2 Malikwa 16 - NABUWWA KEE MALIKWA

ACAD YUUDAL DARDAARE

¹ Israayil malikih yen Ramalyaahû-baxi-Fekac reedeemih taban kee malcinhaytô sanatat, Yootam-baxi-Acad Yuudâ-malik yekke.

² Acad malik yekke saaku qumrik labaatanni karmat yen. Yarusalaam magaalah addal taban kee lica sanat malikih suge. Takkay immay isi kaxxa abba Malik Dawud raatat gexak masuginnay, YALLAY kay Dagelta kinnihiyya niqba taamat asak suge.

³ Duma sugte Israayil amoytiitik kaxxih, Yalli niqbam abak suge. Ayrok teena Acad girat isi baxa sadgatah qide. Usuk woh akah abem, Israayil-mari yamaateemik naharal woo baaxol suge maray YALLI yeyyeeqehiyyak raaqisen umâ-yabulih-tan qaadah gabbaaqiyyak ten.

⁴ Diini maleela qibaada elle abta aroocakaa, koomaamih amo takku, silal le cooxih guba takku, too aroocal Acad sadgatah saq elle qidaah, qaydarus elle qeerisak suge.

⁵ Suuriyah-malikih yen Raaxin kee, Israayil-malikih yen Fekac Yarusalaam-magaala gaadeeniih, marot tet heen. Takkay immay Acadak qeebil yaysoonu yeffereenih.

⁶ Too saaku Edom-malik, Eelat-magaala qagseh qeebit yibbixeeh, Yuudâ-maray wokkel sugehiyya tet addak yeyyeeqeh. Sarrak Edomuh yooboke mari too magaalal isih dabqih gaceeh, a saaku fanah teetil elle yanin.

⁷ Acad sarrak Assuuriyah malikih yen Tiglat-Fileeser fan farmo ruube. Iyyeemih, «Anu atu aba axcinnaanim abaah, ku amrih yan num kinniyo. Tonna'mmay ta saaku yoh amay, Suuriya kee Israayil qaskaray yoh gaaddahiyyak yoo cat» 'yaanam farmoh ruube.

⁸ Farmo elle ruube maral YALLIH Qibaadah-Qari kee malikwa dabqah elle gacta qarik duyye-elle-daanisan-aracak bee dahab kee lakqo mattacoh kaah ruube.

⁹ Malik Tiglat-Fileeser, Acad kaah ruube farmol, qaskar luk Damasko gaaduh yemeeteeh magaala qeebit raaqise. Sarrak woo magaalah mara Kiir baaxo fan seewah bee. Malik Raaxin qideh.

¹⁰ Tohuk lakal Malik Acad Damasko gexeeh, Tiglat-Fileeserit yongoorowe. Tokkel soolisen mansafay sadgat elle abaana yuble. Too waqdi sek Uriyya deqsita seekih farmo ruubeh, kaak iyyeemih, «Gexay hununuh tama'nnah yan sadgat elle yaceen arac bicisay sug» iyyeeh, isik naharat tohih ceelo kaal ruube.

¹¹ Uriyya gexeeh, Acad yamaateemik dumal, hununuh too aracih gurral, sadgat arac bicseh kaah suge.

¹² Acad Damaskok yuduure waqdi, sadgat arac biceh kaah suge. Garih akak xayyoowa 'yeh ceela'nna wagga heek lakal,

¹³ sadgatah cado akak cararisan saq elle qide. Daro kaadu sadgatah baaheeh, qinabak bicsen kamri faaroh elle caxe. Tonnah kaadu, amaanah-xiinaanamih-asta-yakke-sadgatah saq qideeh, too saqih qabala bagul akak rife.

¹⁴ Dumaak YALLIH qibaadah qiden sadgatah heenih sugen aracay nacaasak bicseenihiyya, YALLIH Qibaadah-Qarik foocal, qusba sadgat arac kee Qibaadâ-Qarik fanal gace. Sarrak tokkek kalla heeh, isih xise qusba aracak kilbat le kabut hee.

¹⁵ Tohuk gaba kalla hee waqdi, sek Uriyyak iyyeemiih, «Yi kaxxa sadgatih aracal, saaku saaku cado akak carrisan saq qida; carra carra sadgatah baahan daro cararisa. Kaadu malik kee ummat sadgatah bahta daro kee, saqay cado akak cararisaanahiyya kee, ummat bahta qinabak bicsen kamrih sadgat elle ucuy. Sadgatah qidda haan saqih qabal bagul akak rif. Woo nacaasak bicsen sadgat-aracah tu gactek, Yalli yok faxam elle aaxige astah yoh hay» iyye.

¹⁶ Sek Uriyya toh, malik kaak aba elle inxicca 'ye innal, abe.

¹⁷ Acad kaadu YALLIH Qibaadah-Qaril ten nacaasak bicsen gaariirak galdaddaqin nacaas kaleeh, woo gaariirah amol sugte sacnitte wokkek kaleh. Tonnah kaadu, taban kee namma awur ceeloy nacaasak bicseenihiyyah amol yen kaxxa tanakay nacaasak bicseeni wokkek kalla heeh, xaak bicsen rakiiboh amol hee.

¹⁸ Tohuk kalah Assuuriyah malik kaak faxak sugeemih sabbatah, YALLIH Qibaadah-Qarih addal xisen iraawo-le-aracay sabti qiidih ayroh heeni wokkek kaleh. Tonnah kaadu YALLIH Qibaadah-Qarih afay malikwa dibuk qibaadah akak culta'gidih bicseenihiyya alfeh.

¹⁹ Wohuk kalah taniimiy Acad abba heehiyya Yuudâ-Malikwah-Aydaada deqsita kitaabih addal tan.

²⁰ Acad rabe saaku, Dawud-Magaalal malikwâ-buxah mara edde yaaguqen magaqat kaa yoogoqen. Kay baxi kay lakal malik yekke. Migaaqah Ciskiyyaahu deqsitak yen.