteeh,

²¹ tonna-leemiik kaat takku waytam koh warisu waa› kok iyya. YALLI Sanceeribik iyyam ah teeti: «Siyon-qaley taahirik yani koo buruteleeh kol anqaasele; Yarusalaam-magaala atu kudda way burah af kol raqeeqisele.

²² Atu xaafteeh qayto edde abtem iyya takkalee? Kaxxiinah amo qaraanal haak tanim iyyaay? Ceele wayta umaane akak intem iyyaay? A ceele-waytam akak axcuk sugtem, Israayil doore Dageltay saytuniih, *kudduusuk yanihiyya kinnim mataaxiga'nnaa?

²³ Farmo elle rubte maral Yallih qayto ruubak sugte. ‹Faras gaariirat gacca inneh yoo kee yi qaskar Lubnaan-qaleelay fayya le awaquk sugne. Lubnaan-qaleelak kaxxa fayya le qaleela awaquk sugne› yaanam inte. ‹Teetil yen kaxxa coox irgiqeh. Qax muquk ten sariida ragidik irgiqe. Kaxxam xer ikkel tan kaxxa garbo fanah gufeh en.

²⁴ Marin baaxol qelwa dage. Too qelwah leek ooqobe. Masri-baaxol yan weeqaytut abe itqak gexxaamah kaffa 'te› 'yaanam inteeh tohul tirtirissah.

²⁵ «Anu aham dumaak takku waytaamal malseh sugem maabbito'nnaa? Away woh absissem yoo. Woo gasoosa maroh edde tan magaalooli riira edde abte qande koh teceem yoo.

²⁶ Wokkel dabaaqah suge mari cayla luk masuginnon. Tohuk gexxaamah woo mari wariggiteeh gahangahiteh. Gubbil tooboke qaysoy kaftehiyya yekken. Qari-amol tooboke qaysoy laqaymumtehiyya yekken.

^27-28 Takkay immay anu atu abba haytaamih iggima mayyu. Elle tan ikke kok aaxigeh. Gexxa ikke kee akak tamaate ikke kok aaxigeh. Yoh abta bagcarra kee afqadot kok tan kaxxiinah xaagu kok liyoh. Tohuk gexxaamah sanat santiita kok hayyaay afat cakkam kok hayya heeh akak temeete gitat koo gacseyyo, 'yaanam Assuuriyah malikik iyyah yan» iyye.

²⁹ Qagisak Amóx-Yasaqya Ciskiyyaahuk iyye: «Toh elle taaxagu waytamaa: a sanat abqure wayten daro akmetton. Ciggiila sanat kaadu woo daroh aracal isih tooboke daro akmetton. Takkay immay sidochaytô-sanatal isinnih tubquren buqreh daro akmetton. Qinab coox aysubukettoonuuh xaylo akak akmetton.

³⁰ Yuudâ-rasul baatik saaboh raaqe mari, xaylo xaltaah buxux baaxot akak nagay daabime caxay wir intahiyya akkelon.

³¹ Macaay intek, Siyon-qale kee Yarusalaam-magaalah addak baatik saaboh raaqe mari anele. Taham YALLAY Nabaamak Nabahiyya keenih le kaxxa kacanuk gexxaamah abele» iyye.

³² Tonna leemiik YALLI, Assuuriyah-malikit takku-waytam koh warsaah iyyamaa, «Usuk a magaala macula. Gaysê-baxa elle maqalaamisa. Gob luk a magaalal maxayyoowa. Tet adda cula'gidih xeet tittin bagul mahaa.

³³ Edde amma 'ye gitat aduurele'kkal tet macula. Ahamat yabtam yoo YALLA.

³⁴ A magaala, anu inni nabnah sabbatah, umaanek raaqiseyyo. Toh akah abu waam, inni naqasu Dawuduh cule qahdih sabbata› 'yaanam iyyah yan» kaak iyye.

³⁵ Too bar YALLIH malaykatti Assuuriyah-mari elle yan ikke amma 'yeh bool kee bacra-taban kee koona alfih num yiggifeh maacise. Saaku sinam xiinik ugutte waqdi, too gide yakke marih ginaada yublen.

³⁶ Assuuriyah malik tah yuble waqdi, isi qaskar luk wokke cabeh, wadir Nanawê magaala fan yuduure.

³⁷ Ayrok teena yalla iyyeh yaqbude duyyey Nisrok deqsittahiyya, wohuh bicsen qarih addal aqbuduk suge waqdi, kay xayloh nammayay migaaqah Adrammelek kee Sarxer deqsitta amma 'teh seefit kaa qiden. Sarrak Araarat deqsita rasu fan yoowwen. Kay aracal Isar-Caddon deqsita kay baxi malik yekke.