2 Aydaad 9 - NABUWWA KEE MALIKWA

SABA DEQSITTA BAAXOH MALIKÁ SULEEMANAL TEMEETE

¹ Saba deqsitta baaxoh maliká, Malik Suleeman le migaq-gexxo toobbe waqdi, kinni num kaak tabaluuy gibdi esseroorak mangom kaa essertuh kaa fan gexxe. Mango mara wakalih is lih hayyaay, gaalal caxâ-sifaay bilqah haan xeetiy limo gibdihiyya kee kaxxam mango dahabak eerra hayteh gexxe. Kaa fan temeete waqdi, kaa essertam faxak sugte esseroy niyat luk sugtehiyya kaa esserteh.

² Too esseroy is kaa essertehiyya tiya-tiyah teetih gacse. Usuk gacsa akah waa esserok masuginna.

³ Too waqdi Sabâ-rasih-Maliká, Suleeman kas tubleeh; usuk xise qariiy

⁴ miizil heenih yanin kay maaqooy, kay doolat abbobti elle daffeyta gurraay, kay buxal kay taamat yan mari missal elle soola inna kee, kay taamah mari edde yan sartan tubleh. Usuk yakme way elle-yaaqube kobbaayiy-kaah-baaha-mari elle yani'nna kee, YALLIH Qibaadah-Qaril abah yan sadgataay; tah inkih tuble waqdi, qagabsitteh hagga-inte.

⁵ Too waqdi Suleemanak intemii, «Anu inni baaxoh addal atu abba haytem kee lito kasak mangom oobbeh. Oobba heem inkih numma kinnim away ableh an.

⁶ Atu lito midir kee kas elle oobbe'nnak fula lem away ableh an. Awayaay kinnih, sahda yoh warissem ahak garaba. Taway inni namma intih ubulla haam fanah, ku giddinaamak sinam yoh warissem innih numma akkaluk masuginniyo. Kas kee bagi cubbih oobbeemik fula litoh tan.

⁷ Ku mari maxaqan le nasiib geeh yan! Ko'lih taamita mari kamba nasiib leh yan! Kulli way ko'lih yaniiniih ku afak tawqe tuxxiq le maxco yaabbeenih.

⁸ YALLAY ku Dagelta kinnihiyya fayla taafay! Kay migaaqal Yalli isi mara xiinisa malikih koo doore waqdi, kot ruffa iyyem yuybulleeh; toh akah abem, isi ummatta Israayil kicnaamih taaga. Tonnah kaadu, daayiman ken fayya hayuuy, atu qadli kee cakkit ken xiinissa'gidi abeemi» inte.

⁹ Is sarrak Malik Suleemanah gabat bahte mattaco kaah teceeh, affara alfih kiilo yakke dahabaay, mango caxâ-sifa kee bilqah haan xeetiy limo gibdihiyya kaah tecee. Too saaku is Suleemanah tecee caxâ-sifa bis le caxâ-sifa wohuk duma masuginna.

¹⁰ Malik Curam kee Malik Suleeman mari, Oofir deqsita rasuk dahab kaah baahen. Too mari tohuk kalah duyyê-xisoh meqe coox kee bilqah haan xeetiy limo gibdihiyya baahen.

¹¹ Suleeman too cooxuk YALLIH Qibaadah-Qari kee isi qarik elle yawqeeniih culan mawqeena bicse. Gad abeenitih kaadu, *begena kee kirar akak bicsaana'gidih hee. Kaak dumal inkih yan Yuudâ rasul a xaqan le bicaa kee taama tekkeh masuginna.

¹² Malik Suleeman Sabâ-Maliká kaa esserra haytem inkih teetih yecee. Is kaah bahte mattacok naba mattaco teetih yecee. Sarrak tet kee tet lih yemeete mari isi baaxoy akak yemeetehiyya fanah yuduuren.

SULEEMAN LUK SUGE MIDIRI

¹³ Malik Suleemanah kulli sanatal dahabak labaatanna kee sidooca alfih kiilo takkem baahak yenen.

¹⁴ Tohuk kalah kaadu, limo kee badaaqat aba marak gabbara beyak yen. Qarab baaxoh malikwa kee Israayil rakaakayittel abbobtih yen mari kaadu lakqo kee dahooba kaah baahak yenen.

¹⁵ Suleeman kaxxam naba goobwak namma bool takkem galbabbaqisen dahabak bicseeh, kulli gob malcina kiilo yakke dahabak bicse.

¹⁶ Wohuk kalah kaadu, qunxa goobwak sidooca boolih gid takkem galbabbaqisen dahabak bicse. Too sidooca boolih goobwak kulli gob sidiica kiilo yakke dahabak bicse. Too goobwa inkih elle abbaxuk yenem, ‹Lubnaan Garboh Kaxxa Goli› deqsita aracih addak ten.

¹⁷ Tohuk kalah malik kaxxam naba dardaarinni korsi luk yen. Woo korsi dakni-qaagak bicseenih, agle sinni dahabak exfen.

^18-19 Suleeman woo korsil gacam faxa waqdi naharak laca maaqatta yakke mawqeenaak elle awaquk yen. Too mawqeena namma kabut inkih lubak ceeloy gabak bicseenihiyyak leceey-leceey luk ten. Tittat taban kee namma lubaakih ceelo akkuk ten. Tohuk kalah kaadu iba elle haysita mansafay dahabak bicseenihiyya woo korsit xakabuh yen. Too korsi namma gaba elle haan arac luk sugteeh, teetik namma tattabak kaadu lubak ceelo ten. Tonnah tanim kalah tan doolatih dardaarinnih-korsil ahaydumal mabicsinnon.

²⁰ Malik Suleeman elle yaaqube kobbaayiy inkih dahabak ten. «Lubnaan Garboh Kaxxa Goli» deqsita aracih addal ten mingilwa kaadu akak bicseenim, saafik yan dahabak ten. Suleeman dabaanal lakqok bicsen duyye hebeltô-tu'xiq luk mananna.

²¹ Badal gexa maraakibik butta luk yen. Kay maraakib Curam maraakib lih gexak yen. Too maraakibit yan mari sidooca sanatal inki adda dahab kee lakqooy dakni-qaag kee wagaqwa kee qaxa le kaxxa kimbir eerra heenih baahak yenen.

²² Gaddaliino kee kasah Malik Suleeman innah yan malik baadal mananna.

²³ Baaxol eneyya 'ta malikwa, Yalli kaah yecee kasak faxaanamal ken fayisa'gidih, kaal amaatuk ten.

²⁴ Kaa fan amaatinnaan num mattacoh gabat dahab kee lakqok bicsen duyyeey, xer-sarooy, silacaay, caxâ-sifaay, faaris kee baakil kaah baahak yenen. Kulli sanatal kaal yamaate mari taham abak suge.

²⁵ Tohuk kalah gasoosak affara alfi takkem luk yeneeh; toh akah abbaxuk yenem, faaris kee faaris giitak beyan gaariira. Tonnah kaadu taban kee namma alfih farasay qeebi edde abaanahiyya luk yen. Too faroosak garab Yarusalaam magaalal abbaxuk yeneeh; wohuk raqtem kaadu gersi magaaloolih addal abbaxuk yen.

²⁶ Furaat weeqaytuk xabba haanamaay Filistiin rasu kee Masri cuduuduh amma 'yaanam tan baaxol enna 'ta malikwak abbah raqtaah keenil ackumuk tenemii, Malik Suleemanak ten.

²⁷ Suleeman dabaanal Yarusalaam magaalal lakqo xeet manga luk teneeh; *sariidâ coox kaadu, mango-koomaami le baaxol tan *sublah innah qadad cabeh yen.

²⁸ Malik Suleeman faaris akak bahsiisak yenemii, Masri kee wohuk kalah tan gersi baaxooxak ten.

SULEEMANAL YALLIH AMRI YEMEETE

²⁹ Wohuk kalah taniimiy Malik Suleeman abak yenehiyya qimbok xabba haanamaay ellecabot akak amma 'yaanam yan aydaadi elle geytimam, Nabi Naatan Aydaada deqsita kitab kee Siilô magaalal yen nabi Aciiya yuktube kitab kee, nabi Qiddo, Nabát-Yarobqam giddinaamak yuble wacyih kitaabal geytinta.

³⁰ Suleeman Yarusalaamal morootom sanatih gide inkih yan Israayilil malikih suge.

³¹ Tohuk lakal rabeeh; Yarusalaamal Dawud-Magaala deqsita caafatal kaa yoogoqen. Kay baxay Racabqam deqsitahiyya kay lakal malik yekke.