2 Aydaad 33 - NABUWWA KEE MALIKWA

MANASSE DEQSITA YUUDÂ MALIKI

¹ Manasse malik yekke saaku qumrik taban kee namma karmat yen. Sarrak Yarusalaam magaalal kontom kee koona sanatah malikih suge.

² Manasse, Israayil-mari yamaateemik naharal woo baaxol suge maray YALLI yeyyeeqehiyya edde asak sugen umâ-yabulih-tan-taama kataateeh; YALLAL dambi lem baahe.

³ Kay abba Ciskiyyaahu bayseh suge aroocay diini-maleela qibaadah luk sugtehiyya wadir nammeyhaak bicse. Baqal elle yaqbudeeni'gidih sadgat elle aban arooca bicse. Aseera deqsittaamay yaqbudeenihiyyah astah heenih sugen gurumuuda soolise. Manasse cutuuka kaadu edde aqbuduk yen.

⁴ YALLIH Qibaadah-Qarih addal, diini-maleela taqbudeemih sadgat elle aban arooca bicse. Woo sadgat arooca elle bicsem, YALLI duma, «Yarusalaamal kulli way yi qibaada elle takke'gidih doore araca» akak iyye aracak ten.

⁵ Qibaadâ-Qarih-gasok adda le kabuk namma daaratal inkih, cutuuka elle yaqbuden arac bicse.

⁶ Girat isi lab-xaylo sadgatah Hinnom-Goloh addal qide. Ramli qidiyya kee sicri taamah haysiteeh, ginnili kee kalluwallel takku-waytam essere. YALLAL kaxxa dambi lem baaheeh; YALLIH naqbi kay sabbatah lafitak lafte.

⁷ Yallih Qibaadah-Qarih addal gabak bicsen ceeloy yaqbudeenihiyya hee. Woo ceelo elle heem, Yalli Malik-Dawud kee Suleemanak, «Yi qibaada kulli way elle takke'gidih, Israayil taban kee namma kedo elle tan rasuk inkih Yarusalaam addak doore araca» akak iyye aracak ten.

⁸ Yalli Dawud kee Suleemanak iyyemii, «Israayil mari inkih Muusay yi naqasuh yanih gabat keenih ruube amri oggoleenih too xinto intam abeenik, ken kaxxa abbobtih ecee baaxok ken mayyaaqa» 'yaanam iyye.

⁹ Takkay immay Manasse, Yuudâ mara, duma woo baaxol suge maray YALLI ken taagah woo baaxok yeyyeeqehiyya abak sugen dambik lafita dambit ken asise.

MANASSE ABE TOOBITIYYA

¹⁰ YALLI, Manasse kee Manassê-marak, «Ahat maasina» 'yaanam iyyeh immay, oson woh moggolinnon.

¹¹ Tonna-leemiik YALLI Assuuriyah qaskarih abbobti Yuudâ rasu akah yabbixen innah abe. Too mari Manasse yibbixeeniih, sanat santiita kaak hayyaay nacaasak bicsen silsilatat uxuyya kaa heenih, Baabelon rasu fan kaa been.

¹² Tokkel too marih gabat biyaakite saaku, YALLAY kaak duma usuk akak rade kay kaxxa abbobti doorehiyyah rammiteeh, isi Dageltal yuduureeh catoh kaa kallace.

¹³ YALLI, Manasse abe dooqa oggoleeh, Yarusalaamal akah suge malikih gaca'gidih, Yarusalaam fan kaa gacse. Tohuk gexxaamah Manasse, YALLI dibuk Yalla kinnim yeexegeh.

¹⁴ Tohuk lakal Manasse, Dawud-Magaalak irol ayrô-mawqa le kabut raqta baaxol goloh addal yan Gicoon buyyik xabba haanamaay Kullum-Culma deqsita arac kee, magaalak Qoofal deqsitta exxah deraafih amma 'yaanam tan baaxol sugte gasoosa yuqusbuuseeh; xexxaarah duma akah sugte innak fayya hee. Yuudâ-magaalooliy gasoosa maroh edde tanihiyyal inkih dacayrih qaskar-abbobti hee.

¹⁵ Yallih aftok aqbuduk suggu 'yen duyyeeya kee gabak bicsen ceeloy Yallih Qibaadah-Qarih addal isih heeh sugehiyya wokkek kaleh. Kalah kaadu, diini-maleela taqbudeemih sadgat elle aban aroocay Qibaadâ-Qari elle yan koomah amol tenee kee, tonnah kaadu, Yarusalaamak gersi aroocal tenehiyya wokkek kaleh. Woo duyye magaalak iroh eyyeqqa heeh baaxot qide.

¹⁶ YALLAH sadgat elle aben mansaf yuqusbuuseh. Tokkel amaanah xiinaanamih astah aban sadgoota kee YALLAH fayla elle gacsa sadgoota abe. Yuudâ-rasih marah inkih YALLAY Israayil doore Dagelta kinnihiyya uqbuda 'yaanamih amri yaceen.

¹⁷ Ummatta Yallih Qibaadah-Qarik kalih aroocay fayyat raqtahiyyal sadgat abak sugteh immay, YALLIH migaaqal abak sugen.

MANASSE-REEDAK ELLECABO

¹⁸ Wohuk kalah taniimiy Manasse abehiyyak Yalla fan abe kallaci kee YALLIH migaaqal kaa'lih yabte nabuwwah qangor inkih Israayil-Malikwah-Aydaadih kitaabal tan.

¹⁹ Malik Manasse abe dooqa kee Yalli woo dooqa kaak elle oggole'nnaay; toobitaamak duma dambi kee umaanek abeh gide inkih Nabuwwah-Aydaada deqsita kitaabal yan. Usuk toobitaamak duma, bicsiiseh suge diini maleela qibaada elle abta aroocay fayyat raqtahiyyaay, Aseera deqsittaamay yaqbudeenihiyyah astah heenih sugen gurumuuda elle soolise arooca kee, gabak bicsen duyyeeyay yaqbudeenihiyya elle hee arooca inkih, kaadu woo kitaabal yan.

²⁰ Manasse rabe saaku malikwâ-gasol kaa yoogoqen. Kay aracal kay baxay migaaqah Amon deqsitahiyya malik yekke.

AMON DEQSITA YUUDÂ MALIKI

²¹ Amon Yuudâ-rasul malik yekke saaku qumrik labaatanna kee namma karmat yen. Yarusalaam magaalah addal namma sanatah malikih suge.

²² Amon isi abbah raatat gexak, YALLAL dambi lem baahe. Kay abba aqbuduk suge xeet kee cooxuy gabak orra heenih bicseenihiyya inkih yuqbude.

²³ Takkay immay kay abbah innah, rammita numuy YALLA fan yaduurehiyya makkinna. Dambi abittoh isi abbak lafitta axcuk suge.

²⁴ Amon gubal saqoltih yan mari kaa qidaamal malse. Too mari ayrok teena malik isi qaril yan waqdi, amma 'yeenih kaa qiden.

²⁵ Yuudâ-mari kaa qidaamal malse mara inkih qideeniih; kay baxa Yoosiyaahu kay lakal malikih heen.