2 Malikwa 12 - NABUWWA KEE MALIKWA

YOOQAS YUUDÂ-BAAXOL DARDAARE

¹ Israayil malikih yen Malik-Yaahu edde dardaareemih malcinhaytô-sanatat, Yooqas Yuudâ-malik yekkeeh; Yarusalaam magaalal morootom karma malikih suge. Kay ina migaaqah Xibya deqsitak teneeh; elle toobokem Bersabaq-magaalak ten.

² Malik-Yooqas, suggu 'yem fan, YALLI kicna taamah taamitak suge. Woh akah tekkem, sek-Yoyadaq aba kaak axcinnaanim abak yeneemih sabbatak ten.

³ Tonna'mmay dumaak qibaada elle abak sugen aroocay fayyat raqtahiyya baateh manannaay; tonna-leemiik ummat woo aroocal sadgat abaanam kee qerto ruubaanam macabinnon.

⁴ Yooqas seekah secca 'yeeh annah keenik iyye, «YALLIH Qibaadah-Qaril yeceen lakqok dakaatah yeceen lakqo kee, isinni fayxiik yeceen lakqoh agantah inkih daanisa.

⁵ Kulli sek siinik lakqo kaal baahinnaan numih lakqo, YALLIH Qibaadah-Qariy raagehiyya edde bicsaana'gidih, daanisam kaal tan» keenik iyye.

⁶ Takkay immay woo mari, Yooqas malik yekkeemih labaatanna kee sidiica sanat tikka 'yam fan woo arac bicse'kal sugen.

⁷ Tonna-leemiik Malik-Yooqas, sek-Yoyadaq kee gersi seekah secca 'yeh, «Isin a Qibaadah-Qari akah bicse waytaanam macaay?» keenik iyye. Sarrak kaadu keenik iyyemii, «Tahak wadir Qibaadâ-Qari xayuk akah bica innah, siinil yeceen lakqo isin daanah gabat mahana» keenik iyye.

⁸ Seeka taham raabitteeh; YALLIH Qibaadah-Qarih-bicsa kaadu isinnih abe waanam kaadu oggoleenih.

⁹ Tohuk lakal sek-Yoyadaq sandug bahha heeh afa akak boohassa heek lakal, sadgat-elle-aban-aracak garil, sahda YALLIH Qibaadah-Qari akak culta afak migdi kabuk hee. YALLIH Qibaadah-Qarih-afal taamat tan seekal qibaadah-yamaate-mari yecee lakqo, seeka woo sandugut qidak sugte.

¹⁰ Sandugut mango lakqo gacinnaan waqdi, malik-kutbe-abeena kee kaxxa sek amma 'teh woo lakqo lowwu heenih sarrak olot haak sugen.

¹¹ Woo lakqo kinnih gide yuktubeenih raaqiseenik sarra, YALLIH Qibaadah-Qarih-taamah-bici gabat akak yan marih gabal haak sugen. Woo mari kaadu woo lakqo YALLIH Qibaadah-Qarih-bicsih-duyye cooxuk bicsa mara kee xisne aba maraay

¹² xeetik xisa mara kee xeet yaggileh ora marah acayuk sugen. Tonnah kaadu too lakqot, woo qarih bicsah faxxiima sariidâ-coox kee oren xeet kee, gersiimiy faxximma 'tahiyya edde xaamen.

¹³ Takkay immay too lakqot, lakqok bicsen kobbaayiy kee sacnitte kee faanus edde bargusan afti-xaylooy, baanta kee, tonnah kaadu, woo Qibaadah-Qarih addal sugte duyyey lakqo kee dahabak bicseenihiyyak tu edde mabicsinnon.

¹⁴ Too lakqo tikki 'taamak inkih YALLIH Qibaadah-Qari bicsa marih cawal kee, bicsah faxxinta duyyeh limot culsen.

¹⁵ Taamak saqoltih yen mari digga leeh yaaminen marak teneeh; tonna-leemiik lakqo looweenih keenil yeceenim faxxiimak mananna.

¹⁶ Edde-asen-qellatih-cakkih-baahan-sadgatih lakqo kee dambi-kalootuh baahan sadgatih lakqo, YALLIH Qibaadah-Qarih-bicsah acayuk masuginnoonuy; seeka isih haysitak sugte.

¹⁷ Too dabaanal Suuriyah-Malik-Cadayel, Gat-deqsitta-magaala yibbixeh gabat raaqiseh yen. Sarrak Yarusalaam kaadu yabbixeemil malse.

¹⁸ Malik-Yooqas, kaak naharat sugte malikway Yacoosafat kee Yooram kee Acadya deqsitak sugtehiyya YALLIH qibaadah baaheenih sugen mattacot, isi mattaco osissa heeh, kalah kaadu Yallih Qibaadah-Qaril duyye edde daanisan aracat suggu 'ye dahab kee, malik qarit suggu 'ye dahabak tu macabinnay inkih Malik-Cadayelih mattacoh ruube. Too waqdi Malik-Cadayel isi qaskar Yarusalaamak yeyseerreh.

¹⁹ Wohuk kalah taniimiy Malik-Yooqas abba heehiyya inkih Yuudâ-Malikwah-Aydaada deqsita kitaabih addal tan.

^20-21 Doolat-saqoltik namma num Malik-Yooqasak abtu waytaamal malisse. A namma num Simqat-baxa-Yodakar kee Soomer-baxa-Yahodbadak ten. Kaa elle qideenim, Silla fan ooba gitak Beet-Millo deqsita caafatak ten. Yooqas, Dawud-Magaalah addal malik kee malik buxah mara edde yoogoqen kabrit yoogoqen. Kay baxi-Amaxya kay lakal malik yekke.