2 Aydaad 4 - NABUWWA KEE MALIKWA

QIBAADÂ-QARIL HEEN DUYYE

¹ Tohuk kalah kaadu nacaasak sadgat-elle-aban-mansaf bicseh yen. Too mansaf xexxaarah labaatanni cusul akkuk yen. Baguh kaadu labaatanni cusul akkuk yeneeh, fayyah kaadu tabna cusul akkuk yen.

² Curam kaadu nacaasak sacni gurral yan kaxxa tanak bicse. Too tanakak adda koona cusul akkuk ten. A sanaak woo san farakkah tabna cusul akkuk yen. Soddom cusul kaadu inkih yan tattab kaak akkuk yen.

³ Namma roorul sittak bagul tan kulli cusulul tabna awur ceeloh taswiir tanakak a exxaay woo exxal akak yen. A taswiir yakkeemiik raaqe tanakak baxsa sinni gurral bicseenih yenen.

⁴ Too tanak nacaasak bicsen taban kee namma awurih ceeloh amol daffeyseenih yenen. Too awurwak kulli sidocuuy inki kabul afkanuk yen.

⁵ Woo tanak masuh gaba gennaqtah gide akkuk yen. Af akak figgaan af ceelak yen. San-san akak xambaqu luk cabeenih yenen. Too tanak leek lactam alfih litri abbaxuk yen.

⁶ Tonnah kaadu tabna sacni bicsen. A tabanak konoy Yallih Qibaadah-Qarik migdi le kabut heeniih, aki konoy guri kabul akak heen. Too sacnitte akah heenim, sadgatah qidan saqih cado elle kaqlisaana'gidik ten. Sacni gurral yan kaxxa tanakah tu gactek, seeka edde kaqalta lee elle haak yenen.

⁷ Kitab elle inxicca 'ye innal, tabna caxxay faanuswa amol akak haanahiyya dahabak bicsen. Too cooxuy dahabak bicseenihiyya Yallih Qibaadah-Qarik giffa 'ya golih addal heen. A tabanak konooy tattabak teenal heeniih, aki konooy kaadu gersi tattabal heen.

⁸ Tonnah kaadu tabna miiz bicsen. Qibaadâ-Qarih addal konooy tattabak teenal heeniih, aki konooy kaadu gersi tattabal heen. Tohuk kalah kaadu, dahabak qunxa sacnittey rifan qabala kee lee elle haanak bool bicsen.

⁹ Seeka elle gacta'gidih, Qibaadâ-Qarik adda le kabul daarat bicsen. Tonnah kaadu iro le kabuk kaxxa daarat bicsen. Daarat-alfintitte bicseenih; too alfintitte nacaasak exfen.

¹⁰ Sacni gurral yan kaxxa tanak elle heenim, Qibaadâ-Qarik gabbi le kabut raaqa tattab kee ayrô-mawqa le kabut raaqa tattab elle yangale aracak xaquk ten.

¹¹ Curam tohuk kalah kaadu, gombod elle caxan mingilwaay, badiilaali kee, rifan qabala kee lee elle haan sacnitte bicse. Curam Suleeman kaal yecee taamak gaba kaleeh, YALLIH Qibaadah-Qarih-taama duuduse.

¹² Usuk bicse duyye ah teeti: Namma qamiddu kee woo namma qamidduh amot heen sacni af le duyye kee too duyyey sacni af lehiyyak bagul bilqah heen sudaaducuh tittat yoxeen silsilatih tasaawir kee

¹³ rummaanat tasaawiriy affara bool mangah yakkehiyya bicse. Too tasaawir qamiddi amot tan duyyey sacni af lehiyyak bagul, tittat yoxeen silsilatih bagul, kulli mansafak a exxaay woo exxak namma rooruh hayya heenih duuduseenih yenen.

¹⁴ Tohuk kalah kaadu, Curam tabna gaari kee tabna sacni kee

¹⁵ sacni gurral yan kaxxa tanakaay, woo tanak qekuh elle yan taban kee namma awurih ceelooy,

¹⁶ gombod elle caxan mingilwaay, badiilaali kee feeraari le malaakiq bicse. Naggaarinna abba haa marak inkih foocat yan Curam ta duyye inkih akak bicsem, isiffiyya heen nacaasak ten. «Ta duyye YALLIH Qibaadah-Qarih tannal bicisa» kaak intem, Malik Suleemanak ten.

¹⁷ Suleeman ta duyyeeya elle bicsiisem, Ordon weeqaytuk Sukkot kee Xareeda deqsitta namma magaalak fanal yan aracay qasa-burta elle geytimtahiyyak ten. Tokkel, too duyyeh weelo qasa-burtak bicseenih, diyaayisen nacaas elle caxen.

¹⁸ Duyyek bicseenim mangoomuk teneeh, tohuk gexxaamah a duyyeh bicsaah nacaasak faxxinteh gidek loowo yaaxige num mayan.

¹⁹ Tohuk kalah Malik Suleeman Qibaadâ-Qarih addal heen duyye bicsiise. Tohumuu, sadgatah qerto elle qeerisan mansafay dahabak bicseeni kee, Yallih sadgatah xayyoosan gaqambo elle haan miizwa kee,

²⁰ Kulliimik-Taahiriinoh-Yayse-Golik foocal, Muusal obte xinto elle inta innal, faxxiima waqdi ursan faanuswa kee faanuswa elle daffeysan coox agle sinni dahabak bicsen.

²¹ Tohuk kalah kaadu, kaxxam meqe dahabak qobor gurral bicsen tasaawiriiy, faanuswa kee, xikcin elle haan kabaaba kee,

²² faanuswa edde bargusan afti-xaylooy, rifan qabala elle haan sacnitteey, qeerisan qaydarus elle haan mingilwa kee, xikcin elle haan kabaaba inkih, saafik yan dahabak bicseenih yenen. Tohuk kalah kaadu, Yallih Qibaadah-Qari akak culan iro le kabut raqta culmah alfintitte kee Kulliimik-Taahiriinoh-Yayse-Goli akak culan alfintitte dahabat exfeenih yenen.