2 Malikwa 13 - NABUWWA KEE MALIKWA

YOWAAHAD ISRAAYIL-BAAXOL DARDAARE

¹ Acadyâ-baxi-Yooqas, Yuudak malik edde yekke labaatanna kee sidochaytô-sanatat, Yaahu-Yowaahad Israayil-malik yekke. Sarrak Samaariyah magaalal taban kee malciina sanat malikih suge.

² Yowaahad YALLAL dambi lem baahak sugeeh, kaak duma malikih suge Nabát-Yarobqam abe uma-taamay Israayil ummat dambit akah asak sugtehiyya kataatak suge. Edde suge uma-taama way macabinna.

³ Tohuk gexxaamah, YALLI Israayil yinqibeeh; Suuriyah malik Cadayel kee kay baxay Banihadad deqsite keenit ruube. Too qaskar Israayil marak mango adda teyse.

⁴ Yowaahad YALLA kallaceeh; YALLI, Suuriyah-malik Israayil-ummattat uma'nna xukkutak sugem yuble waqdi, ken cateh.

⁵ Suuriyah marih gabak ken yeyyeeqe wadeena keenih ruube. Tonna-leemik Israayil mari dumak kaxxih amaanah gacen.

⁶ Tonna'mmay Israayil mari, Yarobqam ken yuybulleeh cabe dambih abittok maraaqinna. Tohuk kalah kaadu, migaaqah Aseera deqsittaamay yaqbudeenihiyyah astah heenih sugen gurmudda Samaariyal elle suge aracak makalinnon.

⁷ Yowaahad qaskarak raqtem dibuk kontom qaskariitay faras amok qeebi aba kee, tabna gaariy faaris beyahiyya kee ibi qaskarak tabna alfih numuk ten. Wohuk fulah raqtem Suuriyah malik keenik selli heeh, keenit ballaaqet akah yaaqiten innah aaqatuk suge.

⁸ Wohuk kalah taniimiy Yowaahad abehiyya kee, usuk luk yen agiiranni Israayil-Malikwah-Aydaada deqsita kitaabih addal tan.

⁹ Rabe saaku Samaariyah magaalal kaa yoogoqen. Kay lakal kay-baxi-Yahoqas malik yekke.

YAHOQAS ISRAAYILIL DARDAARE

¹⁰ Yooqas Yuudâ-malik edde yekke soddom kee malcinhaytô sanatat, Yowaahad-Yahoqas Israayil-malik yekke. Too malik Samaariyah-magaalal taban kee lica sanatah malikih suge.

¹¹ Usuk kaadu YALLAL dambi lem baaheeh, kaak duma malikih suge Nabát-Yarobqam abe uma-taamay Israayil ummat dambit akah asak sugtehiyya kataatak suge.

¹² Wohuk kalah taniimik Yahoqas abba heem kee kay agiirinnay Yuudak malikih yen Amaxya deqsita numut abe qeebit yuybulleehiyyah agantah, Israayil-Malikwah-Aydaada deqsita kitaabih addal tan.

¹³ Yahoqas rabe saaku, kay baxi-Yarobqam kay lakal malik yekke. Yahoqas Samaariyah-magaalah-addal malik buxah mara elle yaaguqen magaqat yoogoqen.

ELIISAQ RABA

¹⁴ Wohuk duma, nabi-Eliisaq kaxxa lakimah lakmiseeh; kaxxam biyaakitaah deerih yan waqdi, Israayil malikih yen Yahoqas kaat boysita'gidih yemeete. Kaa yuble waqdi amol kaak weeqeeh, «Yi abbaw, yi abbaw, Israayil kalaluh lem kook sugte» axcuk boogise.

¹⁵ Too waqdi Eliisaq, «Gexay gayse kee gaysê-xaylo bah» kaak iyye. Yahoqas gexeh kaal baahe waqdi,

¹⁶ «Taway qalaamissa'gidih bical gac» kaak iyye. Malik qalaamah bical gacca 'ye waqdi, Eliisaq gabal gaba kaak hayya hee.

¹⁷ Sarrak malik, Eliisaq kaak elle iyye innal, qari taagatay Suuriyah rasu fan yafkunehiyya fakka hee waqdi, nabi, «Taway gaysê-baxa rub» kaak iyye. Malik too gaysê-baxa akah ruube innaak Eliisaq «So! Teymeeqeh, tahaysa atu YALLIH gaysê-baxay YALLI Suuriyah marak edde yaysu waahiyya akketto. Afeek deqsita aracal qeebi keenit abettooh, keenik aysetto» kaak iyye.

¹⁸ Tohuk lakal malikik iyyemii, «Gaysê-xaylo qagisay baahay baaxo edde mud» kaak iyye. Malik woo gaysê-baxat baaxo sidiica adda mudeeh sarrak yeyseedeeh;

¹⁹ nabi Eliisaq toh yinqibeeh, too waqdi malikik iyyemii, «Baaxo koona adda akki kee laca adda akki muddam kol teneeh, tonnal, Suuriyah marak agaagul sinni iisah aysuk ten. Awayah tu gactekiiy, sidiica addak biso keenik mataysa» kaak iyye.

²⁰ Eliisaq rabeeh kaa yoogoqeenih. Too dabaanal Mooyabah yooboke mari sugum wakti butta tikka 'yeh amaatuk Israayil mara wararak sugen.

²¹ Ayrok teena Israayil mari rabe num aagaquk sugen waqdi, taaxige mara amaatih yublen. Too waqdi aagaquk sugen numih ginaada Eliisaq kabrih addat qideenih cabeenih isinnih kuden. Woo raysi Eliisaq-lafa xage waqdi, woo raysal rooci yuduureeh edde ugteh solla 'ye.

ISRAAYIL SUURIYAH-MARAK YEYSE

²² Suuriyah malikih yen Cadayel, Yowaahad malikih suggu 'yem fan Israayil marat xukkutak suge.

²³ Takkay immay YALLI kaxxam keenih racmatak sugeemih sabbatah, bayi ken mahanna. Abraahim kee Iscaak kee Yaqkuubuh cule xaganih sabbatah ken catak suge. YALLI, a saaku fanah, isi marat darre macabinna.

²⁴ Suuriyah malikih yen Cadayel rabek lakal, kay baxi Banihadad malik yekke.

²⁵ Banihadad kee Israayil-malikih yen Yahoqas qeebi tittat abte saaku, Yahoqas qeebil Banihadadak yeyseh. Yahoqas sidiica adda qeebil kaak yeyseeh; duma Banihadad-abbah yen Cadayel kay abbak qeebit raaqise Israayil-magaalooli, Yahoqas qeebit kaak gacse.