2 Malikwa 18 - NABUWWA KEE MALIKWA

CISKIYYAAHU YUUDAL DARDAARE

¹ Eela-baxi-Hosiqa Israayil-malik yekkeemih sidochaytô sanatal, Acad-baxi-Ciskiyyaahu Yuudâ-malik yekke.

² Malik yekke saaku qumrik labaatanna kee konooyut yen. Yarusalaamal labaatanna kee sagla sanatah malikih suge. Kay ina Abiyya deqsitak teneeh, Zakariyyak baxak ten.

³ Usuk isi kaxxa abba Malik Dawuduk kaxxih, YALLI kicna taamat asak yen.

⁴ Qibaada elle abak sugen aroocay fayyat raqtahiyya bayseeh; taahirik tan qamidwa akak iyyan qamidway xeetik bicseenihiyya bututtukka heen. Aseera deqsittaamay yaqbudeenihiyyah astah heenih sugen gurumuuda yiggiggileh. Muusa nacaasak bicseh cabe abeesah-ceeloy migaaqah Nacustan akak iyyeenihiyya kaadu bututtukka hee. Too abeesah ceelo yaggileenimik duma, Israayil mari woo abeesah ceeloh assakaxxiyyah qerto akah ruubak sugen.

⁵ Ciskiyyaahu YALLAY Israayil doore Dageltah yanihiyya yeemeneeh; Yuudâ-rasi kay innah yan malik duma luk masuginnaay, sarra kaadu kay lakal magenna.

⁶ Usuk YALLAL baguuk aaminuk yeneeh; kaak maxxeerinna. YALLI Muusal oobise xinto intam abak yen.

⁷ YALLI kaa'lih yeneeh; usuk abba hannaanim inkih gabal kaak bicak ten. Usuk Assuuriyah-malikih yab oggolaanam kee kay xintoh gubat gacaanam raabite cineh.

⁸ Filistiin-marak yeyseeh; oson dabqih elle sugen aroocak qunxa magaalaay kaxxa magaalooliy gasot maroh tanihiyyak, Gaadâ-magaala kee teetik dariifal tan baaxoh amma 'yaanam tan baaxo inkih buube.

⁹ Ciskiyyaahu reedeemih fereyhaytô-sanat yekkeeh; Malik-Hosiqa Israayil reedeemih kaadu malcinhaytô-sanat yekke saaku, Assuuriyah-malikiy Salmaneser deqsitahiyya Samaariyah-magaalat qeebi abeeh teetit maro hee.

¹⁰ Samaariyat maro heenimih sidiica sanat yekke saaku, Samaariya boolatteh. Taham edde tekkem, Ciskiyyaahu reedeemih laca sanat tikka 'ye saakuk teneeh; Hosiqa reedeemih kaadu sagla sanat yekke saakuk ten.

¹¹ Assuuriyah-malik Israayil-mara Assuuriya fan seewah bee. Sarrak keenik tu takkem Calac magaalal nookiseeh, gersi mara keenik Cabor weeqaytih garil Goodan deqsita rakaakayal nookise. Wohuk raqtem kaadu Meediya deqsita marih-magaaloolil nookise.

¹² Israayil-marat tonnah tanim tekkeeh; toh keenit akah tekkem, YALLAY ken Dageltah yanihiyyah amri cineenimih sabbata. Oson YALLI, Muusay kay naqasu kinnil ruube amri cineeniih, YALLI ken lih abe bica xaguraanam maabinnon.

ASSUURIYAH MARI YARUSALAAMAT QEEBI ABE

¹³ Ciskiyyaahu Yuudâ-malik edde yekkeemih taban kee fereyhaytô sanatat, Assuuriyah-malikiy migaaqah Sanceerib akak axcuk yeneenihiyya, inkih tan Yuudah-magaalooliy maroh gasoosa edde sugtehiyya qeebit yibbixe.

¹⁴ Too saaku Malik-Ciskiyyaahu Assuuriyah-malikiy Laakis magaalal yenehiyyah farmo ruube. Too farmol iyyemii, «Umam bahtem yoo kinnim innik eexegeeh; atu faxinnaanim koh aceeyyok, ahaysa ku maganak qeebik yok sol» 'yaanam kaak iyye. Malik Sanceerib tohul gacsemii, «Hay tonnal, lakqok tabna alfih kiilo takkem kee, dahabak kaadu alfih kiilo takkem yoh rub» 'yaanam kaal gacse.

¹⁵ Ciskiyyaahu lakqok YALLIH Qibaadah-Qari kee, malik-qarik-duyye-elle-daanisan-aracal sugga 'tem inkih kaah yecee.

¹⁶ Tonnah kaadu, YALLIH Qibaadah-Qarih-albaabih-bagu kee too albaabih garil usuk isih heeh yen dahab inkih kalla heeh, Malik-Sanceeribih ruube.

¹⁷ Tohuk lakal Assuuriyah-malik Laakis-magaalak Ciskiyyaahuy Yarusalaam magaalal yanihiyya fan mango qaskar ruube. Woo qaskar lih, qaskar abbobtiy kaxxa arac luk tanihiyyak sidoc ruube. Yarusalaam magaala gufen waqdi, daga raqta dorak lee akak tamaate caraata elle obta'kkeh xaqul, «Sara kaqlisa marih Booxa» deqsita arac fan beya gital soolen.

¹⁸ Tohuk lakal Malik Ciskiyyaahuh farmo ruubeeh; too farmol kay marak sidiica num yemeete. Woo sidiica num Cilkiyyá-Elaakimiy malik-qarih-abbah yanihiyya kee, Sebna deqsita numuy malik-qarih kutbe-abeenah yani kee, Asáf-Yowac deqsita numuy tikki 'taamah kutbeh abeenah yanihiyyak ten.

¹⁹ Assuuriyah-qaskar-abbobtik numuk teeni keenik iyyemii, «Gexay Malik-Ciskiyyaahuk, kaxxam naba malikih yan Assuuriyah-malik, ‹Atu kibaal elle litom iyyaay?

²⁰ Kaxxa-yab carbi-mala kee qaskariinô-dudda koh akkelem maay takkalee? Assuuriyat qeebi abtuh amo elle meqitom iyyaay?

²¹ Masri mari yemeeteh koo catelem takkale'mmay, toh bayreyta gabah caxxah haanamih bis le. Bayreyti gabâ-caxxa mayakka; yaddigilleeh, gaba kok qanxiseh caba. Kibaal kaal heenik, Masri-malik toh elle yan'inna› kaak inxica» keenik iyye.

²² Qagseh kaadu keenik iyyemii, « ‹Amo elle meqinom, YALLAY ni Dageltah yani› yok inteenik, Ciskiyyaahu, Yuuda kee Yarusalaam marak, ‹Yalla dibuk Yarusalaamal yan sadgat aracal uqbuda› inxicca 'yeh, wadirih fayya-le-aroocal heen qibaadah-qarwa kee sadgat-arooca akak yiggilem YALLA kinnim hinnaa?

²³ Anu malik Sanceerib afak sin lih yaabu waa. Isin beya mara akah geyteenik, namma alfih faras siinih baahu waamih xagana sin lih culele.

²⁴ Masri mari gaariira kee faras qeebi aba mara siinih ruubaanamah, Assuuriyah qaskar abbobtik gacca 'ya num siinik aysele» anqaasah keenik iyye.

²⁵ Qagisak iyyemii, «A arac baysa'gidih akah emeetem, YALLIH amri'kkal, inni amri maay takkalee? YALLI, ‹Woo baaxo ibbixay bayisa› 'yaanam isih yok iyye, 'yaanam kaak inxica» keenik iyye.

²⁶ Usuk too yaabak gaba kale waqdi, Elaakim kee Sebna kee Yowac kaak intemii, «Ni abbaw, nanu naaxigem Suuriyah afak woo afat yaabaay ama. Qibraan afay edde yabtahiyya a magaalah-gidaaral yan mari inkih yaabbeh; edde mayaabin» iyyen.

²⁷ Too waqdi too qaskar abba keenil gacsemii, «Macaa, yi malik farmo yol akah ruubem dibuk sin kee sin malik maay takkalen? Tonna hinna! Farmo yol akah ruubem, isin edde anuk a maray gidaaral daffeyahiyyah kaadu edde ruube. Ama gidaaral daffeya maray siinik kaxxih kaadu isi caara yakamu waah isi daaco yaaqabu waahiyyah kaadu waris yok iyye» keenik iyye.

²⁸ Tohuk lakal woo qaskar abba sollu 'yeh anay fayya haak Qibraan afat, «Kaxxam naba malikih yan Assuuriyah malik siinih ruube farmo oobbeya.

²⁹ Ciskiyyaahu sin macata'mmay kay yab maabbina.

³⁰ Usuk, ‹YALLI nee cateh Assuuriyah-qaskar magaala nek abbixe kalelek, YALLAL eemena› siinik iyyaamah maamanina.

³¹ Qagseh yab bisoh beyak iyyemii, «Assuuriyah malik siinik iyyemii, ‹Bica yo'lih abaay, edde tanin ikkek eweqay gaba yol acuya. Toh abteenik, kulli num siinik is qinabih xaylo akmeleeh, isinni *sublak kaadu sublâ-xaylo akmettoonuuh, isinni qelwak lee aaqubetton.

³² Sarra sin baaxoh bis le baaxo sin beeyyo. Too baaxol darok cayyetton. Qinabak bicsen kamri kibuk elle yan baaxo. Gaqambo kee qinab xala coox kibuk elle yan baaxo. Too baaxo zeyti (saliid) akak bicsan cooxih-xaylo kee malab le baaxo. Tonna-leemik rabak mano dooritaay, malik siinik iyyam oobbeya. Ciskiyyaahu, ‹YALLI nee catele› siinik iyyaamah numma makkalina.

³³ Aki-baaxooxah-yallitte isi baaxo Assuuriyah-malikih-gabak maay cattee?

³⁴ Camat kee Arfad suge marih yallitte ankel tan? Safarwayim kee Heenaq kee Qiwwal suge marih yallitte ankel tan? Samaariyah yalli keenih xiqem maay le?

³⁵ Ta mari luk yen yallitte anu a mara ibbixe saaku keenih xiqtem mali. Hay tonnal, YALLI Yarusalaam catelem mannal siinit celtaa?» keenik iyye.

³⁶ Usuk yaabak gaba kale waqdi, Yuudâ-mari tu maxaccooy tibba iyye. Woh keenik aba intem, Malik-Ciskiyyaahuk ten.

³⁷ Sarrak Elaakim kee Sebna kee Yowac aben rookah sara isinnik qanxiseenih Assuuriyah-qaskar-abbah-yan-num keenik iyyem malikih warsen.