2 Aydaad 26 - NABUWWA KEE MALIKWA

YUUDÂ MALIKIH YEN QUDDIYYA

¹ Yuudâ mari yakkeemiik Amaxyah baxay migaaqah Quddiyya deqsitak yenehiyya abbah aracal malikih dooren. Too saaku Quddiyya qumrik taban kee lica karmat yen.

² Quddiyya isi abba rabek lakal, Eelat deqsitta magaalay qeebit raaqiseenihiyya Yuudah gacseeh nammeyhaak tet xise.

³ Quddiyya malik yekke saaku qumrik taban kee leceyhaytot yeneeh; Yarusalaam magaalal kontom kee namma sanat malikih suge. Kay ina migaaqah Yakolyaahu deqsitak teneeh; elle toobokem, Yarusalaam magaalah addak ten.

⁴ Quddiyya isi abbah raatat gexak, YALLI kicna taamah taamitak yen.

⁵ Zakariyya akak iyyan seekiy Yallih gita kaa barisak yenehiyya addunyal suggu 'yem fanah, kay fayu oggolakaay YALLI kicna taamah baguuk taamitak suge. Tonna-leemiik Yalli barkat kaat hee.

⁶ Quddiyya Filistiin marih gaaduh ugteeh, Gat kee Yabne kee Asdood akak iyyan magaalooli yiggileh. Asdood xaqu kee raqqa 'te Filistiin rasul magaalooliy gasoosa maroh edde tanihiyya xise.

⁷ Filistiin-mara kee, Gurbaqal deqsitta magaalal ten Qarab kee, Maquunim deqsita marat abe gaadul Yalli nasri kaah yecee.

⁸ Qammon mari qusuur kaah mekelak yen. Qandeh lafitak lafteeh; tonna-leemiik kay migaq Masri baaxoh agantah gexeeh; too baaxol kinni way yontoobbeh.

⁹ Yarusalaam magaalat maroh edde heen gasoosa maqar bahsiisa'gidih, Rukni-Afa deqsita arac kee Goloh-Afa deqsita aracih amol, allak tamaatem akak yablen qari xise. Gaso akak makkinta aracal kaadu tonnah yan qari xise.

¹⁰ Tonnah kaadu, sinam isinni aroocal allak tamaatem akak yablen fayya le qarwak mangom xise. Ayrô-culmat raqta mango koomaami le baaxo kee booxaaxah tan baaxol mango laa luk yeneeh; leê-raaqisso mangom dage. Buqre kaxxam kicinuk yeneeh; tonna-leemiik taamita marak, «Qaleelah tan baaxol qinab xala coox ubquraay; lee le baaxoy buqre elle bictal daro qida» iyye.

¹¹ Qaskarak kaadu mango qaskaray qeebih bical tanihiyya luk yen. A qaskarih migaq kee qaada Yaqiiyal kee Maqseyaahu deqsita namma numih gabat yen. Ken nammayih amo wagitiyyi qaadaa, kaadu Cananya deqsita numuy malik awlaytittek numuk teenah yanihiyyah gabat yen.

¹² Qaskarak abbobtih yan mari mangah namma alfi kee lica boolih num akkuk yen.

¹³ Ta qaskarih abbobti amri elle luk ten qaskar mangah sidiica bool kee malcina alfi kee koona boolih qaskariita akkuk ten. Oson malik carbil catoonuh cayla leeh, qaskariino-baritto abe suge marak sugte.

¹⁴ Quddiyya silaacak gob kee macaxuuy amot haan birti-kalabtaay birta isinnik edde waasan birtak bicsen kameesiiy gayse kee gaysê-xaylo kee wanxefit qidoonu waan xeetik ken yitkiyeh yen.

¹⁵ Silac kaah bicsa maray kaxxa ixxiga lehiyya Yarusalaam-magaalat marot heen gasoh amol, allaak yamaate mara akak yablen fayya-le-qarwa kee, too gaso akak makkinta aroocaak qidoonu waan gaysê-xaylo kee kaxxa xeet qiddu wayta wanxefih-siba bicsen. Quddiyya Yallak gee cato luk yeneeh, tonna-leemiik migaq kulli ikkel kaak yontoobbeeh; kaxxa cayla-li yekke.

QUDDIYYA XAGARAT KAXXIINA GACTE

¹⁶ Tonna'mmay qandeh lafitak elle lafitak maacise ikkal, kaxxiina xagarat kaak gacteeh; toh baati kaah xalte. YALLAY kay Dagelta kinnihiyya kaa akah amrise weem abeeh; YALLIH Qibaadah-Qaril qaydarus elle qeerisan mansaf gexxa 'yeh qaydarus qeerise.

¹⁷ Qadarya kee bacra-tabanih seekiy meysi sinnihiyya tah abah kaa yublen waqdi, tokke gexxa 'yeeniih,

¹⁸ «Aham maabin, Quddiyyaw» kaak iyyen. «Aham ku taama hinna, YALLAH qaydarus qeerisaanam koo wagintam hinna» kaak iyyen. Qagseenik kaak iyyeenimih, «A taama abtaamih cakki lem, dagaak Haaruunuk rade marak tan. Akkel qaydarus rubteemih YALLIH naqabu isil oobisse. A taahirik yan aracak eweq. Tahak wadir YALLI barkat koo waysiisele» kaak iyyen.

¹⁹ Toh kaak iyyen waqdi, Quddiyya Qibaadâ-Qarik qaydarus elle qeerisan mansafal xaqul soolak yeneeh, qaydarus elle qeerisan girgira gabat abbaxuk yen. Seekay toh kaak intehiyya yinqibeeh; tonna-leemiik, too waqdiik qansal kaak kaxxam gibdi biyaakay arab yakmehiyya kaak yewqe.

²⁰ Too waqdi Qadarya kee raqte seeka aham tubleeh; «Qibaadâ-Qarik xayuk eweq» axcuk kaa yiysissiken. Quddiyya kaadu YALLIH digaala yuble waqdi, sissikuk yewqe.

²¹ Tohuk wadir rabba 'yam fanah a dalkah sabbatah taahirik manannaay, Qibaadâ-Qari culaamak waasot yen. Tonna leemik sinaamak baxsimeh dibuk yan qarit yeneeh; kay baxay Yootam deqsitahiyya kay aftok baaxo xiinisak yen.

²² Nabi Yasaqya ahak kalihimiy usuk abehiyya yuktube.

²³ Quddiyya rabe saaku malik nasab le mara edde yaaguqen kabrit kaa maagaqinnon. Takkay immay too kabrih xaqul kaa yoogoqen. Toh akah abeenimii, Yalli kaal ruube dalkah sabbata. Kay lakal kay baxi malik yekke. Migaaqah Yootam deqsitak yen.