2 Aydaad 31 - NABUWWA KEE MALIKWA

MALIK CISKIYYAAHU UMMATTA DIINI GITAH GACSE

¹ Qiid gaba kalek lakal, tokkel suge Israayil mari yakkeemiik, Yuudâ rasul enna 'ta magaalooli fanah gexeeniih, taahirik tan qamidwa akak iyyan qamidway xeetik bicseenihiyya yiggiggileh. Aseera deqsittaamay yaqbudeenihiyyah astah heenih sugen gurumuuda bututtukku heeniih, sadgat elle aban arooca kee Yalla maleela qibaada elle abak sugte aroocay fayyat raqtahiyya bayseenih. Raqqa 'te Yuudah-baaxol inkih tonnah tanim abeeniih; tohuk kalah kaadu, Benyam kee Efrayimiiy Manassê rasul inkih, tonnah tanim aben. Tohuk gaba kalen waqdi, isinni buxaaxih yuduuren.

² Ciskiyyaahu, seeka kee Leewî mara mango ikkel kurra heeh, kulli marahaay aboonu waan rikek tan taama keenil yecee. Tohumuu, cararisan sadgat xayyoosaanam kee, laa kee illi mattacoy amaanah xiinaanamih astah qidaanahiyya xayyoosaanamaay, YALLIH Qibaadah-Qarih addal aban qibaadat yangaleenimiiy, woo Qibaadah-Qarik mango culmal Yallah fayla kee candu gacsaanam taamah keenih yecee.

³ Ciskiyyaahu isi illi kee wadarak, kulli maaca kee magrib waqla, cararisan sadgatah qidan saq acayuk yeneeh; tohuk kalah kaadu sabti ayroh qiid kee alsi bila saakih qiidiiy; tonnah kaadu gersi qiidway Yallih xintol tanihiyyah inkih sadgatah saq acayuk yen.

⁴ Malik Ciskiyyaahu kaadu Yarusalaamal yan marak iyyeemih, «Seeka kee Leewî-mari kulli waqdi Yallih xinto aba inta taamat akah gacan innah, keenih taguude galto keenih baaha» iyye.

⁵ Yarusalaam mari toh yoobbe waqdi, sissikuk darok tayse daro kee qinabaay saliidiiy malab kee buqreh addal ubukka 'ye murtik tayse exxa keenih yeceen. Tonnah kaadu, isinnih luk suggu 'yeenimik taban haytoh af inkih keenih yeceen.

⁶ Yuudâ magaaloolil suggu 'ye mari isinnih luk sugen laa kee illik taban haytoh af kaadu keenih yeceen. Toh lih kaadu, YALLIH migaaqal mattacoh rikeek daaniseenih sugen duyyek taban haytoh af keenih yeceen. Too duyye ittin amol haak koomâ-gide aben.

⁷ A mattacoh macuw sidochaytoh alsa tekke saaku baahaanam qimbiseenih, affara alsa baahak sugen.

⁸ Malik Ciskiyyaahu kee kay gubal taamita mari, mattacok tontocowweh gide yublen waqdi, YALLA fayliseeniih kay mara kaadu fayliseenih.

⁹ Malik, seeka kee Leewî-mara «Mattacok sittin bagul haak koomâ-gide akah raqtem macaay?» ken essere waqdi,

¹⁰ Saadukuk rade kaxxa seekiy migaaqah Qadarya deqsitahiyya kaak iyyemii, «Ummatta mattaco YALLIH Qibaadah-Qari bahteemih sabbatah, maaqok duddam taniih fultem kaadu elle tan. YALLI isi marat barkat heemih sabbatah, taham inkih raqteh tan» iyye.

¹¹ Tonna-leemiik Malik keenik elle iyye innal, YALLIH Qibaadah-Qaril duyye edde daanisan arac bicseeniih;

¹² ummatta elle haytaamak mattaco kee tabanhaytoh af tokket daanah keenih hayte. Too duyyek dacayrih abbah Konanyaahu deqsita Leewih yooboke num heeniih; kay gubal kay toobokoytay migaaqah Simqi deqsitahiyya heen.

¹³ Ken gubal taamitu waa Leewih yooboke labhak tabna num heen. Woo mari migaaqah Yaciyel kee Qadadyaahu kee Nacat kee Qasahel kee Yerimot kee Yoodabad kee Alyel kee Yismakyaahu kee Macat kee Banaaya deqsita marak ten. Tah inkih absissem, Malik Ciskiyyaahu kee sek Qadarya deqsita kaxxa seekih yen numuk ten.

¹⁴ Leewih yooboke Imna deqsita numih baxay migaaqah Koore deqsita Yallih Qibaadah-Qarik ayrô-mawqa le kabut raqta afa dacrisak yeneeh; Yallih migaaqal baahan mattaco kee wohim elle kuran innih abbootan usuk luk yen.

¹⁵ Gersi magaalooliy seeka elle sugtehiyyal too taamal Leewih yooboke mari meqe'nnah kaa cate. Too maray kaa catehiyya migaaqah Qadan kee Minyaamin kee Yaasuwa kee Samaqya kee Amarya kee Sekanya deqsitak yen. Oson, keenik taama elle tani'nnal, keenik kaxxih Leewih yooboke marak qunxam kee kaxxaamak tu raaqe'kal, maaqo missal keenih meklen.

¹⁶ Oson labhak karmak soddomut yan mara kee wohuk fula le maray Yallih Qibaadah-Qarih addah taama kulli saaku luk yenehiyyah, oson luk yenen taamah caddol, inkih ken afto keenih yecee.

¹⁷ Seeka isi taama gulub-gulubul baxsimma 'teh abak sugteeh; Leewih yooboke marah tu gactekiiy, qumrik labaatanna gufeenik sarra, butta-buttah gacca 'yeenih abak sugen. Too marah inkih ken afto yecee.

¹⁸ Oson yakkeenimik, isinni kee isinni xaylooy agabu migooqa isinnik yuktubeenih; toh akah abeenim, woo mari inkih imaanak gexxaamah taahirik isinni abbaxuk sugeenimik ten.

¹⁹ Tonnah kaadu, too mari ken magaaloolik dariifal tan gaandoodil sugte seekay Haaruun abuusat loowoh yanihiyya kee, Leewî-kedoh yooboke maray migaq akak yunkuttubehiyyah inkih maaqo yaceenimih taama luk yen.

²⁰ Ciskiyyaahu inkih tan Yuudâ-baaxol YALLAY kay Dagelta kinnihiyya kicnaah kay garil cakkik loowinta taamah taamite.

²¹ Usuk, Yallih Qibaadah-Qarih abba haa taama kee Yallih xinto elle inta'nnal abe taama inkih, isi Dageltah baguuk abak yeneeh; kalah kaadu Yallih qibaadat dibuk yan numuk ten. Tohuk gexxaamah abinnaan taama inkih missat kaah gacte.