2 Aydaad 36 - NABUWWA KEE MALIKWA

YOWAACAD DEQSITA YUUDÂ MALIKI

¹ Yuudâ-mari kay baxa Yowaacad dooreeniih, Yarusalaamal malik yakke'gidih kaa yuskuten.

² Yowaacad Yuudâ-malik yekke saaku, labaatanna kee sidooca sanatat yen. Yarusalaam magaalal sidiica alsa malikih suge.

³ Nako deqsita Masri-malik xabba kaa heeh seewah kaa bee saaku, kay reeda gaba kalte. Nako Yuudâ-marak sidiica alfi kee affara boolih kiilo qado lakqok beeh, soddom kee affara kiilo dahabak gabbarah ken mekelsiise.

⁴ Nako, Yowaacad toobokoytay migaaqah Elaakim deqsitak yenehiyya Yuudâ-malik abe. Migaq kaak korseeh Yahoyaakim kaak iyye. Yowaacad Masri fan seewah bee.

YAHOYAAKIM DEQSITA YUUDÂ MALIKI

⁵ Yahoyaakim, Yuudâ-malik yekke saaku qumrik labaatanna kee koona karmat yen. Sarrak Yarusalaam magaalal taban kee inki sanat malikih suge. YALLAY kay Dagelta kinnihiyyal dambi lem baahak suge.

⁶ Nabkadnessar deqsita malikiy Baabelon malikih yenehiyya Yuudâ-baaxo warare. Yahoyaakim nacaasak bicsen silsilatat uxuyya heeh, Baabelon fan seewah kaa bee.

⁷ Sarrak too malik YALLIH Qibaadah-Qaril sugte duyyek tu takkem Baabelon fan dannabah beeh, isi qarih addal hee.

⁸ Wohuk kalah taniimiy Yahoyaakim abba heehiyyak umâ-yabulih tanim kee aaminnaanimiy edde asehiyyah agantah, ‹‹Israayil kee Yuudâ Malikwah Aydaada›› deqsitta kitaabal tan. Kay lakal kay baxay migaaqah Yahoyaasin deqsitak yenehiyya malik yekke.

YAHOYAASIN DEQSITA YUUDÂ MALIKI

⁹ Yahoyaasin Yuudâ-malik yekke saaku taban kee bacra sanatat yen. Yarusalaam magaalal sidiica alsa kee tabna ayro malikih suge. Usuk kaadu YALLAL dambi lem baahe.

¹⁰ Sugum rade waqdi Baabelon malik yemeeteeh, Yahoyaasin Baabelon fanah seewah bee. YALLIH Qibaadah-Qaril sugte duyye kaadu dannabah bee. Sarrak Yahoyaasin qammiy migaaqah Xidkiya deqsitak yenehiyya Yuudâ-mara kee Yarusalaam marak malik abeh cabe.

XIDKIYA DEQSITA YUUDÂ MALIKI

¹¹ Xidkiya malik yekke saaku qumrik labaatanna kee inki sanatat yen. Sarrak Yarusalaamal taban kee inki sanat malikih suge.

¹² Too num kaadu YALLAY kay Dagelta kinnihiyyal dambi lem baahak sugeeh, nabi Ermiyaas kaa'lih edde yaaba YALLIH yab ankacisak mananna.

YARUSALAAM TINTIXIBBIXE

¹³ Baabelon-abbay Nabkadnessar deqsita Xidkiya malik abe saaku, kay yab yaabbu waamih tiyal, Yallih migaaqal dirkih kaa xibsiiseh suge'mmay, Xidkiya kay yab moggolinna. Fiirik geerah YALLAY Israayil doore Dageltah yanit baaqid mahannaay; toobitta 'yeh kaal yaduureenim cineh.

¹⁴ Tohuk kalah kaadu, Yuudah abbobti kee seekah abbobti Yalla cinna hayteh, cuggaaneh keenik yan mari edde ase umâ-yabulih-tan-taama inkih kataateeniih, xeet kee cooxuk bicsen duyyeeyah qibaadat gacen. YALLI isih taahir abe Qibaadah-Qari nadaasa aben.

¹⁵ Ken kaxxa abbobtiy oson akak radeenihiyya aqbuduk sugte Dagelti fiiruk geerah nabuwwa keenih ruubak sugeeh; too nabuwwa kulli way keenit takku waytam naharal elle keenih warisak sugte. YALLI too nabuwwa keenih akah ruubak sugem, ken kee isi Qibaadah-Qari baatik cata'gidik ten.

¹⁶ Takkay immay Yalli ruuba Yallih farmoytiitil asuuluk keenil anqaasakaay Yallih yab maaqilak sugen. Ellecabol YALLIH naqabuy kaxxam gibdihiyya keenil oobeh; kay naqabuk num macattiiminna.

¹⁷ YALLI Baabelon-malikiy qeebit ken selu waahiyya keenit ruube. Too malik furrayna sella keenik heeh Yallih Qibaadah-Qarih addal sugte furraynah agantah sella keenik hee. Qunxa num takkuu, idoolite num takku, lab-num takkuu, say-num takku, num keenik macabinnaay, numuh keenik maracmatinna. Yalli makkook ta malikih gabal ken hee.

¹⁸ A malik Qibaadâ-Qarih addal sugte duyye kee, a qarik makaadanal sugte duyye kee, malik Xidkiyah buxal sugte edderra heemik tu macabinnay dannabah Baabelon fan orbise. Kay gubal sugte doolat abbobtih buxaaxi kaadu buubeeh, tonnah kaadu dannabah bee.

¹⁹ Magaalat maroh sugte gasoosa bututtukka hee. Magaalaay, Yallih Qibaadah Qariiy, magaalal suge doolat-buxaaxi kee addal akak sugte duyye cararise.

²⁰ Rabak raaqe mara Baabelon rasu fan seewah orbiseeh; tokkel Fursi-malik reedda 'yam fanah, Baabelon malik kee kay marih gubal ken akdamuk sugen.

²¹ Nabi Ermiyaas iyyem tonnal tunguddube. Too nabi ah keenit akkelem duma keenih warseh suge. Iyyeemihii, «A baaxol malcina-tabanih sanatah num dabaaqah elle magacaay, baaxo affoofele» 'yaanam iyyeh yen. Tonna leemiik abak suge ween affoofiyyi yanguddube'gidih, baaxo taamak toffoofe.

KOORIS YUUDÂ-MARAK «ISINNI BAAXO UDUURA» IYYE

²² Duma Nabi Ermiyaas, «YALLI annah tanim abele» axcuk edde yaabeh sugem numma takke'gidih, Fursi-malikiy Kooris deqsitahiyya edde dardaare naharsitto sanatat, isi baaxol enna 'ya marah farmo warsaana'gidih, sinam ruube. Kaadu, warkatal too farmo yuktubeh ruube. Toh abaamih fayxi kaat haytem, YALLA.

²³ Too warkat axcuk teneemih, «A warkatal yan amri taceem, yooy Kooris migaq leeh Fursi-malik kinnihiyya. YALLAY qaraanal yan Dagelta kinnihiyya inkih yan baadak abba yoo abeeh; Yuudâ-rasuk Yarusalaam magaalal kay Qibaadah-Qari xisaamih abbootan yoh yecee. Tonna'mmay ta saaku YALLIH maraw, tokke gexaay; YALLI muquk sin beyay» 'yaanam elle ten. Taham akkelem kaadu YALLI dumaak nabi Ermiyaas afat warseh suge.