2 Aydaad 5 - NABUWWA KEE MALIKWA

¹ Tonnah abak, Suleeman YALLIH Qibaadah-Qarih xisnek gaba kaleh. Too waqdi Suleeman kay abba Dawud YALLIH qibaadah loowe duyye rikeek abbaxuk sugehiyya gaabossa heeh, sarrak Yallih Qibaadah-Qarik mattacoh yaceen duyye elle daanisan golitteh addal hee. Tohumuu, dahab kee lakqo kee, kaadu wohuk kalah, gersi duyyek ten.

YALLIH QAHDIH-SANDUG QIBAADÂ-QARIL ELLE HEEN INNA

^2-3 Too dabaanal YALLIH Qahdih Sandug, Dawud-Magaalay Siyon deqsitahiyyal sugte. Malcinhaytoh alsat yamaate Iraawô-Dabih-Qiid deqsita qiidih ayro Yarusalaamal kobxen waqdi, Malik Suleeman too Sandug Yallih Qibaadah-Qari fan baahaana'gidih, Israayilik saqoltih yan maraay kedoh abbobti kee makaabonuh seeco abe.

⁴ Sarrak Israayil ummattak saqoltih yen mari elle yan ikkel, Leewih yooboke mari Qahdi-Sandug ukkuqqa heeh,

⁵ Yallih Qibaadah-Qari fan been. Leewih yooboke mara kee seeka, Yallih Nabnah-Siraq kee tet addal sugte duyye inkih, Yallih-Qibaadah-Qari fan been.

⁶ Malik Suleeman kee inkih tan Israayil ummat Qahdi-Sanduguk foocal solla 'yeenih, tokkel mangah loowo sinni illi kee laa sadgatah yusguuden.

⁷ Tohuk gaba kalen waqdi seeka, YALLIH Qahdih-Sandug ukkuqqa hayteh, Qibaadâ-Qarik addal Kulliimik-Taahiriinoh-Yayse-Goliy iqiyat raaqahiyyah addal daffeyseeniih, woo galwa leemih ceeloh gubal heen.

⁸ Tonnal galwa-leemih galway fakimit tanihiyya YALLIH Qahdih-Sandug kee tet elle yakkuqen cooxuh reebu tekke.

⁹ Tet elle yakkuqen cooxih buxuxwak exxaaxi Kulliimik-Taahiriinoh-Yayse-Goli deqsita aracak foocal soola numuh amballayuk yene'mmay, tohuk kalih kabuk amballayuk mananna. Too coox ta saaku fan tokkel elle yan.

¹⁰ Sandug addat geytimak tenem, namma luucuy xeetik bicseenihiyyak ten. Israayil mari Masri rasuk eweqqa 'yeh safarat yan saaku, YALLI Siinâ-Qaleh amol Israayil mara lih abe qahdih-yab too luucul yunkuttube. Too namma xaa too sandugih addat haytem, Muusak ten.

¹¹ Seeka woo sandug daffessa haytek lakal, Taahirik-yan-Aracih-addak tewqe. Woo saaku, seeka akak inxicca iyyan mari faxe gulubuh yaabukoonay inkih gaaboowwa 'yeh, isinni taahirik heen.

¹² Leewih ubukka 'ye marak saare abak ten Asaf kee Ceeman kee Yedutun akak axcuk yenen labha kee, oson akah yooboken gulubut raaqak yen mari inkih, too saaku sartanah *baftak bicsen meqe sarot gaceeniih; sadgat elle aban mansafak ayrô-mawqa le kabut, kirar kee *begena digirak giyaagib aagaruk soolen. Bool kee labaatanni seekiy *baanta aagaruk ken xaqut soolak yenen.

¹³ Yakkeenimiik inki adda akkaquk YALLA saarisan waqdi, *baanta kee giyaagib kee, wohuk kalah tan duyyey saareh yaagureenihiyya luk aagaruk aben. YALLIH saareh iyyeenim, «YALLI maqaane le Goytak, candu kaah gacisa, ummatey! YALLIH kacni mayambaxak, tohul candu kaah gacisa» axcuk Yalla faylisen. Too waqdi, garciik qamburre YALLIH Qibaadah-Qarik adda inkih bulteh.

¹⁴ YALLIH nabna yaybulle noori, inkih yan qarik adda ifissa heemih sabbatah, seeka isinni taama abtuh, adda culaanam maduudinnon.