2 Malikwa 1 - NABUWWA KEE MALIKWA

YALLI, MALIK-ACADYAT ABE DIGAALA

¹ Malik-Acab rabek lakal, Mooyab-mari Israayil-milkih gacaanam cineh.

² Israayil-malikih yen Malik-Acadya isi qarih amol yen qarik taagat boohaahik radeeh, kaxxam biyaakite. Too waqdi Filistiin-magaalay migaaqah Ekron deqsittahiyya Baqal-Dabub-deqsittaamay yalla 'yeenih yaqbudeenihiyyal woo biyaakak uram kee ure wayu waam esseraana'gidih, farmoh sinam ruube.

³ Takkay immay YALLIH malaykatti Tisbâ-rasih nabih yen Eliyyasal amri oobiseeh, kaak iyyeemih, «Gexay Malik-Acadya farmoh ruube marat mataray, ‹Ekron-magaalal yaqbuden Baqal-Dabub fan macah gexxaanaah? Israayil-rasul Yalli mayanam maay takkalee?› keenik inxicaay,

⁴ kalah kaadu, ‹Kaak intaanamaa, YALLI, ama biyaakat rabetto ikkal murta, kok iyyah yan, kaak inxica› 'yaanam keenik inxic» iyye. Eliyyas Yalli kaak inxica iyyem iyyeeh,

⁵ too waqdi farmô-mari wadirih yuduure. Malik yuduureenim keenik yuble waqdi, «Macah tuduuren?» keenik iyye.

⁶ Oson iyyeenimii, «Num neh garayeeh, woo num, ‹Kaal uduuray, YALLI, «Ekron-magaalal yaqbuden Baqal-Dabub fayu esseraana'gidih, farmô-mara wokke macah rubtaa? Israayilil Yalli mayanam takkalee? Ama biyaakak murtay edde rabetto» kok iyyah yan, kaak inxica› nek iyye» iyyen.

⁷ Malik too waqdi iyyemii, «Woo num maca ceelak yen?» iyye.

⁸ Osonuuy, «Saqi arabak bicsen saro xagaral luk yeneeh; arabak bicsen qarumut axawah yen» kaak iyyen. Malik too waqdi, «Wohuuy Tisbâ-rasih nabih yen Eliyyasak tanih tan» iyye.

⁹ Sarrak malik, Eliyyas-baahu-waa-qaskar-abba luk, kontom qaskariita hayya heeh ruube. Too qaskar-abba Eliyyas koomah amol daffeyah yuble. Too waqdi kaak iyyemii, «Yallih-numow, malik kok ‹Ooba› iyyah yan» iyye.

¹⁰ Too waqdi Eliyyas kaal gacsemii, «Anu Yallih-num ekkek, qaraanak gira oobeleeh woo gira koo kee ku mara akmele» kaak iyye. Too waqdiik, gira qaraanak obteeh qaskar abba kee qaskar tokmeh.

¹¹ Malik too waqdi kaadu, gersi qaskar abba luk, kontom qaskariita hayya heeh ruube. Too mari usuk elle yan koomaytu fan yewqeeh; qaskar abba, «Yallih numow, malik ‹Xayuk ob› kok iyyah yan» iyye.

¹² Eliyyas iyyemii, «Anu Yallih num ekkek, gira qaraanak obteh koo kee ku mara akmele» iyye. Too waqdiik Yalli ruube gira qaraanak obteeh qaskar abba kee qaskar tokmeh.

¹³ Malik kaadu qagseh qaskar abba kee kontom num ruube. Woo num woo koomaytu yewqe waqdi, Eliyyasak foocal gulubuh rade. Too waqdi iyyemii, «Yallih numow, yoo kee yi marah racmatay, nee maqidin.

¹⁴ Dumî-namma qaskar abba kee ken mara qaraanak temeete girat tembexe. Tonna'mmay ku maganak, yoh racmat» kaak iyye.

¹⁵ YALLIH malaykatti Eliyyasak iyyemii, «Gexay addah kaa'lih oobay mameysitin» kaak iyye. Too waqdi Eliyyas qaskar-abba'lih malik fan gexeeh,

¹⁶ kaak iyyemii, «YALLI kok iyyamaa, ‹Israayil addal fayu elle esseran Yalli ane waah innah, Ekron-magaalal yaqbuden Baqal-Dabub fayu esserteemih sabbatah, murtay rabetto› kok iyyah yan» kaak iyye.

¹⁷ YALLI Eliyyasah elle warseeh, Eliyyas kaadu Acadyah elle warse'nnal, Acadya rabeh. Acadya lab-xaylo luk mananna. Tonna-leemik kay toobokoyti Yooram kay aracal gace. Yooram malik edde yekkem, Yacoosafat-baxi-Yahooram Yuudâ-malik edde yekkeemik nammeyhaytô-sanatak ten.

¹⁸ Wohuk kalah taniimiy Acadya abba heehiyya Israayil-Malikwah-Aydaada deqsita kitaabih addal kutbeh tan.