2 Aydaad 28 - NABUWWA KEE MALIKWA

YUUDÂ MALIKIH YEN ACAD

¹ Acad malik yekke saaku qumrik labaatanni karmat yen. Yarusalaam magaalah addal taban kee lica sanat malikih suge. Takkay immay isi kaxxa abba Malik Dawud raatat gexak masuginnay, YALLI niqba taamat asak suge.

² Duma sugte Israayil amoytiitik kaxxih, Yalli niqbam abak suge. Baqal deqsittaamay Yallih aftok yaqbudeenihiyyah weelol birtak bicse.

³ Hinnom deqsitta golol gabat bicsen duyyeh qaydarus qeerisak suge. Kaadu girat isi xaylo sadgatah qide. Woh akah abem, Israayil-mari yamaateemik naharal woo baaxol suge maray YALLI yeyyeeqehiyyak raaqisen umâ-yabulih tan qaadah gabbaaqiyyak ten.

⁴ Diini maleela qibaada elle abta aroocakaa, koomaamih amo takkuu, silal le cooxih guba takku, too aroocal Acad sadgatah saq elle qidaah, qaydarus elle qeerisak suge.

^5-6 Usuk abah yan dambih, YALLAY kay Dagelta kinnihiyya Suuriyah malik kaat ugse. Too malik qeebil kaak yeyseeh, sarrak too malik Yuudâ-marak mangom seewah Damasko fan gabat bee. Tonnah kaadu, Israayil malikiy Ramalyaahû-Fekac deqsitahiyya kaat ruubeeh; too malik Yuudâ-qaskaray kaxxa agiirah tenehiyyak bool kee labaatanni alfih num inki ayroh addat qide. YALLI tah keenil akah baahem, kaay oson akak raden ken kaxxa abbobti doorehiyya cabba heenih dambi le taamat asak sugeenimih sabbata.

⁷ Dikri deqsita qaskariitay Israayilik yemeetehiyya, malikik baxah yan numuy migaaqah Maqseyaahu deqsitahiyya kee malik buxah xintok abbah yen Qadrikam deqsita num kee Elkaana deqsita numuy malikik elle oobaanahiyya qide.

⁸ Yuudâ mari ramad keenih le marak tene'mmay, tohuhuu, Israayil qaskar keenik urru kee agabuk namma boolih alfi takkem xabba hayteh casbih keenik beyte. Too mara Samaariya fanah been. Tohuk kalah mango duyye dannabah keenik orbisen.

⁹ Samaariyah magaalal Qooded deqsita num yen. Too num YALLIH nabik yen. Too nabi, a qaskar Samaariyah magaala tuduure waqdi, keenit matra'gidih yemeete. Too nabi keenik iyyeemih, «YALLAY isin akak radden sin kaxxa abbobti doorehiyya Yuudâ-mara yinqibeh sugeeh, tonna-leemiik sin gabat ken qide. Takkay immay isin keenit abten uma qidim, a saaku Yalla fan gufe.

¹⁰ A saaku Yuudâ-rasu kee Yarusalaam magaalal agabu kee labhak rabak raqtem isinni naqoosa abtaanam faxxan. Tonnal hay, isin isinnih, YALLIH garil dambit ase mara takkeenim siinih matambullaa?

¹¹ Taway hay, siinik axceemihii, YALLIH naqbi siinil oobaamak. ama maray seewah tabbixeenihiyya sin tooboko kinnim ixigga hayteenih, ken baaxo fanah ken ruuba» keenik iyye.

¹² Tohuk wadir Efrayim abbobtik Yahoocanán-Qadarya kee Masilleemót-Barkiyya kee Sallúm-Yahidkiya kee Cadláy-Qamaasa deqsitta labha, titta geyya hayteh, Israayil maray carbik andabbuk sugehiyyat matarra 'yeenih,

¹³ «A maray seewah orbiseenihiyya gacisaay, YALLIH garil dambi nel takku waytaamat maasina. Duma abne dambi nee xiqahak, YALLIH naqbi nel oobeh yaniih; gersi dambi net moosisinna» keenik iyyen.

¹⁴ Toh keenik iyyen waqdi, qaskar abbobti seewah abbaxuk sugen mara kee, dannabah beenih sugen duyye, doolat-abbobti kee ummat elle gaabowte aracal cabeenih.

¹⁵ Taaxige Efrayim-abbobti seewah abbaxuk sugen mara rubsusaanak duma, qasunuk suge mara keenik dannabah been duyyek sarisen. Sartanaay ibi kabeeliiy leek-maaqo kee dayla keenih yeceen. Boolaateh suge mara danoonal hayya heenih ruuben. Too maray seewah orbiseenih sugeenihiyya Yerikô-magaalay nakliita caxa elle tanihiyyal ken mari elle suge aracah fan ken gacsen. Isinnih Samaariyah magaalay akak yemeeteenihiyya fanah yuduuren.

^16-17 Edom mari qagteh yemeeteeh, Yuudâ-marat qeebi aben. Sinam seewah been. Too saaku Malik Acad Assuuriyah malikik, «Yoo cata» 'yaanamih farmo ruube.

¹⁸ Filistiin mari kaadu Yuudâ rasuk gabbi-qaxat raaqa rakaakay kee ayrô-culmat raqta mango koomaami le baaxol tan magaalooli wararen. Ta mari, Beet-Semes kee Ayyalon kee Gadeerot deqsitta magaalooli qeebit xabbaay isinni gabat raaqissa heen. Tonnah kaadu, Sooko kee Timna kee Gimdo deqsitta magaalooli kee ken dariifal sugte gaandoodi edde yibbixen. Sarra, wokkel elle nooken.

¹⁹ YALLI, Malik Acad sabbatah, Yuudâ-mara sinaamak gaca mara abe. Malik Acad YALLAL imaan sinni num sugeeh; isih leh yan umaane Yuudâ-marat tabseeh; too mari kay gita kataatak suge.

²⁰ Tiglat-Fileeser deqsita Assuuriyah malikiy usuk farmo akah ruubehiyya yemeeteh immay, usuk kaak faxe cato hinnay, gibdaabina kaal baahe.

²¹ Acad, tuxxiq le duyyek malik elle gaca dabqal sugtem kee, kay gubal taamita mari luk sugem kee, tonnah kaadu, YALLIH Qibaadah Qaril sugtem beyya heeh Assuuriyah malikih yecee. Takkay immay tohut catoh tu magenna.

²² Too saaku too gadaamah addat anuk, YALLA kassa mahannaay; umaane kaak dumak lafitteh.

²³ Too waqdi, Acad isi bagul «A mara qeebil cattem, Suuriyah mari yaqbude yallak tanih tanikii, sadgat oson yaqbuden yallah abaama» 'yaanam heeh; qeebil akah gacem, a duyye yuqbudem kinnim yeegemeh. Damaskoh mari yalla axcuk yaqbude duyyeh sadgat abe. Takkay immay too duyyeh qibaada kaa kee Yuudâ-marah baati xalte.

²⁴ Acad kaadu YALLIH Qibaadah-Qaril sugte duyye wokkek beeh, rike-rikeh kureeh, Qibaadâ-Qarih afoofi alfe. Yarusalaam magaalah gitittek xaqul sadgat elle aban arooca xise.

²⁵ Sadgat elle abaana'gidih, Yuudal enna 'ta magaaloolil duyye elle yaqbuden aroocay fayya lehiyya xise. YALLAY kaak duma usuk akak rade kay kaxxa abbobti doorehiyyah naqabu isil oobise.

²⁶ A malik abeh yan taamak ahak kalih qaadoodi, ‹Yuuda kee Israayil Malikwah Aydaada› deqsita kitaabal tan.

²⁷ Rabe saaku kaa elle yoogoqeenim, Yarusalaam addak ten. Takkay immay malikwa edde haan kabrit kaa mahannon. Kay lakal kay baxi malik yekke. Kay migaq Ciskiyyaahu deqsitak yen.