2 Malikwa 10 - NABUWWA KEE MALIKWA

ACAB BUXAH MARA ELLE QIDEN INNA

¹ Samaariyah-magaalah addal Malik Acabak rade marak malcina-taban takke labha ten. Yaahu waraakit yuktubeeh; woo waraakit Samaariyah magaalal yen Yidraqelik-saqoltih-yan-mara kee makaabon kee, tonnah kaadu, Acab-duruyyat dacrisa marah inkih ruube. Woo warkatal tunkuttubem annah axcuk ten.

² «Isin malikik raaqe durruyyatih dacayrit yan mara kinnitoonuuh; gaso maroh edde tan magaala kee gaariiraay faaris kee silac inkih bical tabbixeeniih; tonna'mmay a warkat sin guffu haa waqdiik,

³ malikik rade marak inkih yayse num dooray malikih hayisa. Kaa cattaana'gidih qeebi kaah aba» 'yaanam elle ten.

⁴ Too waqdi Samaariyah-abbobti kaxxa cunxo tibbixe. Iyyeenimii, «Malik-Yooram kee Malik-Acadyak num duude wee Yaahuh yab cinnam mannal dudna?» iyyen.

⁵ Tonna-leemiik malik-gasoh-abbaay magaalâ-xintoh-abbaay makaabon kee malikik-rade-marat dacayrih yen marak inkih, titta geyya heenih farmo kaah ruuben. Iyyeenimii, «Nanu ku taamat gaca mara kinninooh, atu aba axcinnaanim abnuh bical nan. Nanu malikih num mahaynak, atu taysem kot ceelinnaanim ab» 'yaanam farmoh kaah ruuben.

⁶ Yaahu kaadu gersi warkat keenih ruube. Too warkatal iyyemii, «Isin yi mara tekkeeniih anu aba axcem aba mara tekkeenik, beera ta uddur Malik-Acab-duruyyatih-moyyaayi Yidraqel-magaala fan yol baaha» 'yaanam keenih yuktube. Malcina-taban takke Malik-Acabak rade marak Samaariyah magaala miroctih yan mari amo wagitak suge. Oson ken aynabuk sugen.

⁷ A warkat ken gufe waqdi, Samaariyah magaalah abbobti woo malcina-taban yakke Acabak rade mara inkih qideeniih, moyya keenik kafaq addat hayya heenih Yidraqel magaalal yan Yaahu fan ruuben.

⁸ Yaahu, Acab durruyyatih moyyaayi baaheenim yoobbe waqdi iyyemii, «Ama moyyaayi magaalâ culmeynak afal namma ikkeh kurra haay, tittin bagul hayya haay, maaci maacisam fan wokkel elle tanay 'xica» 'yaanam iyye.

⁹ Maaci maacise waqdi, Yaahu magaalah culmeyna fan gexeeh, wokkel suge marak iyyemii, «Malik Yooramal malisseeh kaa qiddem, yooy; wohimih sin essertam matan. Takkay immay a mara inkih qiddem iyyaay?

¹⁰ Aham nee taybulleem, YALLI Acabak rade marih giddinaamak edde yabba 'yem nummak maacissem nee taybulle. YALLI Eliyyasah warseh, ‹Abeyyo› iyyem, nummak maacisse» keenik iyye.

¹¹ Tohuk lakal, Yaahu, Acabak raqqa 'ye ramad le maray Yidraqel magaalal yenehiyya kee, kay xintoh miracwaay kay kataysis kee kay seekak num macabinnay inkih qideh.

¹² Yaahu, Samaariyah-gexoh Yidraqel-magaala cabeh gexe. Gexak suge waqdi, ‹Saqi Duweeni Maffadaga› deqsita aracal,

¹³ duma Yuudâ-malikih suge Malik-Acadyah ramad le mari kaat garaye. Too marak, «Maa mara kinnitoonuuh?» iyye. Osonuuy, «Nanu Acadyah ramad le mara kinnino. Away Yidraqel magaala fan genxa. Akah genxam, Idebal xaylo kee raaqe tet buxah marak salaamatta inna'gidih genxah nan» iyyen.

¹⁴ Yaahu isi marak, «Nuwwuk ken beya» iyye. Kay mari too waqdi ken yibbixeeh, wokkek xaqul suge qeelih garil ken qide. Oson mangah morootom kee nammay akkuk yeneeniih; keenik num macabinnoonuy inkih qiden.

^15-16 Yaahu kaadu safarah gexot yan waqdi, Rekab-baxa-Yonadab gital gee. Too waqdi Yaahu salaamatta kaah abba heeh iyyemii, «Anu ko'lih akah ani'nnah, yo'lih tanii?» kaak iyye. Yonadab, «Yeey, ko'lih an» iyye. Yaahu too waqdi, «Hay tonnal gaba yol ucuy» kaak iyye. Gaba kaal yecee waqdi kaak iyyemii, «Anu YALLIH taamat baguuk elle ani inna, isih table'gidih am» kaak iyye. Yaahu too waqdi isi faras-gaarit kaa korse. Oson nammayak Samaariyah magaala gexen.

¹⁷ Wokke gufen waqdi, Yaahu Acabah-ramad-le-marak num cabe'kal inkih qide. Taham, duma Eliyyas YALLIH kabuk warseh sugem elle tekke innak ten.

BAQAL DEQSITTAM YAQBUDE MARA ELLE QIDEN INNA

¹⁸ Yaahu Samaariyah mara gaabossa heeh iyyemii, «Malik-Acab Baqal-yalla kaxxam hinna'mmay dagoom aqbuduk suge; anuuy kaxxam kaa aqbudeyyok,

¹⁹ Baqal-nabuwwaay kaa yaqbude mara kee kay seekak inkih gaaboowa. Num raaqe waay. Baqalah kaxxa mattaco aceem faxa'mmay, amaate waa numul rabi amaatele» iyye. Taham Yaahu Baqalal yaamine mara inkih qida'gidih, ayrah keenik iyyeemik ten.

²⁰ Sarrak Yaahu iyyemii, «Baqal edde nassakaxxe ayro neh xaga» iyye. Woo ayro xageenih.

²¹ Sarrak Yaahu Israayil-baaxol yan marah inkih farmo ruube. Too farmol Baqal yaqbude marak num raaqe'kal inkih yemeeten. Yemeete mari inkih Baqal elle yaqbuden qari culen. Too qari a exxaay woo exxa kibba heen.

²² Sarrakaay Yaahu, seeka-hayta-sartanak amo wagitak yen numuk iyyemii, «Baqal qibaadah culsah xagarat haan xer-kameswa baahay, Baqal yaqbude marah keef» iyye.

²³ Sarrak Yaahu, Rekab-baxa-Yonadab is lih hayya heeh Baqal elle yaqbuden qari cule. Too waqdi Yaahu wokkel suge marak iyyemii, «Akke Baqal-yaqbude-marak kalih mari yemeetem kee amaate weem wagita. YALLA yaqbude mari yemeetek, wagita» iyye.

²⁴ Tohuk lakal Baqalah cado akak carrisan sadgat kee mattaco abaana'gidih addah culen. Yaahu woo qibaada elle aban qarik afal bacra-tabanih num heeh cabeh yen. Woo marak iyyeh yenemii, «Ta marak num macabinay inkih ken qidaay; keenik inki num caba num yenek, isi rooci edde aceele» keenik iyye.

²⁵ Yaahu cado akak carrisan sadgat woo aracal akah xayyoose'nnak, woo qaskar kee qaskar abbobtik iyyemii, «Addah culay, yakkeenimiik inkih ken qida. Num keenik asillime kala» iyye. Too waqdi too qaskar kee qaskar abbobti siiben seefwa lih adda culeeniih, suggu 'ye mara inkih qideeniih raysa keenik giitak afah yeyyeeqen. Sarrak qarik saytun-arac deqsita aracak-iqiya fan gexen.

²⁶ Woo saytun-qamiddu akak axcuk sugen qamidduy wokkel sugehiyya afah yeyyeeqeenih cararisen.

²⁷ Baqal-elle-yaqbuduh-bicseh-suge-qamiddu bayissaay bututtukka heeniih, Baqal addal akak aqbuduk sugen qari carariseenih. Sarrak woo qari daacoh arac aben. Woo arac uxih a saaku fan daacoh aracah yan.

²⁸ Yaahu tonnal Baqalah abak sugen qibaada bayseh.

²⁹ Takkay immay usuk isih, kaak duma malikih suge Nabát-Yarobqam abe uma-taamay Israayil ummat dambit akah asak sugtehiyya abak suge. Malik-Yarobqam dahabak bicsen daheelah ceeloy Beetal kee Daan deqsita aracal bicsehiyya yuqbudeeh, Israayil ummatta inkih too dambit asise. Yaahu kaadu tohim yuqbude.

³⁰ YALLI Yaahuk annah iyye. «Atu meqem abteeh, Acabak rade marak too anu kok aba excem inkih abte. Tonna-leemik ku durruyyat fereyhaytô hurah amma 'yaanam fan Israayil rasul malikwa abeyyoomuh qahdi koh cula» kaak iyye.

³¹ Tonna'mmay Yaahuh tu gactek, YALLAY Israayil doore Dageltah yanihiyyah xinto baguuk moggolinnaay; Malik-Yarobqam abe uma-taamay Israayil ummat dambit akah asak sugtehiyya kataatak suge.

^32-33 Too dabaanal YALLI Israayil-rasi akkuk sugeemik daggoyseh yen. Suuriyah malikih yen Cadayel, Israayil-baaxok Ordon weeqaytuk ayrô-mawqat sugte baaxoy Arnon weeqaytuk Qarooqer deqsitta magaala fan takkehiyya gabat raaqise. Tohumuu, Gilqad kee Basan deqsita rasuy Gaad kee Ruuben kee Manasse mari elle sugehiyyak ten.

³⁴ Wohuk kalah taniimiy Yaahu abba hee inkih, kaak agiiranni-taamah agantah, Israayil-Malikwah-Aydaada deqsita kitaabal tan.

³⁵ Usuk elle rabeeh elle kaa yoogoqeenim, Samaariyah-magaala. Kay-baxi-Yowaahad kay aracal malik yekke.

³⁶ Yaahu, Samaariyah-magaalal labaatanna kee bacra sanat Israayil-malikih suge.