2 Malikwa 15 - NABUWWA KEE MALIKWA

QUDDIYYA, YUUDAL DARDAARE

¹ Yahoqás-Yarobqam Israayil-malik edde yekke labaatanna kee malcinhaytô sanatat, Amaxyâ-baxi-Quddiyya Yuudâ-malik yekke.

² Malik naharak yekke saaku, karmak taban kee leceeyit yeneeh, Yarusalaam magaalah addal kontom kee namma karma malikih suge. Kay ina Yakolyaahu deqsitak teneeh; elle toobokem, Yarusalaam magaalak ten.

³ Quddiyya isi abbah raatat gexak, YALLI kicna taamah taamitak yen.

⁴ Tonna'mmay dumaak qibaada elle abak sugen aroocay fayyat raqtahiyya baateh manannaay; tonna-leemiik ummat woo aroocal sadgat abaanam kee qerto ruubaanam macabinnon.

⁵ YALLI kaxxam gibdi dalkay arab takmehiyya Quddiyyal ruubeeh; too dalka rabba 'yam fan kaa'lih sugte. Too dalka kaa tibbixeemih, sinaamak baxsimeh dibuk yan qarit yeneeh; kay baxaay Yootam deqsitahiyya kay aftok baaxo xiinisak yen.

⁶ Wohuk kalah taniimik Quddiyya abba heem inkih Yuudâ-Malikwah-Aydaada deqsita kitaabih addal tan.

⁷ Quddiyya rabe saaku, Dawud-Magaalal malik buxah mara edde yaaguqen aracat kaa yoogoqen. Kay lakal kay baxi-Yootam malik yekke.

ZAKARIYYA ISRAAYILIL DARDAARE

⁸ Quddiyya malik edde yekke soddom kee bacarhaytô sanatat, Yarobqam-baxi-Zakariyya Israayil-malik yekke. Sarrak Samaariyah-magaalal lica alsah malikih suge.

⁹ Kay kaxxa abbobtik kaxxih YALLAL dambi lem baaheeh, kaak duma malikih suge Nabát-Yarobqam abe uma-taamay Israayil ummat dambit akah asak sugtehiyya kataate.

¹⁰ Sarrak Yaabes-baxi-Sallum kaa elle qidu waa malah malseeh, ellecaboh sinam foocal kaa qide. Kaa qidek lakal kay aracal isih malikih gace.

¹¹ Wohuk kalah taniimiy Zakariyya abehiyya Israayil-Malikwah-Aydaada deqsita kitaabih addal tan.

¹² YALLI duma yan saaku Malik-Yaahuh xagana culeeh iyyeemih, «Ramad kok fereyhaytoh adoh amma 'yam fan Israayil baaxol malikwa akkelon» 'yaanam iyyeh yen. Toh elle iyye innal duudussu hee.

SALLUM ISRAAYILIL DARDAARE

¹³ Quddiyya Yuudak malik edde yekke soddom kee sagalhaytô liggidat, Yaabes-baxi-Sallum Israayil-malik yekke. Samaariyah-magaalal inki alsa malikih suge.

¹⁴ Gaddi-baxi-Manacem, Tirxak Samaariya fan gexeeh; Sallum wokkel qideeh kay aracal malik yekke.

¹⁵ Wohuk kalah taniimiy Sallum abba heehiyya kee, malik qiduh abeh yan mala Israayil-Malikwah-Aydaada deqsita kitaabih addal tan.

¹⁶ Manacem Tirxâ-magaalak amaatuk suge waqdi, Tifsac-magaala inkitanuuk bayse. Tet addal suge mara seleh. Toh akah abem, woo magaalal suge mari gaba yacayu cineemih abe. Tet dariifal tan arooca inkih bayseh. Idqa agabuk kinni way bagu fake.

MANACEM ISRAAYILIL DARDAARE

¹⁷ Quddiyya Yuudak malik edde yekke soddom kee sagalhaytô sanatat, Gaddi-baxi-Manacem Israayil-malik yekke. Usuk Samaariyah magaalal tabna sanat malikih suge.

¹⁸ Manacem kaadu YALLAL dambi lem baaheeh; kaak duma malikih suge Nabát-Yarobqam abe uma-taamay Israayil ummat dambit akah asak sugte kataatak suge.

¹⁹ Migaaqah Tiglat-Fileeser deqsita numuy Assuuriyak malikih yenehiyya Israayil rasu warare. Manacem soddom kee affara alfih kiilo lakqok kaah yecee. Too lakqo kaah akah yeceem, woo malik cato kaah yakke'gidiiy, tonnah kaadu, kay abbootan diggoowaah, nagay cayla baaha'gidik ten.

²⁰ Manacem woo lakqo Israayil gaddaleelak gaaboyseeh, kulli numuluuy kontom garsi keenik hee. Manacem too lakqo kaah yecee waqdi, Assuuriyah-malik Israayil baaxo cabeh, isi baaxo fan yuduure.

²¹ Tohuk kalah taniimiy Manacem abehiyya inkih Israayil-Malikwah-Aydaada deqsita kitaabih addal tan.

²² Usuk rabe saaku, kay baxi kay aracal malik yekke. Kay baxi migaaqah Fekacya deqsitak yen.

FEKACYA ISRAAYILIL DARDAARE

²³ Quddiyya Yuudak malik edde yekke kontomhaytô sanatat, Manacem-baxi-Fekacya Israayil-malik yekke. Sarrak Samaariyal namma sanat malikih suge.

²⁴ Usuk kaadu YALLAL dambi lem baaheeh; kaak duma malikih suge Nabát-Yarobqamay Israayil mara dambi le abittot asisak sugehiyyah raatat gexe.

²⁵ Ayrok teena Fekacya-qaskar-abbobtik numuk teenah yen Fekac deqsita num, kontom numuy Gilqad-rasuk temeetehiyya wakalih haysitta heeh, Fekacya Samaariyah addal malik qarik iqiyal edde rebsiman golik addal yan waqdi, amma 'yeenih, kaa kee gersi namma numuy Argob kee Ariye deqsittehiyya qiden. Tohuk lakal Fekac kay aracal isih malik yekke. Fekac Ramalyaahû-baxak ten.

²⁶ Wohuk kalah taniimiy Fekacya abba heehiyya inkih Israayil-Malikwah-Aydaada deqsita kitaabih addal tan.

FEKAC ISRAAYILIL DARDAARE

²⁷ Quddiyya Yuudak malik yekkeemih kontom kee nammeyhaytô sanat gufe saaku, Fekac Israayil-malik yekke. Sarrak Samaariyal labaatanni liggida malikih suge.

²⁸ Usuk kaadu YALLAL dambi lem baahak yen. Kaak duma malikih suge Nabát-Yarobqam abe uma-taamay Israayil ummat dambit akah asak sugtehiyya kataatak suge.

²⁹ Fekac malikih suge dabaanal, Assuuriyah malikiy migaaqah Tiglat-Fileeser deqsitahiyya Qiyon kee Aabil-Beet-Maqka kee Yanowac kee Kedes kee Caxor deqsitta magaalooli kee, tonnah kaadu, Gilqad kee Galiil kee Naftaali marih baaxo Israayilik raaqiseh. Woo baaxol suge mara Assuuriya fan seewah bee.

³⁰ Quddiyya-baxi-Yootam Yuudak malik edde yekke labaatanhaytô sanatat, Eela-baxi-Hosiqa, Fekac qidaamal malse. Sarrak kaa qideeh; kaa qidek lakal kay aracal isih malik yekke.

³¹ Wohuk kalah taniimiy Fekac abba hee inkih Israayil-Malikwah-Aydaada deqsita kitaabih addal tan.

YOOTAM YUUDAL DARDAARE

³² Fekac Israayil-malik edde yekke nammayhaytô sanatal Quddiyya-baxi-Yootam Yuudâ-malik yekke.

³³ Yootam too saaku labaatanna kee koona karmat suge. Usuk Yarusalaamal taban kee laca sanatah malikih suge. Kay ina Yaruusa deqsitta barrak teneeh; tet abba Saaduk deqsitak yen.

³⁴ Isi abbah raatat gexak sugeeh, tonna-leemik YALLI kicnam abak suge.

³⁵ Tonna'mmay dumaak qibaada elle abak sugen aroocay fayyat raqtahiyya baateh manannaay; tonna-leemiik ummat woo aroocal sadgat abaanam kee qerto ruubaanam macabinnon. YALLIH Qibaadah-Qarih kiblati-kabih culmah arac xissem, Yootamak ten.

³⁶ Wohuk kalah taniimiy Yootam abehiyya Yuudâ-Malikwah-Aydaada deqsita kitaabih addal tan.

³⁷ YALLI, Suuriyah-malikiy Raaxin deqsitak yenehiyya kee Israayil malikih yen Fekac, Yuudah-ummatat qeebi aba'gidih ruubem, too saakuk ten.

³⁸ Yootam rabe saaku, Dawud-Magaala deqsita caafatal malikwâ-buxah mara edde yaaguqen magaqat kaa yoogoqen. Kay baxi-Acad kay aracal malik yekke.