2 Malikwa 11 - NABUWWA KEE MALIKWA

QATALYA YARUSALAAMAL MALIKÁ TEKKE

¹ Malik-Acadyah-inah ten Qatalya, tet baxa qideenim toobbe waqdi, dardaarinni elle amma axce raare mara inkih qidaanamih amri tecee.

² Acadyâ-baxi-Yooqas dibuk raaqe. Aki mara lih kaa qide raareeni'mmay, kay annay Yahoosebqa deqsitta kaa raaqisseh rooci kaak waddeh. Is Acadyak abbâ-baxák teneeh Malik-Yacooram-baxák ten. Is Yooqas kee, inah innal kaa dacrisak sugte barra beyya hayteh, Yallih Qibaadah Qarih addat xinti-aracat ken tooqore. Toh akah abtem, kaa qide waana'gidik ten.

³ Lica sanatah Yahoosebqa awki-amo dacrisak, qibaadah qarih addat uqrat kaa sugusse. Qatalya too laca sanat malikáh sugte.

YOOQAS MALIK ELLE YEKKE'NNA

⁴ Malcinhaytô sanat sek-Yoyadaq malik-buxah marat dacayrih tan qaskar kee, malik buxa dacrissa qaskarak bool-abbah ten qaskarah, «YALLIH Qibaadah-Qari fan ama» 'yaanamih farmo ruube. Oson yemeeten waqdi, usuk niyat lem kaa'lih abe loonumuh titta ken geysiiseeh, YALLIH migaaqal ken xibsiiseh. Too waqdi Malik-Acadyâ-baxa-Yooqas ken yuybulleeh.

⁵ Sarrak aba keenik iyyemii, «Sabti ayro taamah tamaaten waqdi, sidochaytô-gaba siinik malik-qari dacrisak sugtaama.

⁶ Aki sidochaytô-gaba siinik kaadu Sur-deqsitta-afal dacayrih gactaama. Gersi sidochaytô-gaba woo gasol naharsi qaskarak darret kaadu dacayrih gacaanama.

^7-8 Sabti ayro taamite waa namma gexoh tan qaskar kaadu, YALLIH Qibaadah-Qaril yan malikit dacayrih siinik gactaama. Siibten seef haysitta haay Malik-Yooqas dacrisaay gexinnaan ikke kaa'lih gexa. Siinil xayyoowinnaan numuuy qida» keenik iyye.

⁹ Qaskar abbobti, Yoyadaq keenik aba iyyem oggoleeniih; qaskarak sabti ayro taamah gexa mara kee gexe waa mara inkih, kaal baahen.

¹⁰ Yoyadaq, Malik Dawud macaxu kee goobuy YALLIH Qibaadah Qaril daanat sugtehiyya qaskar abbobtih yecee.

¹¹ Sarrak siiben seef gabat le labha, malik dacrisaana'gidih, Yallih Qibaadah-Qarih dariifal ken hee.

¹² Sarrak sek-Yoyadaq, Yooqas afah yeyyeeqeeh malik-kalabta kaat heeh, malik rasu elle xiinisa xinto kutbeh elle tan warkat kaal yecee. Tohuk lakal caxâ xaylok bicsen *zeytit kaa yuskuteenih; Yooqas tonnal malik yekke. Tohuk wadir suggu 'ye mari gaba aagaruk anay fayya haak, «Ani hay malik! Ani haay!» iyyen.

¹³ Malikáh-sugte-Qatalya qaskar kee ummatta abta xongolo toobbe waqdi, sissikuk YALLIH Qibaadah-Qari fan gexxe. Tokkel gaaboowe mari teetih suge.

¹⁴ Woo baaxol qaadah akah abak sugen innah, YALLIH Qibaadah-Qaril yan qamiddih garil, soola malik tuble. Bool-abbobtih ten qaskar kee *baanta yaagure maray maraasiyot kaa yabbixehiyya tuble. Farcatak yan maray waxxaq iyya kee baanta yaagurehiyya tuble. Toh tuble waqdi Qatalya niya teetik baxaqteeh sara isik qanxisseeh, «Gano leelaay, gano leelaay! Ah gano!» inte.

¹⁵ Sek-Yoyadaq, Qatalya YALLIH Qibaadah-Qarih deraafil tet qidaanam mafaxinnaay; tonna leemiik qaskar abbobti amriseh, «Ama qaskaray rooruh tanik gudeek hayya hay, tet beyaay; tet catam faxa mari yenek, ken qida» iyye.

¹⁶ Too waqdi tet yibbixeeniih, malik-qarih-daarat fan tet beeniih, Faras Culma deqsitta aracal tet qiden.

¹⁷ Sek-Yoyadaq, Malik-Yooqas kee ummatta, YALLIH mara yakkeeni'gidih, YALLA kee ken fanal bica abe. Tonnah kaadu, malik kee ummatta fanal tu'bica abe.

¹⁸ Tohuk wadir tokkel suggu 'ye mari inkih, Baqal elle yaqbuden qari gexeeniih bututtukka heen. Tokkel sugte sadgat elle abak sugen arooca kee, xeet kee cooxuk bicsen duyyey Yallih aftok yaqbudeenihiyya yiggiggileenih. Mattan deqsita numuy Baqal-yaqbude-mari seekih sugehiyya sadgat elle abak sugen aroocak foocal qiden. Sek Yoyadaq YALLIH Qibaadah-Qarit dacrissa qaskar heeh.

¹⁹ Sarrak is kee qaskar-abbobtiiy malik buxah marat dacayrih tan qaskar kee, malik-buxa dacrissa qaskar, malik maraasiyya heenih, YALLIH Qibaadah-Qariik malik buxa fan kaa been. Raqqa 'te ummatta inkih lakak ken katayak malik qari fan ken lih gexxe. Wokke gufe waqdi Malik-Yooqas malik-qari qaskar akak culta afak culeeh, dardaarinni-korsil daffee.

²⁰ Ummatta inkih ruffa 'teeh; Qatalya malik-buxal qideenimih sabbatah, magaalal karbacca intam masuginna.

²¹ Yooqas malik yekkem qumrik malciinit yan saakuk ten.