2 Aydaad 32 - NABUWWA KEE MALIKWA

ASSUURIYAH MARI TIRTIRA ABE

¹ Ciskiyyaahu Yallah ahim baguuk abak sugek sarra, Assuuriyah malikiy Sanceerib deqsitahiyya Yuudâ-rasu warare. Gaso maroh edde ten magaaloolit maro hayya heeh sarrak, qaskarak, «Woo magaalat maroh tan gasoosak iggilaay addah cula» iyye.

² Ciskiyyaahu, Sanceerib Yarusalaam yabbixem faxam yuble waqdi,

^3-4 kaa kee kay gubal taamita mari magaalak irol sugte buyyitte inkih alfeeh, darah oobak sugte lee kaadu oobe kale. Woh akah abeenim, Yarusalaam magaala xayyowwa haan waqdi lee akah gee waan innah keenik aben. Malik Ciskiyyaahuh gubal taamita, mari mango mara is lih hayya heeh, magaalak iroh gexxa leelwah raceynaani inkih alfeenih. Tohuk gexxaamah lee magaalak afah gexak maraaqinna.

⁵ Sarrak Ciskiyyaahu magaalat maroh tan gasoosa yuqusbuuseeh; woo gasoosah amol fayya le aroocay xeri'kkel tanim akak yableenihiyya bicse. Kalah kaadu magaalat qusba gasoosa maroh hee. Too magaalah koosit tonnal abe. Yarusalaamak ayrô-mawqa le kabut raqta baaxoy ramma luk sugtehiyyal burtak kibakaay, koositih xiseenih sugen arooca yuqusbuuseh. Toh lih kaadu gob kee silaacak mangom bicsiise.

⁶ Ciskiyyaahu kaadu, magaalal yen mari ken abbootanih gubat gacoonuh, qaskar abbobti doore. Too marah inkih magaalak culmak bacarih yan aracal seeco abeeh, tannah axcuk ken agiirisak yen. Keenik iyyeemih,

⁷ «Abtaanamal digga 'xicaay agaagul akak caba; Assuuriyah malik kee usuk miraacisa qaskarak mameysitinaay niya haysita. Kay qaxat yan marak ni qaxat yan mari qandeh yayse.

⁸ Usuk catoh sahdaytu leeh; nanu catoh YALLAY ni Dageltah yani lino. Ni aftok qeebi neh abtu waytam kaa» keenik iyye. Ummatta ken malik a yaabat yaabam toobbe waqdi niya keenit gacte.

⁹ Sanceerib kee kay qaskar Laakis deqsitta magaalal yanin waqdi, ahak gubal tan farmo Ciskiyyaahu kee Yuudâ maray Yarusalaam magaalal kaa lih yanihiyyah ruube. Farmoh ruube abbobti keenik inteemih,

¹⁰ «Assuuriyah malikih yan Sanceerib siinik iyyaamah: Yarusalaam magaalay maro edde haynek addal yan maraw, amo elle miqtoonum macaay?

¹¹ Ciskiyyaahu, ‹YALLAY ni Dageltah yanihiyya Assuuriyah malik le qandek nee catele› siinik iyya'mmay, numma makkalina. Ciskiyyaahu sin ganam faxaah, bakar kee qululuh rabtaanam siinik faxa.

¹² Yallih sadgat elle aban arooca kee diyaarah arooca bayisseeh; sarrak Yuuda kee Yarusalaam marak, ‹Qibaada kee qerto qeerisiyya dibuk inki aracal aba› intem kaa» keenik iyyen.

¹³ «Yi kaxxa abbobtih daban kee yi dabaanal mango baaxoh maral bahnem maabbitoonuu? Assuuriyah malikih gabak isi mara catte yallitte maay tan?

¹⁴ Ta gid takke baaxooxah yallitte ni gabak ken mara catte saaku maay lee? Hay tonnal, sin yalli sin catelem mannal siinit celtaa?

¹⁵ Ciskiyyaahu sin duquuruse waay, gitak sin ayyaaqe waay. Kay yab maamanina. Assuuriyah malikih gabak ahaydumah faxe baaxoh yalli sinam macatinna. Tonnah kaadu a sin yalli catoh siinih xiqu waam mali» 'yaanam keenik iyyen.

¹⁶ Assuuriyah malik ruube abbobti, Dageltah yan YALLA kee kay naqasuh yan malik Ciskiyyaahuk wohuk gactam iyyen.

¹⁷ Assuuriyah malik kaadu YALLAY Israayil doore Dagelta kinnihiyya elle xaafa warkat yuktube. Iyyemii, «Mango baaxoh yallitte isi mara yok macatinnaay, tonnah kaadu, Ciskiyyaahuh yalli isi mara yi gabak macata» 'yaanam yuktube.

¹⁸ Kay qaskar abbobti kaadu anay fayya haak Qibraan afat, gidaaral suge mari meysita'gidiiy niya keenik taddigille'gidih, magaala xayuk akah culan innah, tonnah tanim keenik iyyen.

¹⁹ Yarusalaam cata Yalla kee, gersi mari yalla iyyeh yaqbudeemiy gabak bicseeni, inki intit yublen.

²⁰ Too waqdi Malik Ciskiyyaahu kee Amox baxa nabi Yasaqya Yalla kallaceeniih kaal weeqeeniih cato kaa esseren.

²¹ YALLI, malaykattu ruubeeh; woo malaykatti Assuuriyah qaskar abbobti kee qaskar qide. Assuuriyah malik tohut wacarriy kaa yibbixeeh, Assuuriya fan yuduure. Ayrok teena Assuuriyah malik, Yallih aftok yalla axcuk Yalla akke sinnim elle yaqbude qarih addal yan waqdi, kay xaylok tu seefit kaa qidde.

²² YALLI, Malik Ciskiyyaahu kee Yarusalaam mara, Assuuriyah malik kee gersi naqboytittek tonnal ken cate. Israayil ummatta ken cuggaaneh tan ummatta lih amaanah xiinise.

²³ Mango mari Yarusalaam fan Yallah sadgat baahen. Ciskiyyaahuh kaadu tuxxiq le mattaco baahen. Tohuk gexxaamah too ayrook wadir, kulli rasih mari Ciskiyyaahu assakaxxayuk raaqen.

CISKIYYAAHU LUK SUGE BIYAK KEE KAY KAXXIINA

²⁴ Toh edde tekke uddurut, Malik Ciskiyyaahu kaxxa biyaakah biyaakite. Rabi kaat xayyooweh suge. Too waqdi YALLA kallace. YALLI woo biyaakak qaffootu waam kaa taybulle asta kaah yecee.

²⁵ Tonna'mmay Malik Ciskiyyaahu YALLI kaah abeemil, YALLAH candu gacsaamak kaxxiiniteeh; tonna-leemiik kay kaxxiinah sabbatah, YALLI kaa kee Yuuda kee Yarusalaam baaxoh marat bagcarrite.

²⁶ Sarrak Ciskiyyaahu kee Yarusalaam mara YALLAH rammiteeniih; tonna-leemiik Ciskiyyaahu addunyal yanim fan YALLI woo ummatta madigaalinna.

CISKIYYAAHU LUK SUGE NABNA KEE GADDA

²⁷ Malik Ciskiyyaahu kaxxa gaddaali yekkeeh; ummatta kaxxam kaa tessekexxe. Dahab kee lakqooy bilqah haan xeetiy limo gibdihiyya kee caxâ-sifa akak inxicca 'yaanamaay goobwa kee kalah kaadu raqqa 'te duyye elle daanisan golitte bicsiise.

²⁸ Toh lih kaadu, darooy, qinab xaylok bicsen kamri kee, caxâ xaylok bicsen *zeyti (saliid) inkih edde daanisan makdan bicsiiseh yen. Laa edde gaca arac rikeek luk yen. Tonnah kaadu illih hee gaso rikek luk yen.

²⁹ Yalli kaxxam mango gadda kaa yeceeh yeneeh; tohih sabbatah mango magaalooli xiseeh, laa kee illiiy gersi midir xaame.

³⁰ Ciskiyyaahu Gicoon buyyih leek daga raqta afa aliffa heeh, woo lee dagga hee caraatak Yarusalaam magaalah gidaarittek adda gacca 'teh darah akah gexxa innah abe numuk ten. Usuk abba heem inkih kay gabal bicteh.

³¹ Baabelon rasuk temeete farmoytit woo baaxol tekkeemiy duma suge waytehiyya esseraana'gidih yemeeten saakuuy kinnih, Yalli usuk kinni num yable'gidih, isih faxem abitay, kaa iyye.

³² Wohuk kalah taniimiy Ciskiyyaahu abehiyya YALLAH abe qibaadah agantah, Amox-Yasaqya Yuble Wacyih Kitab kee, Yuuda kee Israayil Malikwah Aydaadih kitaabal tan.

³³ Ciskiyyaahu rabe saaku malikwa elle yaaguqen aracak fayya le aracal kaa yoogoqen. Usuk rabe saaku inkih tan Yuudah ummatta kee Yarusalaam mari inkih kay magaqah massakaxxah yemeete. Kay aracal kay baxi Manasse malik yekke.