2 Aydaad 30 - NABUWWA KEE MALIKWA

ELLE-TATRIYYI-QIIDIH BICA

^1-3 Ummatta Elle-Tatriyyi-Qiid naharsi alsay kaa elle abeh meqehiyyat abaanam maduudinnon. Woh akah takkem, seekak faxxintah gide taahirik masuginnaay; tonnah kaadu Yarusalaamal mango mari gaabooweh masuginna. Tonna-leemiik Malik Ciskiyyaahu kee kay gubal taamita mara kee raqqa 'te ummatta, woo qiid ciggiila alsat abaanamat caben. Too waqdi Malik Ciskiyyaahu inkih tan Israayil kee Yuudah ummattah farmo ruube. Efrayim kee Manasse kedoh meqe innal yuktube warkat ruubeeh iyyeemih, «Yarusalaamal yan YALLIH Qibaadah-Qaril YALLAY Israayil doore Dagelta kinnihiyyah nabna edde kassinna Elle-Tatriyyi-Qiid abna'gidih ama» 'yaanam keenih yuktube.

⁴ Malik kee raqqa 'te ummatta ahamah aben mala isinnik nabam yossokooten.

⁵ Tonna-leemiik inkih tan Israayil ummattay kilbat le kabuk Daan deqsita rasul taniiy gabbi-qaxak kaadu Bersabaq deqsitta magaalal tanihiyyak num raaqe'kal, Muusal obte xinto elle inta innal, woo qiidih asaana'gidih, duma akkuk amaatuk sugeenimik manguk akah yamaaten innah, farmo keenih ruuben.

⁶ Farmoh ruuben mari, malik kee malik gubal taamita mari keenik elle iyye innal, inkih tan Yuuda kee Israayil rasu gexeeniih; yuktuben warkat akriyuk, keenik iyyeenimih, «Israayil maraw, YALLAY Abraahim kee Iscaakaay Yaqkuub doorehiyyal uduura; toh abteenik, siiniy away Assuuriyah marih gabak cate mara kinnihiyyal aduurele.

⁷ Sin kaxxa abbobti kee sin innah yan Israayil mari akah suge innal, YALLAY sin kaxxa abbobti doorehiyyal imaan sinni mara makkina. Isin akah tablen innah, YALLI wohuh ken uma'nnah digaaleh.

⁸ Oson akah sugen innal, aabbe cina mara makkinay; YALLIH amri oggola. Away Yarusalaamal yan Qibaadah-Qariy YALLI kulli way taahir abehiyyal ama. YALLIH bagcarrak cattintaana'gidih, kaay sin Dagelta kinnihiyya uqbuda.

⁹ YALLAL tuduureenik, sin mara seewah bee mari keenih xuwaaweleeh, isinni buxah yaduuroonay ken axcelon. YALLI maqaane kee racmatta le Yallaay; kaal tuduureenik, sin oggolele» 'yaanamih farmo keenit waden.

¹⁰ Farmoh ruuben mari too farmo Efrayim kee Manassê-kedoh rasul tan magaalooli kee Dablon kedoh rasuk kaadu kilbat le kabuh amma 'yaanam yakke marah inkih warsen. Takkay immay too mari too farmo yoobbe waqdi, asal kee furkacatah ken haysite.

¹¹ Takkay immay Aaser kee Manasse kee Dablon kedoh addak tu yakke maray YALLAH rammitehiyya gexe. Too mari farmo oggoleh Yarusalaam fan gexe.

¹² Yalli, Yuudah ummatta titta geyya hayteh usuk faxam abtuuy, malik kee malik gubal yan marih amri edde duudussa digga keenit hee.

¹³ Nammeyhaytoh alsat Kamiir-Sinni-Gaqamboh Qiid abaana'gidih, Yarusalaamal mango mari gaaboowe.

¹⁴ Woo mari, Yarusalaamal sugga 'te mansafittey sadgat elle abak sugeenihiyya kee, tonnah kaadu, qaydarus elle qeerisak sugen mansafitte inkih beyya heenih Kidroon-Goloh addat qiden.

¹⁵ Elle-Tatriyyi-Qiid edde aben nammeyhaytoh alsak taban kee fereyhaytoh ayro, qiddi sadgatah marqa qiden. Seeka kee Leewî-marak taahirik keenik suge wee mari wohut wacarriyeeh, tonna-leemiik isinni taahirik hayya heenih, YALLIH Qibaadah-Qarih fooca le kabul cararisen sadgat baahen.

¹⁶ Too waqdi Muusay Yallih num kinnih xinto elle inta innal, Yallih Qibaadah-Qaril kulli way elle gacoonu waan arac haysiten. Leewî-mari sadgatah qiden saqih qabala seekal yeceeniih; seeka woo qabala sadgat elle xayyoosan aracal caxxe.

¹⁷ Mango mari taahirik manannaay; tonna-leemiik sadgatah baahen saq qidaanam maduudinnon. Tohih sabbatah Leewî-mari woo saq keenih yusguude.

^18-19 Toh lih kaadu Efrayim kee Manasseey Issakar kee Dablon kedoh yooboke mari taahirik suge weemih sabbatah, Elle-Tatriyyi-Qiidih maaqo, kitaabal elle ane wayta innal, yokmen. Malik Ciskiyyaahu too marah Yalla kallaceeh iyyeemih, «YALLAW, ni kaxxa abbobti doore Dageltaw, a mari taahirik ane waamah isinni baguuk koo yuqbudeemih sabbatah, isih lito maqaanet qafu keenih ab» iyye.

²⁰ YALLI, Ciskiyyaahu abe dooqa oggoleh. YALLI wohuk qafu keenih abeeh, tu keenil mabaahinna.

²¹ Kamiir-Sinni-Gaqamboh Qiidih Yarusalaamal gaaboowe mari woo qiidit malcina ayroh gide farci luk assakaxxuk sugen. Leewî-mara kee seeka kulli ayro YALLA baguuk faylisak sugte. Saareh yaaguren duyye kaadu meqe'nnal yoogoren.

²² Ciskiyyaahu, Leewî-mari YALLIH qibaadah taama elle aban innah ixxiga loonum keenik yuble waqdi, wohul ken fayliseh. Malcina ayroh gide amaanah xiinaanamih astah qidan sadgat abakaay YALLA faylisak sugeenik sarra,

²³ kaadu aki malcina ayro qiidih asaanamal malsen. Tonnal ruffa axcuk aben.

²⁴ Malik Ciskiyyaahu woo mari yakme'gidih, alfi awur kee illiiy wadarak kaadu tittat malcina alfih gide keenih baahe. Tonnah kaadu, malik gubal taamita doolat mari, alfi awur kee illiiy wadarak kaadu tittat tabna alfi takkem keenih baahen. Seekah mangom taahirrowte.

²⁵ Tonna-leemiik Yuudah ummattaay seekaay Leewî-maraay kilbat le kabuk yemeete mara kee gersi baaxoh maray Israayil kee Yuudâ baaxol dabqih yenehiyya inkih ruffu iyyen.

²⁶ Yarusalaam magaalah mari Dawud baxah yen Suleeman dabaanaak wadiril, annah tanim yubleh masuginnaay; tonna-leemiik kaxxam ruffa iyyen.

²⁷ Leewî-mara kee seeka a qiidih yemeete marat barkat gaca'gidih, Yalla kallacen. Too dooqa Yalli dabqih elle yan qaraanaak, keenik yoobbeehiiy keenik oggoleh.