2 Aydaad 34 - NABUWWA KEE MALIKWA

YOOSIYAAHU DEQSITA YUUDÂ MALIKI

¹ Yoosiyaahu naharak Yuudâ malik yekke saaku bacra karmat yen. Soddom kee inki sanat Yarusalaamal malikih suge.

² YALLI kicna taama abak yen. Isi kaxxa abba Dawuduk kaxxih Yallih gita kataatak yeneeh, agaagul sinnim Yallih xinto intam abak yen.

YOOSIYAAHU BAAXO TAAHIR ABE

³ Malik yekkeemih bacarhaytô sanat gufe saakuy qunxa furraynuh yanihiyya isi kaxxa abba Dawuduk kaxxih, Yallih qibaadat gace. Affara sanatak lakal, diini-maleela qibaada elle abak sugte aroocay fayyat raqtahiyya baysam qimbise. Aseera deqsittaamay yaqbudeenihiyyah astah heenih sugen gurumuuda kee, tohuk kalah tan duyyeeyay Yallih aftok aqbuduk suggu 'yeenihiyya baysam qimbise.

⁴ Baqal akak iyyaanamay yaqbudeenihiyyah heenih sugen sadgatih arooca kee too aroocak garil sugte qaydarus elle qeerisan mansafwa, kay foocal, bayissaay bututtukka heen. Aseera deqsittaamay yaqbudeenihiyyah astah heenih sugen gurumuuda kee, wohuk kalah tan duyyeeyay xeet kee cooxuk bicseenihiyyay Yallih aftok aqbuduk sugeenihiyya bututtukkay riira abba heenik wadiril, woo duyyeh qibaadah sadgat abak suge marih kabril caxen.

⁵ Woo duyyeeyay yaqbudeenihiyyah seekah luk sugen marih lafoofi kaadu woo duyyeh qibaadah sadgat elle abak sugen mansafwal cararisen. Tonnah abak, Yoosiyaahu Yuudâ rasu kee Yarusalaam duma akah suge taahiriino gacse.

⁶ Tohut macabinnaay, a taahiriino bisoh beyak, Manasse kee Efrayim kee Simqaan kee, tonnah kaadu, Naftaalî rasuk kilbat le kabut raqta baaxoh amma 'yaanam yan rasu fan enna 'ta magaalooli kee aroocal sugga 'te duyyeeyay Yallih aftok aqbuduk sugeenihiyya bayseh.

⁷ Inkih tan kilbat le kabut raqta Israayil baaxol sugga 'te duyyeeyah heen sadgatih-aroocak kee, Aseera deqsittaamay yaqbudeenihiyyah astah heenih sugen gurumuuda kee, gabak bicsen duyyey yaqbudeenihiyya bututtukkaay riira abba hee. Too duyyeh qibaadah qaydarus elle qeerisak sugen arooca kaadu riira abe. Tohuk gaba kale waqdi, Yarusalaam magaala fanah yuduure.

CILKIYYA YALLIH AMRI ELLE YAN KITAB GEE

⁸ Malik yekkeemih taban kee bacarhaytô sanat gufe saaku, inkih tan baaxo kee YALLIH Qibaadah-Qari taahir abeeh; sugga 'te duyyeeyay Yallih aftok aqbuduk sugeenihiyya ragid cabsiiseh. Tohuk gaba kale waqdi, YALLIH Qibaadah-Qari nagay bicsaana'gidih, sidiica num ruube. Too sidocuy ruubehiyya Axalyaahû-Safan kee Maqseyaahu deqsita numuy Yarusalaam magaalak xintoh abbah yenehiyya kee Yowaacád-Yowaca deqsita numuy tikki 'taamah kutbeh abeenah yanihiyya ruube.

⁹ Leewih yooboke maray Yallih Qibaadah-Qarit dacayrih sugehiyya wokkel gaaboyse lakqo Cilkiyya deqsita kaxxa seekih gabal heen. Too lakqo akak gaaboyseenim, Efrayim kee Manasseey raqqa 'te kilbat le kabut raqta baaxo kee, tonnah kaadu, Yuuda kee Benyam kee Yarusalaam magaalah marak ten.

¹⁰ Sarrak a lakqo Yallih Qibaadah-Qarih bicsa gabal akak heen maral yeceen. Too mari too lakqo qari bicsa marah yeceen.

¹¹ Cooxuk duyye bicsa mara kee Yallih Qibaadah-Qari xeetik bicsa maral yeceeniih; too mari xeet edde xaamen. Cooxuk duyye bicsa mari kaadu Qibaadah-Qari bicsan coox edde xaamen. Yoosiyaahuk duma sugte Yuudah malikwa, a qari edde xisen xeet kee coox gaba kaltem abalih tibbat sugen.

¹² A qarih xisne abe mari amaanat kee digga le marak ten. Leewih yooboke marak affara num oson aben taamak amo wagitak ten. Too affara numuk namma num migaaqah Yacat kee Qobadya deqsitak ten. Maraari deqsita gulubuh aabakuk yenen. Gersi namma numuh tu gactekiiy, migaaqah Zakariyya kee Masullam deqsitak yenen. Kohat deqsita gulubuh aabakuk yenen. Leewih yooboke mari yakkeemiik fayla wagga haytaamal dudda le ixxiga le marak ten.

¹³ Wohuk kalih mariy Leewih yoobokehiyya xisne edde aban duyyeh beyto kee, mango qaynatah tan taamat yan marih amô-wagittot yenen. Wohuk kalah yan mari kaadu taamak tekkeemih kutbe kee Qari dacayrit yenen.

¹⁴ Ayrok teena duyye edde daanisan golik lakqo ayyaaquk sugen waqdi, Cilkiyya YALLIH xintoy Yalli Muusal oobisehiyya elle tan kitab gee.

¹⁵ Too waqdi malik-buxak kutbe-abeenah yen Safan deqsita numuk iyyeemih, «Yallih xinto elle tan kitab Qibaadâ-Qarih addal gee» iyyeeh; sarrak woo kitab kaal yecee.

¹⁶ Safan woo kitab malikil bee. Malikik iyyeemih, «Kok gubal yan mari atu keenik aba intem abeeniih,

¹⁷ YALLIH Qibaadah-Qarih addal sugte lakqo beeniih, taama aba mara kee ken taamak amo wagita marih gabal heen.

¹⁸ Cilkiyya kitab geeh, woo kitab kol baaheeh; ah kaa» inxicca 'yeeh kitaabal tenem malikih yikriye.

¹⁹ Malik a kitab iyyam yoobbe waqdi, hagga 'yeh wariggah saro isik edde qanxise.

²⁰ Sarrak ahaak gubal yan amri, Cilkiyya deqsita numuy seekih yenehiyyaay, Safan baxa Acikam kee, tonnah kaadu, Miikayhu baxa Qabdonuuy, malik buxal kutbe-abeh suge Safan deqsita num kee malik buxal malik kaadintuh yen Qasaaya deqsita numul yecee.

²¹ Keenik iyyeemih, «Gexay yoo kee Yuuda kee Israayil ummattal tanim naaxige'gidih, YALLAL fayu yoh essera. A kitaabal taniimih maqna nagay ismitay ama. Ni kaxxa abbobti a kitaabal yan Yallih yab abe weenimih sabbatah, YALLAK naqbi nee geeh yan.

²² Cilkiyya kee too mari, malik keenik elle iyye'nnal, Culda deqsitta barray nabih tenehiyyay Yarusalaam magaalak qusbih xisen exxal buxa luk tenehiyya fan gexeeniih fayu esseren. Tet baqli Sallum deqsitak yeneeh, kay abbak migaaqah Tikwa axcuk yenen. Kay abbah abba Carcas deqsitak yen. Sallum Yallih Qibaadah-Qaril edde gacan sartanak amo wagitak yen. Too mari ta nabih tan barra fan yemeeteenih malik keenil ruube farmo teetih warsen.

²³ Too waqdi is keenik inteemih, «Malik fanah uduuraay, YALLAY Israayil doore Dagelta kinnihiyyak obtem kaah warisa.

²⁴ ‹Yarusalaam kee teetil yan mara digaaleyyo. Ama kitaabay koh yikriyeenihiyya elle inta'nnal bala oobiseyyo› iyyah yan.

²⁵ Kalah kaak intaanamahaa, ‹Toh akah abu waam, oson yoo cineeniih, xeet kee cooxuk isinni gabak bicsen duyye yaqbudeeniih; anu inqibba haam aban. Yi naqbi Yarusalaamal oobeh ikkal, ahaysa maxamaca› 'yaanam iyye kaak inxica» inte.

²⁶ Qagitteh, «Malik tiyah tu gactek, YALLAY Israayil doore Dagelta kinnihiyya kaak iyyaamahaa, ‹Atu a kitaabih yab oggolteeh,

²⁷ toobitteeh, yoh rammitte. Yarusalaam kee Yarusalaam maral baahu waam toobbe waqdi, nadaamah sara isik qanxisseeh weqteh. Too waqdi abteh tan dooqa kok oggoleh.

²⁸ Tonna-leemiik Yarusalaam magaala kee teetil yan marat abu waah an digaala atu addunyal tanim fanah maaba. Atu tanim fanah ku baaxo amaanah xiineleeh; amaanah koo xiiniseyyo› 'yaanam YALLI kaak iyyem kaah warisa» 'yaanam farmoh keenil gacisse. Too mari too farmo luk malik fan yuduure.

YOOSIYAAHU YALLIH AMRI OGGOLUH XAGANA CULE

²⁹ Sarra ta farmo yoobbe waqdi, Malik Yoosiyaahu, Yarusalaam kee Yuudâ rasuk abbobtih yan marah farmo ruube.

³⁰ Too mari yemeete waqdi, gabat ken luk YALLIH Qibaadah-Qari fan gexen. Ken lih seeka kee Leewih yooboke mara kee raqqa 'te ummatak gaddaliiy baacoyta axce'kal yakkeenimiik, inkih tokke gexen. Too ummat inkih elle gaabowte ikkel malikii, a kitaabay Qibaadâ-Qaril geytimahiyyal yan yab keenih yikriye.

³¹ Sarrak malik elle soola qamiddih garil solla 'yeh, «YALLIH amri oggoluh, Yalla kee xagana culah an. Too kitaabal elle enna 'ta innal, YALLIH xinto kee amri inni afqado kee dudda haamal abeyyo» 'yaanam axcuk qahdi cule.

³² Benyam mara kee Yarusalaamal suggu 'ye mara aham abu waamah xagana culse. Tonna leemik Yarusalaam mari Yalli ken kaxxa abbobti lih heeh yen qahdih faxximma 'taamah amrisimen.

³³ Malik Yoosiyaahu Israayil mari bicseh suge xeet kee cooxuk bicsen duyyey ableh umahiyya ken rasul bayseh. Isih addunyal suggu 'yem fanah ummatak, «YALLA uqbuda» axcukuuy, ken kaxxa abbobti doore Dageltah fan ken gacse.