2 Aydaad 27 - NABUWWA KEE MALIKWA

YUUDÂ MALIKIH YEN YOOTAM

¹ Yootam malik yekke saaku qumrik labaatanna kee koona sanatat yen. Yarusalaam magaalal taban kee lica liggida malikih suge. Kay ina Yaruusa deqsitta barrak ten. Tet abba Saaduk deqsita numuk ten.

² Yootam isi abbak kaxxih, YALLI kicna taama abak yen. Takkay immay kay abba akah abe innah, YALLIH Qibaadah-Qaril qaydarus maqeerisinna. Takkay immay ummat dambi abittok maadayinna.

³ YALLIH Qibaadah-Qarih kiblati-kabih culmah arac xissem, Yootamak ten. Yarusalaam magaalak Qoofal deqsita aracal sugte gasot, mango taama edde abtem, kaak ten.

⁴ Yuudâ qaleelal magaalooli xise. Garbo le baaxol kaadu xeri ikkek tamaatem akak yablen fayya-le-qarwa kee megdebitte xise.

⁵ Qammon malik kee kay qaskarat, kaa kee kay mara qeebi abteeh; too qeebil keenik yeyseenih. Qeebil keenik yeysek wadir, qusuur ken mekelsiise. Sidiica sanatak kulli sanatal sidiica alfi kee affara boolih kiilo lakqok kaah acayuk sugen. Kamadik alfih tonni kaah acayuk sugen. Alfih tonni kaadu gabru deqsitta darok kaah acayuk sugen.

⁶ Yootam YALLAY kay Dagelta kinnihiyyal kaxxa imaan heeh, YALLI aba iyyem abak yen. Tonna-leemiik cayla Yalli kaah yecee.

⁷ Wohuk kalah taniimiy Malik Yootam abba heehiyyak usuk abe carbi yanuu, kay xinto tanuu, reedda 'yeemiy rabba 'yam fan abba heem, ‹‹Israayil kee Yuudâ Malikwah Aydaada›› deqsita kitaabal tan.

⁸ Malik yekke saaku qumrik labaatanna kee koona sanatat yeneeh; taban kee lica sanat Yarusalaamal malikih suge.

⁹ Yootam rabe saaku, Dawud-Magaala deqsita caafatal malikwâ-buxah mara edde yaaguqen magaqat kaa yoogoqen. Kay baxi-Acad kay aracal malik yekke.