2 Malikwa 17 - NABUWWA KEE MALIKWA

HOSIQA ISRAAYILIL DARDAARE

¹ Acad Yuudâ-malik edde yekkeemih taban kee nammayhaytô sanatat, Eela-baxi-Hosiqa Israayil-malik yekke. Sarrak Samaariyah-magaalal sagla sanat malikih suge.

² Usuk kaadu YALLAL dambi lem baaheh immay kaak duma Israayil-malikwah suge marih gide dambik maabinna.

³ Assuuriyah-malikiy migaaqah Salmaneser deqsitahiyya Israayil-rasut qeebi abe. Sarrak Hosiqa kay gubal gace. Tohuk lakal kulli sanatal qusuur kaah acayuk yen.

⁴ Takkay immay sarrak Hosiqa, Masri-malikiy migaaqah Soo deqsitahiyyah farmo ruubeh, «Yoh amay yoo cat» 'yaanam iyyeeh, kulli sanatal Assuuriyah-malikih ruubak yen qusuur yeyseedeh. Assuuriyah malik toh yoobbe waqdi, «Hosiqa casbit haa» iyyeh casbit kaa haysiise.

SAMAARIYAH-MAGAALA QEEBIT YIBBIXEN

^5-6 Tohuk lakal Assuuriyah-malik Israayil baaxo yibbixeeh, Samaariyah-magaala marot hee. Marot tet abbaxuk sidiica sanat tikka 'yek sarra tet yibbixeh. Tohum, Hosiqa malik edde yekke sagalhaytô sanatak ten. Israayil mara seewah Assuuriya fan beeh, wokkel ken nookise. Garab Calac magaalal nookiseeh, gersi mara keenik Cabor weeqaytih garil Goodan deqsita rakaakayal nookise. Wohuk raqtem kaadu Meediya deqsita marih-magaaloolil nookise.

⁷ Toh akah tekkem, Israayil-mari YALLAY ken dooreh Masri malikik ken cateeh Masril edde sugen caalatak ken yeyyeeqehiyyal dambi lem baaheenimih sabbata. YALLA cabba heenih xeet kee coox yuqbuden.

⁸ Israayil-mari, woo-baaxol-keenik-duma-suge-maray YALLI ken taagah baaxok yeyyeeqehiyya abak suge dambi abeeniih; tohuk kalah kaadu, kulli malik keenik abak suge uma taama kataaten.

⁹ YALLI, «Amah umahak, maabina» keenik akak iyye taama uqurat aben. Eelli haan magaaloolik qunxa magaala takku, kaxxa magaalay gasot maroh tani takku, duyye elle yaqbuden arooca xisen.

¹⁰ Kulli koomay fayya lehiyyah amo kee kulli caxah gubal, xeetik bicsen qamidway taahirik tan akak iyyaanahiyya kee, Aseera deqsittaamay yaqbudeenihiyyah astah heenih sugen gurumuuda soolisen.

¹¹ Too duyyeeyah qibaadah aroocal qaydarus qeerisak, keenik duma wokkel suge maray YALLI woo baaxok yeyyeeqehiyyah raat kataaten. Kaxxam uma umaanet aseenih, YALLAT naqabu culseeniih,

¹² kay kitaabay, «Yallak kalihim maqbudina» keenik iyyah yab cineenih.

¹³ YALLI, isi farmoytit kee nabuwwa, Israayil kee Yuudâ-marah ruubak suge. Too nabuwwa kee farmoytit, «Ummatey, maabitina. YALLI, ‹Yi amri oggola, yi kitaabay sin kaxxa abbobti dabaanaak obtehiyyay nabuwwâ-gabal siinih heehiyya intam aba› siinik iyya» axcuk sugte.

¹⁴ Takkay immay ken yab cinak sugeeniih; isinni kaxxa abbobtik kaxxih, YALLAL maamininnoonuuy, kay yab ayti akak taabbe mara makkinnon.

¹⁵ Tu xiqe sinni xeet kee cooxuy gabak bicseenihiyya yaqbudeeniih, isinnih kaadu tu xiqe sinni mara yekken. YALLI keenih kale aylahut baaqid luk manannoonuy; usuk keenil oobise amri cineeniih, ken kaxxa abbobti lih hee bica xaguroonu cineenih. Toh cabba heenih ken dariifal tan baaxooxah maray YALLI «Oson abeenim maabina» keenik akak iyyehiyya abaanam baahen. YALLI aba iyyem cineenih.

¹⁶ YALLAY ken doorehiyya keenil oobise amri cineeniih, Yallih aftok dahabak bicissa heen namma daheltih ceelo yuqbuden. Migaaqah Aseera deqsittaamay yaqbudeenihiyyah astah heenih sugen gurmudda soolisen. Tohuk kalah, cutuukâ-qibaada kee Baqal-deqsitta-duyyeh-qibaadat gacen.

¹⁷ Too duyyey yaqbudeenihiyyah isinni xaylok labim kee sayim girat sadgatah qidaanam baahen. Kalluwalle kee ramli qida maral fayu esseren. YALLIH garil dambik loowintaamat aseeniih, YALLAT naqabu ugsen.

¹⁸ Tohuk gexxaamah YALLI Israayil-mara yinqibeeh isi garik ken xiiriyeh. Keenik raqtem, dibuk Yuudâ-mara.

¹⁹ Tohuh, Yuudâ-mari kaadu YALLAY ken Dageltah yanihiyyah amri moggolinnoonuy, Israayil-mari abak sugem aben.

²⁰ Tonnal YALLI inkih yan Israayil mara yinqibeeh; ken digaaleh, ken naqboytiitiy racmatta sinnih gabal ken hee. Ellecabol isi garik ken xiiriyeh.

²¹ YALLI, Yuudâ-marak ken baxsek lakal, Israayil-mari Nabat-baxa-Yarobqam malikih haysiteeh; usuk kaadu YALLIH gitak ken yeyyeeqeh kaxxam gibdi dambit ken asise.

²² Oson Yarobqam-gita kataateeniih; usuk rabek lakal, uxih usuk abba hee dambi aben.

²³ Sarrak ellecabol, isi nabuwwak akah inxicca 'ye innal, isi garik ken xiiriyeh. Tonna-leemiik Assuuriyah-baaxo ken yiskiliqeeh tokke fan seewah ken been. Ta saaku fanah tokkel yanin.

ASSUURIYAH MARI ISRAAYIL BAAXOL GACE

²⁴ Assuuriyah-malik, Baabelon kee Kuut kee Qiwwa kee Camat kee Safarwayim deqsitta magaaloolik sinam beyya heeh, Israayil-mari akak yiskiliqen Samaariyah-rasul tan magaaloolil nookise. Tonnal too mari Samaariyah-rasul tan magaalooli isinnih raqsiteenih, elle nooken.

²⁵ Wokke naharak gufen waqdi, YALLIH qibaada abak masuginnon. YALLI toh yuble waqdi, ken takamu wayta lubooka keenit ruube. Too lubooka tu keenik qiddeh.

²⁶ Too waqdi Assuuriyah-malikih toh warseeniih; kaak iyyeenimih, «Atu Samaariyah magaaloolil nookisse mari, a-baaxoh-yalli faxam yaaxigeenih mayaniinaay; tonna-leemik a-baaxoh-yalli ken takamu wayta lubooka keenit ruube» iyyen.

²⁷ Malik toh yoobbe waqdi, «Ama seewah orbisne marak seekik teena dooray keenih ruubaay; ‹Samaariyah-baaxoh-yalli xintoh-lem-kee-faxam ummat baris› kaak inxicay kaa ruuba» iyye.

²⁸ Sarrak too seekiy Israayilih yoobokehiyya wadir Samaariya fan yuduureeh; tokkel Beetal deqsitta magaalal dabqih gace. Tokkel YALLAL elle yaamineeniih kaa elle yaqbuden gita ken barse.

²⁹ Samaariyal gace marah tu gactek, uxih isinni xeet kee cooxih qibaadat gaceeniih; duma woo baaxol suge mari xiseh cabe qibaadah-qarway fayya-le-aroocal heenihiyyal, too duyyeeyah ceelo heen. Kulli mari keenik elle-gacen-magaalal, too akak-yemeeten-magaaloolil sugen saaku elle aamanuk sugen duyyeeyah ceelo haysiten.

³⁰ Baabeloonuk yemeete mari Sukkot-Banot akak iyyaanamay yallah loonu elle yaqbudoonu waan arac heen. Kuutuk yemeete mari Nergal akak iyyan duyyey yallah loonuh ceelo haysite. Camatak yemeete mari Asiima akak iyyan duyyey yallah loonuh ceelo haysiten.

³¹ Qiwwak yemeete mari Nibcad kee Tartak akak iyyan duyyey yallah loonuh ceelo haysiten. Safarwayimik yemeete mari Adrammelek kee Qanammelek deqsittaamay yalla axcuk elle yaamineenih isinni xaylo sadgatah qideeniih cado akak solal carrisen.

³² Ta mari YALLA kaadu aqbuduk yeneeh; tohuh, too xeet kee coox elle yaqbuden aracal, qibaada abu waa maray seeka gurrah too aracal sadgatah baahen saq qidu waahiyya isinni addak dooren.

³³ YALLA aqbuduk sugeeniih; YALLA lih kaadu, woo akak yemeeten baaxol aqbuduk sugen duyyey abuk raqtih keenih raqte macabinnoonuy kaadu aqbuduk sugen.

³⁴ A saaku fanah, too dumaak abuk raqtih keenih raqte duyyeeyah qibaada macabinnoonuy uxih aban. YALLA mayaqbudaanaay; YALLI Yaqkuubuk rade maray Israayil migaq akah yeyyeeqehiyyah ruube xinto kee madqaay amri iyyam maaban.

³⁵ YALLI duma Israayil mara lih bica heeh yeneeh, amri kaadu keenil oobiseh suge. «Yok sa gersiimil maamanina. Yok sa gommoh qibaadah numuh maradina. Sadgat yi migaaqak kalihimil maabina. Yok kalihimih qibaada maabina.

³⁶ Yooy Masri rasuk kaxxa qande kee caylat sin baahe uqbuda. Dibuk yoh gommoh radaay sadgat yi migaaqal aba.

³⁷ Anu siinih acee xinto kee madqaay amriy kitaabal tunkuttubehiyya digga luk duudusa. Yok kalihimih qibaada maabina.

³⁸ Anu sin lih hee bica mahawweeninaay yok kalihimih qibaada maabina.

³⁹ Yooy sin Dageltah yanih amri oggolaay; naqboytak anu sin cateyyo» 'yaanam keenik iyyeh yen.

⁴⁰ Tohuh, kay yab maabbinnoonuy, taaxige isinni uma-taamat asak sugen.

⁴¹ Tonnal, a mari kaadu YALLA aqbuduk yen saakuuk, kaa'lih coox kee xeetiy gabak oreenih bicseenihiyya aqbuduk yenen. Ta saaku fanah ken ramad too oson abak suggu 'yeenim aban.