2 Aydaad 29 - NABUWWA KEE MALIKWA

YUUDÂ MALIKIH YEN CISKIYYAAHU

¹ Ciskiyyaahu qumrik labaatanna kee konooyut yan saaku Yuudâ-malik yekke. Yarusalaamal labaatanna kee sagla sanatah malikih suge. Kay ina Abiyya deqsitak teneeh; Zakariyyak baxák ten.

² Usuk isi kaxxa abba Malik Dawuduk kaxxih, YALLI kicna taamat asak yen.

YALLIH QIBAADAH QARI ELLE TAAHIRROYSEN INNA

³ Ciskiyyaahu malik edde yekke sanatal, sanatak naharsi alsat YALLIH Qibaadah-Qari akak culan iro le kabut raqta culmah alfintitte fakka heeh bicsiise.

⁴ Qibaadah-Qarih daaratak ayrô-mawqa le kabut raaqa aracal seeka kee Leewi-mara gaaboyse.

⁵ Tokkel ken lih yaabeh keenik iyyemii, «Isin Leewî-maraw, siinik axcem yok oobbeya. Taahirik isinni haa; YALLAY sin kaxxa abbobti doorehiyya elle yaqbuden qari taahirroysa. Kay Qibaadah-Qari wassakossa haytam inkih wokkek kala.

⁶ Ni kaxxa abbobti YALLAY ni Dageltah yanihiyyal luk ten imaan cabeeniih; YALLI anqibinnaanim abak sugen. YALLA hawweeneeniih, kaa elle yaqbuden aracat darre caben.

⁷ Yallih Qibaadah-Qarih afa alfeenih, addal sugte faanuswa bargusen. Qibaadâ-Qarih addal qaydarus qeerisaanam kee cararisen sadgat yeceenim cabeenih.

⁸ Tonna-leemiik YALLI, Yuuda kee Yarusalaam magaalah marat bagcarriteeh; usuk keenil baahem kulli numut axaxo kee cunxo qidde. Isin ahim digga haytan.

⁹ Ni abbobti carbit rabteeh, ni agabu kee xaylo seewah been.

¹⁰ «Anu taway YALLAY Israayil doore Dagelta kinnihiyya net bagcarrite waa'gidih, bica kaa'lih abam faxa.

¹¹ Yi xayloy, tamahat isissika. YALLI kay taamat gacoonuuy, kay qibaada elle aban aracal taamitoonuuy, tonnah kaadu sadgat kaah xayyoosoonuh doorem siini» keenik iyye.

^12-14 Too saaku too gaabownal Kohat gulubuk Qamaasay baxi Macat kee Qadarya baxi Ayyuqelik ten. Maraari-gulubuk kaadu, Qabdi baxi Kees kee Yahalleleel baxi Qadarya sugte. Gerson gulubuk kaadu, Dimma baxi Yowac kee Yowac baxi Qadan sugte. Alixafan gulubuk kaadu, Simri kee Yaqwel sugte. Asaf gulubuk tonnah, Zakariyya kee Mattanya sugte. Heeman gulubuk kaadu, Yahuwel kee Simqi sugte. Yedutun gulubuk Samaqya kee Quddiyeel sugte.

¹⁵ Ta mari isi innah yan Leewih yooboke marah daffeyna hee. Aham keenih warseenih isinni kaadu taahirroyseenih. Sarrak malik keenik akah inxicca 'ye innah, YALLIH Qibaadah-Qari taahirroyseenih. Tohim Yallih xinto inte innal aben.

¹⁶ Seeka YALLIH Qibaadah-Qari taahirrossa'gidih, Qibaadâ-Qarih adda culteeh; taahir sinnuk sugtem inkih, woo Qarih addak daarat fanah yeyyeeqen. Leewî mari too duyye inkih tokkek magaalak iroh Kidroon golo fan been.

¹⁷ Wohimih taama qimbiseenim, sanatak naharsi alsak naharsi ayrok ten. Bacarhaytoh ayro woo Qibaadah Qarih adda akak culan naharsi goli taahirroysaana'gidih yemeeten. Gersi bacra ayroh gide kaadu taahirroysiyya abak sugeeniih, sarrak tittat taban kee laca ayrot taahirroysiyyak gaba kaleenih, too Qari qibaadah bical heen.

¹⁸ Leewî mari Malik Ciskiyyaahuk iyyemii, «Inkih yan YALLIH Qibaadah-Qari taahirrosne. Sadgat elle aban arac kee edde aban duyye kaadu taahirrosneh. Tonnah kaadu, taahirroysen-gaqambo elle haan miiz kee elle xayyoosan duyye taahirrosne.

¹⁹ Malik Acad Yalla cine saaku beeh suge duyye gacisneh. Too duyye inkih Yallih taamah gacisne. Woo duyye inkih YALLIH sadgat elle aban mansafih foocal hayne» kaak iyyen.

²⁰ Too waqdi Malik Ciskiyyaahu sissikuk gexxa 'yeh, magaalak saqoltih yan marah seeceeh; too mari titta lih gacca 'yeenih, YALLIH Qibaadah-Qari fan gexen.

²¹ Malik buxah marih dambi kaloot kee, Yuudâ-marih dambi kaloot takke'gidiiy, tonnah kaadu, Qibaadah-Qarih-taahirroysiyyah sadgatah yasguudeeni'gidih, malcina awur kee malcina maruwuuy malcina anaqtu kee malcina dabeela yusguuden. Too waqdi malik wokkel sugte seekay Haaruunuk raddehiyyak iyyemii, «Isin ama saq, sadgat elle aban aracal YALLIH migaaqal sadgatah usguuda» keenik iyye.

²² Too waqdi too seeka naharat awurwa tusguudeeh, sarrak kaadu marwa tusguudeeh, lakal anaaqe tusguude. Usgudda heen saqak inkih, qabala ummattâ-dambi kalootuh, woo sadgat elle aban aracal rifen.

²³ Sarrak, woo dabelwa malik kee wokke qibaadah yemeete mara fan beeniih; woo mari woo dabelwak xagaral gaba rubbu heen.

²⁴ Too waqdi seeka woo wadar tusguudeh. Malik, «Cararisan sadgat kee dambi-kaloot-sadgat Israayil marah inkih aba» 'yaanam iyyeemih sabbatah, woo wadarih qabala woo sadgat elle aban aracal caxen.

²⁵ Malik Ciskiyyaahu, Gaad deqsita nabiy YALLI Malik Dawuduh ruubehiyya kee nabi Naatan Malik Dawuduk ab axcuk sugtem abe. Ciskiyyaahu, Leewî mara kirar kee *begena digirak, giyaagib aagaruk, YALLIH Qibaadah-Qarih addal hee.

²⁶ Woo mari, Malik Dawud gabat luk yen duyyey Yalla faylisan waqdi yaagureeni gabat heen. Seeka gabat *baanta luk, ken garik solte.

²⁷ Too waqdi Ciskiyyaahu, «Cado akak cararisan saq sadgatah xayyoosa» iyye. Woo sadgatih duyye yusguuden waqdi, saare abe mari YALLA faylise. Saareh yaaguren duyye yaagure mari kaadu baanta kee saareh yaaguren duyye yoogoren.

²⁸ Toh abak sugen waqdi, wokkel suggu 'ye mari inkih baaxok bagul Yallih qibaadah gommoh raden. Cararisan sadgat cararra 'yam fan, YALLIH saare aba mari saare abak sugeeh; baanta kee gersi duyye yaagure mari tonnah, too duyye aagaruk suge.

²⁹ Too waqdi Malik Ciskiyyaahu kee raqqa 'ye mari inkih gulubuh gacca 'yeh YALLA yuqbuden.

³⁰ Malik kee baaxoh abbobti, Leewî marak, «Malik Dawud kee nabi Asaf tuktube YALLIH saare aba» iyyen. Too mari inkih gulubuh gacca 'yeh ruffa axcuk too saare abeeniih, YALLA yuqbuden.

³¹ Sarrak Ciskiyyaahu ummattak iyyeemih, «Isin away taahirrowteenihik, YALLAH fayla elle gacissan sadgat baaha» keenik iyye. Too mari too amri oggoleh baaheeh; gersi mari kaadu, «Baaha» keenik axce'kal, sadgatah cararisan duyye isinnil yeexegeenih baahen.

³² Awurwak malcina-tabanaay marwak booluuy illi-xaylok namma bool takkem cararisan sadgatah baahen.

³³ Toh lih kaadu laca boolih awur kee, sidiica alfi yakke illi kee wadaray cado akak yakmeeni sadgatah baahen.

³⁴ Mangah woo saq inkih tasguude seeka wokkel masuginnaay; tonna-leemiik Leewî mari woo saq inkih usgudda haanam fan kee gersi seeka taahirih gactam fan masgaadal seeka catak sugen. Leewî mari imaanak gexxaamah, seekak fula taahirik isinni abbaxuk sugen.

³⁵ Woo sadgatah baahan mango saq cararisaanam luk, seeka qinabak bicsen kamriy woo sadgat lih baahaanahiyya sadgat elle aban aracal caxaanam kee, amaanah xiinaanamih astah qidan sadgatah baahan saqih xayta carrisaanamih taama luk yenen. Tonnal abak Yallih Qibaadah-Qaril duma abak sugen qibaada nammeyhaak qimbisen.

³⁶ Malik Ciskiyyaahu kee ummatta, Yalli a taama xayih gabal keenik bicseemih sabbatah, kaxxam ruffu iyyen.