2 Aydaad 6 - NABUWWA KEE MALIKWA

SULEEMAN ISI DAGELTA FAYLISE

¹ Too waqdi Malik Suleeman dooqa abeeh, dooqah iyyemii, «YALLAW, dite kee qamburreh addat gactam dooritte.

² Away koh kaxxam naba qariy dabqih kulli way elle gactu wayta xise» 'yaanam iyye.

³ Sarrak inkih tan Israayil ummatay soltahiyya fan ufkunna 'yeh, dooqa keenih abe.

⁴ Tohuk lakal iyyeemih, «YALLAY Israayil doore Dagelta kinnihiyya fayla taafay. YALLI isi gabat yi abbah abe xagna duuduse. Yalli dumah yan saaku yi abbak iyyeemih,

⁵ ‹Inni mara Masrik eyyeqqa heemiiy akke, Israayil baaxol yoo elle yaqbuden qari elle xisan magaala dooreh masuginniyo. Yi mara miraacisu waa num duma dooreh masuginniyo.

⁶ A saakuh tu gactek, yoo elle yaqbuden qari xisaana'gidih, Yarusalaam magaala dooreh aniih; kaaduuy, Dawudow, yi ummat xiinissa'gidih koo doore› 'yaanam kaak iyyeh suge» iyye.

⁷ Yab tokket mayseedinnay bisoh beeh iyyeemih, «Yi abba, YALLAY Israayil doore Dagelta kinnihiyya, elle yaqbuden qari xisam faxeh suge waqdi,

⁸ YALLI yi abbah yan Dawuduk iyyeemih, ‹Yoo elle yaqbuden qari xissam faxxe waqdi meqem niyatteh tani immay,

⁹ woo qari xissu waytam koo hinnay, ku baxa. Atu isih xalte ku baxi xisele› 'yaanam kaak iyye.

¹⁰ «Ta saaku, YALLI iyyeemik cabem maliiy duuduseh. YALLI elle iyye'nnal, Dawud aracal Israayil ummatih malik ekkeh an. YALLAY Israayil doore Dagelta kinnihiyya elle yaqbuden qari xiseh an.

¹¹ YALLI isi ummat lih abe qahdi-kutbeh elle yan luuc addat akak yan Sandug too qarih addal heeh an» iyye.

SULEEMAN DOOQA

¹² Suleeman toh inxicca 'yeh gaabowwa 'ye mari kaa elle yable'kkel, sadgatah qidan saqa elle carrisan mansaf gariik solla 'yeh, dooqah namma gaba fayya hee.

¹³ Suleeman fayya 'ya aracay nacaasak bicseenihiyya Yallih Qibaadah-Qarih daaratih gudel heeh yen. Too aracay nacaasak bicseenihiyya affara kabuk tittat koona cusul akkuk yen. Fayyah kaadu sidooca cusul akkuk yen. Sarrak too mansafal bukka 'yeeh, kulli num kaa elle yable ikkek gulubuh nokka 'yeeh, dooqah qaran fanah namma gaba fayya hee.

¹⁴ Dooqah iyyeemih, «YALLAW Israayil ummatta doore Dageltaw, kok sa qaran kee baaxol Yalli mayana. Baguuk koo taqbude ku naqoosah litoh tan kacni akak amurruqe waa Dagelta kinnitooh; keenih culte xagana duudusa Dagelta kinnito.

¹⁵ Yi abba Dawuduy ku naqasuh yeneh culte xagana duudusseh. Duma edde yabba intem inkih tiya tiyah duudusseh.

¹⁶ Taway YALLAW, Israayil ummatta doore Dageltaw, duma yi abbak koh duudusseyyo inteemik inki tiyay raqtehiyya tan. Tohumuu, ‹Kok radu waa mari, atu akah abte innah, anu aba excem dudda luk abe ken tekkek, tonnal ku reeda baxak baxal raqta reeda akkele› 'yaanam inteh ten.

¹⁷ Tonna kinnuk, Israayil ummatta doore Dageltaw, atu inxicca 'teeh yi abba Dawuduy ku naqasuh sugehiyyah culte xagni ku gabat dudda geyay.

¹⁸ «Yi Dageltaw, baaxo koo tabbixeemih dudda geelee? Baaxô-bagul sinam fanal dabqah maay gactaa? Qaran kee qaraanak ellecabot raqta qaraanitte tabbixu dudda akah gee wayta Dagelta kinnitok, hay, xise-qari-baxi mannal koo abbixele?

¹⁹ YALLAW, yi Dageltaw, anu ku naqasu kinniyok, aba dooqa yok oobbeyaay, koo akah kallacam yoh duudus.

²⁰ A qarik bar kee loqo amo akak wagit. A qaril «Yoo aqbudeloonu» 'yaanam inteh teneeh; tonna kinnuk, anu a qari fan ufkunna exceh abah an dooqa yok raabit.

²¹ Yoo kee ku maray Israayilih yoobokehiyya ta Qibaadah-Qari fan ufkunna inneh abna dooqa nek raabit. Qaraanay ku dabqih yanihiyyak ni kallaci oobbeyaay abne umaanek qafu neh ab.

²² «Sahdaytuk qellat bahte 'yeenih, kaa xibsisaana'gidih a Qibaadah-Qari fan kaa baahen ken tekkek, too num ‹Anuy baahem mayyu› 'yaanam axcuk Qibaadâ-Qaril yan sadgat elle aban mansafih foocal xiibite kaa tekkek,

²³ too waqdi, yi Dageltaw, qaraanak ken ankacisaay, cakki le num uybulluy. Qellat le numul celta digaala kaat abaay, qellat baahe wee num currih rub.

²⁴ «Atu isi mara abte Israayil ummatta kol baahen dambik gexxaamah naqboytit keenik tiysiise koo tekkek, oson toh ubulla heenih kol yuduureeniih, ta Qibaadah-Qarih fan amma 'yeenih koh rammitta axcuk, ‹Yallaw, bahneh nan dambik qafu neh ab› axcuk dooqa abeenik,

²⁵ elle tan qaraanaak too dooqa keenik raabit. Ku ummatta abteh sugte dambik qafu keenih abaay; oson midirih loonuuh dumaak ken kaxxa abbobtih teceeh sugte baaxo fan ken gacis.

²⁶ «Ku ummatta kol bahte dambik gexxaamah, qaran alfimeeh rob waytimam ubulla heenih, too saaku toobitta 'yeenih koh rammitak a qibaadah qari fan ufkunna 'yeenih dooqa aben ken tekkek,

²⁷ too dooqa, elle tan qaraanaak keenik raabit. Israayil ummattay ku naqoosah tanihiyya abte dambik qafu keenih ab. Edde gexan meqe-gita ken baris. A baaxo, ku baaxoy ku marah ikoytah teceehiyya kinnuk, rob tet mawaysiisin.

²⁸ «A baaxol qulul rade kee dalkay numuuk numut tabtahiyya sinaamat rade kee, tooboke daro orongoobitiiy caaco bayse kee, qanayti sele yekkek, naqboytit qeebih magaala keenik marot haytek, biyak ken yabbaxuuy, gibdaabina lem keenit tikka 'tek,

²⁹ tohuk dooqa aban waqdi dooqa keenik oggol. Yi Dageltaw, ku ummattay atu isih doorittehiyyak faxe num abe dambih baguuk nadaamitta 'yeh, gaba fayya haak a Qibaadah Qarit ufkunna 'yeh dooqa abe kaa tekkek,

³⁰ ken dooqa raabit. Qaraanay ku dabqah yanihiyyak ken dooqa ankacisaay, dambik qafu keenih abaay ken cat. Sahdayti afqadoh addat yascubem taaxigem, dibuk koo. Tonna-kinnuk kulli numuh kay abini elle aninnaan innal keenil uckum.

³¹ Tonnal ku mari atu ken kaxxa abbobtih ikoytah tecee baaxol yaniinim fanah ku yab oggolak xiinelon.

³² «Allî-baaxoh mari ku nabna kee ku qande kee cayla yaabboonu waan waqdi kee, ku abini le innak xaagu geyoonu waan waqdi, a Qibaadah-Qaril dooqa abaana'gidih xer baaxok yemeeten ken tekkek,

³³ koo akah kallaceenim keenih ab. Qaraanay elle tantohiyyak ken dooqa raabitaay, kot faxak akah yemeeteenim keenih duudus. Tonnal, Israayil ummattak kaxxih, addunyal enna 'ta ummatta koo aaxigeleeh, ku amri duudusele. Toh lih kaadu a qariy anu xisehiyya koo elle yaqbuden qari kinnim aaxigelon.

³⁴ «Ku mari, atu ken amrissa waqdi, naqboytiitih isik yan marat qeebi abaana'gidih gaadan waqdi, faxe ikkeliiy yanoonay, a magaalay isih doorittehiyya kee, ta Qariy ku qibaadah xisehiyya fan ufkunna 'yeenih, kooy YALLAH yanihiyya kallacan waqdi,

³⁵ elle tan qaraanaak ken dooqa oggolaay nasri keenih ucuy.

³⁶ «Dambit ase waa num mayanaay; tohih sabbatah ku mari dambi lem kol baahen ken tekkeeh, tohuk gexxaamah ku naqbi keenil oobeeh, naqboytit gabal ken hayte koo tekkeh, woo naqboytit xer baaxo takkuu, xayi baaxo takku, seewah ken been ken tekkek,

³⁷ kaskassoowan waqdi, ‹Yallaw, dambit asneh naniih umam abneh noysommeh nanik, qafu neh ab› axcuk toobiten ken tekkek, too tooba keenik raabit.

³⁸ Oson, too elle yanin baaxok nummaak isinni afqadook toobitta 'yeenih koo kallacen ken tekkek, too kallaciy kot abaanahiyya kaadu a rasu ken kaxxa abbobtih ikoytah teceehiyya fan ufkunnaay, kaadu ta magaalay atu isih doorittehiyya fan ufkunnaay, tonnah kaadu, ta qariy anu ku qibaadah xisehiyya fanah afkunuk aben ken tekkek,

³⁹ tonnal, YALLAW, too dooqa keenik oggol. Qaraanay ku dabaaqah yanihiyyaak dooqa keenik oobbeyaay keenih racmataay, ku mari abba hee dambi keenih cab.

⁴⁰ «Yi Dageltaw, a arac dacrisay; a aracal aban dooqah ayti ucuyaay aban kallaci macinin.

⁴¹ Dageltah yan YALLAW, qibaadah xisen qari fan amey, tokkel dabqih gaceey! Ku qahdi addat le sanduguy ku qandeh asta yascasse, tokkel dabqih gaceey! Dageltah yan YALLAW, ku seekah yan mari, sartan innah, cakkit gacoonay. Imaan kol le mari ku maqaanet ruffu inxicay.

⁴² Dageltah yan YALLAW, isih dooritte malik macinin. Dawuduy ku naqasuh yenehiyyah luk sugte kacanuy amurruqe sinnihiyya kulli way kassita» 'yaanam axcuk dooqa abe.