2 Malikwa 14 - NABUWWA KEE MALIKWA

AMAXYA YUUDAL DARDAARE

¹ Yowaahad-baxi-Yahoqas Israayil-malik edde yekke nammayhaytô sanatat, Yooqas-baxi-Amaxya Yuudâ-malik yekke.

² Malik naharak yekke saaku labaatanna kee koona karmat yen. Sarrak Yarusalaam addal labaatanna kee sagla liggida malikih suge. Kay ina migaaqah Yahoqaddin deqsitak ten. Elle toobokem, Yarusalaam magaalak ten.

³ Amaxya YALLI kicna taamah taamitak yene'mmay, Yalli yeyyeeqe xinto kee amri, akak rade Dawud elle oggolak yen innal, moggolinna. Isi abba-Yooqas-raatat gexak suge.

⁴ Tonna'mmay dumaak qibaada elle abak sugen aroocay fayyat raqtahiyya baateh manannaay; tonna-leemiik ummat woo aroocal sadgat abaanam kee qerto ruubaanam macabinnon.

⁵ Amaxya malik tikka 'yeh qande baahe saaku, kay abbay malik sugehiyya qide maray doolatak saqoltih sugehiyya caneh qide.

⁶ Takkay immay Yallih xinto elle tan kitaabay Muusal obtehiyya elle inta innal, oson abeenimih ken xaylo maqidinna. Too xintol, «Abba baaheemih xaylo maqidinaay, xaylo bahteemih abbobti maqidina» 'yaanam tan. «Numul rabi elle yamaatem, dagaak num isih baahe umaane» 'yaanam tan.

⁷ Amaxya Edomuh yooboke marak tabna alfi qaskariita Qasbo-le-Golo deqsitta golol qide. Silaq deqsitta magaala qeebit yibbixeeh; Yoktaqel 'yaanam migaaqah teetik iyye. Ta saaku fan too migaaqal tet yaaxigen.

⁸ Amaxya Israayil-malikih-yen-Yowaahad-baxa-Yahoqasah farmo ruube. Farmoh kaak iyyeemih, «Qeebih yoo duude tellek, bical gacay» 'yaanam farmoh kaah ruube.

⁹ Malik-Yahoqas too farmo kaal gacseemih, «Dumah yan saaku Lubnaan rasuk qaleh amol tooboke keenan le caxâ-baxa *sariddoh farmo rubte, iyyen. ‹Ku baxá yi baxah digbis› 'yaanam rubte, iyyen. Tohut yanin waqdi kaxxa ali yemeeteeh taaxige caxah-baxat taqqa 'ye waqdi, itqat edde tet yiggiggile, iyyen.

¹⁰ Hay Amaxyaw, Edom marak qeebih teyseemih hidah rabtam kok ableh an. Yoo qeebih suumuttam, koo kee ku marah baati xalelem mataaxigaa? Maabinay, geyte iisa koo xiqtay inxicaay, is buxal elle idiy, qeebi hinnak» 'yaanam kaah ruube.

¹¹ Amaxya too yab kaak cineh. Too waqdi Malik-Yahoqas isi kee isi marah gaaduh kaah gexeeh, Beet-Semes deqsita aracal qeebi kaat abe. Beet-Semes Yuudâ-baaxol geytima araca.

¹² Amaxyâ-qaskar qeebil gacteeh, qaskar takkeemik kudak isinni buxaaxih fan gacen.

¹³ Israayil malikih yen Yahoqas, Amaxya yibbixe. Tohuk lakal Yarusalaam fan gexxi 'yeeh, Yarusalaam magaalat maroh tan gasok Efrayim-Afak xabba haanamaay Rukni-Afa deqsita aracah amma 'yaanam tan gaso bututtukka hee. Too arac xexxaarah namma boolih gide mitrik akkuk yen.

¹⁴ YALLIH Qibaadah-Qari kee malik-qarik-duyye-elle-daanisan-aracal sugga 'te duyyek limo-gibdi-duyyeey dahab kee lakqok geyya heem tu macabinay, inkih beeh, Samaariyah-magaala fan luk gexe. Tonnah kaadu, carbit yibbixe mara seewah gabat bee.

¹⁵ Wohuk kalah taniimiy Yahoqas abba heehiyya kee, kay agiirinnay Yuudak malikih yen Amaxya deqsita numut abe qeebit yuybulleehiyyah agantah, Israayil-Malikwah-Aydaada deqsita kitaabih addal tan.

¹⁶ Yahoqas rabe saaku, Samaariyah magaalal malik buxah mara elle yaaguqen magaqat kaa yoogoqen. Kay lakal kay baxi-Yarobqam malik yekke.

¹⁷ Yuudak malikih yen Yooqas-baxi-Amaxya, Israayil-malikih-yen-Yahoqas rabek lakal, taban kee koona liggida suge.

¹⁸ Wohuk kalah taniimiy Amaxya abehiyya Yuudâ-Malikwah-Aydaada deqsita kitaabih addal tan.

¹⁹ Yarusalaamal sahda Amaxya qidimil malisse. Toh yoobbe waqdi Amaxya woo magaala cabeh Laakis deqsitta magaala fan megloh gexe. Takkay immay rabah kaah malse mari lakat kaak gexeh kaa qide.

²⁰ Ginaada kaak farasal hayya heenih Yarusalaam fanah beeniih, tokkel Dawud-Magaala deqsita caafatal malik buxah mara edde yoogoqen kabrit kaa yoogoqen.

²¹ Tohuk lakal Yuudâ-mari kay baxay migaaqah Quddiyya deqsitak yeneeh karmak taban kee leceeyit yenehiyya malikih heen.

²² Quddiyya isi abba rabek lakal, Eelat deqsitta magaalay qeebit raaqiseenihiyya Yuudah gacseeh nammeyhaak tet xise.

YAHOQÁS-YAROBQAM ISRAAYILIL DARDAARE

²³ Yooqás-Amaxya Yuudâ-malik edde yekke taban kee konoyhaytô liggidat, Yahoqas-baxi-Yarobqam Israayil rasuk Samaariyah magaalal Israayil-malik yekke. Usuk morootom kee inki liggida malikih suge.

²⁴ Takkay immay usuk kaadu YALLAL dambi lem baaheeh; kaak duma malikih suge Nabát-Yarobqam abe uma-taamay Israayil ummat dambit akah asak sugtehiyya kataatak suge.

²⁵ Israayilik beenih sugen baaxok kilbat le kabut raqta Camat deqsita daabay gitah gacaanahiyyak xabba haanamaay Rabe-Badah amma 'yaanam tan baaxo inkih gacseh. Tonnah tanim akkelem, dumaak YALLAY Israayil doore Dagelta kinnihiyya isi naqasuh yan Amittay-baxa-nabi-Yoonasah warseh sugeeh; usuk kaadu ummatah warseh suge. Nabi-Yoonas Gat-Ceefar deqsita aracih numuk ten.

²⁶ YALLI Israayil-marat yakkeenimik yakkeh yan biyak yubleeh, Yallak sah ken cattam mananna.

²⁷ Tonna kinnuk, inkitanuuk bayisaah, sarrak akah andarre waan innah, saabo ken cabsiisam mafaxinna. Tonna-leemiik Yahoqás-Yarobqam gabat ken cate.

²⁸ Wohuk kalah taniimiy Yahoqás-Yarobqam abehiyyak kay agiiranni yanu, Damasko kee Camat Israayilih elle gacse inni yanu, Israayil-Malikwah-Aydaada deqsita kitaabih addal yan.

²⁹ Yarobqam rabe saaku, Israayil-malikwa edde yoogoqen magaqih aracat kaa yoogoqen. Kay lakal kay baxi-Zakariyya kay aracal malikih raaqe.