2 Aydaad 25 - NABUWWA KEE MALIKWA

YUUDÂ MALIKIH YEN AMAXYA

¹ Amaxya qumrik labaatanna kee konoyhaytot yan saaku malik yekke. Sarrak Yarusalaam magaalal labaatanna kee sagla sanat malikih suge. Kay inah migaq Yahoqaddinik teneeh; elle toobokem, Yarusalaam magaala.

² YALLI kicna taamah taamitak yene'mmay, baguuk abak mananna.

³ Amaxya malik tikka 'yeh qande baahe saaku, kay abba qide maray doolat saqoltih sugehiyya caneh qide.

⁴ Takkay immay Yallih xinto elle tan kitaabay Muusal obtehiyya elle inta innal, oson abeenimih ken xaylo maqidinna. Too xintol, «Abba baaheemih xaylo maqidinaay; xaylo bahteemih abbobti maqidina» 'yaanam tan. «Numul rabi elle yamaatem, dagaak num isih baahe umaane» 'yaanam tan.

EDOM MARAT QEEBI ABEN

⁵ Malik, Yuuda kee Benyaamah yooboke mara gulub-gulubul baxissa heeh qaskarat ken hee. Sarrak alfi-alfi kee bool-boolul kurra ken heeh ken amrissa abbobti keenih hee. Qaskarat hee mari qumrik labaatannaak amo gufa marak ten. Tittat sidiica boolih alfih num qaskarat hee. Ta mari inkih qeebih bical yaniih, macaxi-qido kee goobut isinni akah raaqisan inna nagay yaaxige marak ten.

⁶ Tohuk kalah kaadu, Israayil rasuk qasbih sidiica alfi kee affara boolih kiilo lakqok akah yeexege qaskarak bool alfi takkem baahe.

⁷ Sarrak nabi kaal yemeeteeh kaak iyyeemih, «Amoytaw, Israayil qaskar is lih mahan. A maray kilbat le kabih xintok yemeetehiyya YALLI kicna mara hinnon.

⁸ A mari carbil kaxxam koh xiqeloonum takkale koo immay, nasri koh teceeh qeebil naqboytak koo taysiisem, Yalla ikkal, a mara hinna. A mari sin lih gexek, Yalli naqboytit siinik aysiisele» kaak iyye.

⁹ Too waqdi Amaxya iyyemii, «Hay meqehik, a gide takke lakqoy keenil meklehiyyak maca aboo?» kaak iyye. Nabi kaak iyyemii, «YALLI wohuuk fula koh aceele» kaak iyye.

¹⁰ Toh yoobbe waqdi, Amaxya taaxige qaskaray lakqot limmoyseh sugehiyyak, «Ahaysa isinni baaxo uduura» axcuk xiiriye. Too qaskar isi baaxo tuduureh immay, Yuudâ-mara kaxxa naqabuh niqibuk gexen.

¹¹ Sarrak Amaxya niya gacissa heeh, isi qaskarak foocat gacca 'yeh Qasbo le Golo deqsita arac fan ken been. Tokkel qeebi abeeniih, too saaku Edom qaskarak tabna alfih num qiden.

¹² Tabna alfih qaskariita kaadu yibbixeenih. Too qaskar Silaq deqsitta qalek amo beyya heenih boolok amok ken qiden. Too qalek kombobbolak obba 'yeenih boolok gubat yan kaxxa xixxooqal radeeniih, tonnal yembexen.

¹³ Oson tohut yanin waqdi, duma Amaxya xiiriye Israayil qaskar amma 'teh, Samaariya kee Beet-Coron fanal enna 'ta Yuudah magaaloolit qeebi abeeniih, sidiica alfih num keenik qiden. Mango duyye kaadu dannabah keenik orbisen.

¹⁴ Amaxya Edom marak yeyseh elle yemeete ikkel, oson aqbuduk sugen coox kee xeetik bicsen duyyeeya gabat keenih baahe. Too duyye inki soolissa heeh yuqbude. Woo aracal qibaadah sadgat too duyyeh migaaqal abe.

¹⁵ Taham YALLIH naqabu kaah bahte. Tonna-leemiik YALLI nabi kaa fan ruube. Too nabi kaal yemeete waqdi, kaak iyyeemihii, «Ta duyyey elle gexxe baaxoh mari aqbuduk sugehiyya yaqbudeenimit koo bahtem macaa? Aham tu xiqta way, le maray aqbuduk sugehiyya wadak ten kaak; koo tahat asissem macaa?» kaak iyye.

¹⁶ Yaabak fanat kaak radda 'yeh, too tiyak malik kaal gacseemihii, «Malikih fayu yecee num koo abtem iyyaay? Ahaysa yab eyseed; cintek, rabi gadda akketto» kaak iyye. Nabi fayuk kaak yeedeeh immay, qangara kaat heeh, iyyeemihii, «Ta saaku Yalli baati koh loowem ableh an. Toh elle ablemii, umaanek ta axxul lem abba hayteh, away yi fayu cintaamal kok ableh an» kaak iyye.

ISRAAYIL MARAT QEEBI ABEN

¹⁷ Ayrok teena malik Amaxya kee kaah fayu yecee marak titta geyya heenih, Israayil malikil malsen. Abeenih yanim malahaa, too malikih farmo ruubeeniih, «Qeebih yoo duude tellek, bical gacay» axcuk qeebih kaa niyaataanam kaah warsen. Israayil malikik migaq Yahoqasak ten. Kay abba Yowaahad deqsitak yen. Kay kaxxa abba Yaahu deqsitak yen.

¹⁸ Sarrak Israayil malik a farmol kaal gacseemih, «Dumah yan saaku Lubnaan rasuk qaleh amol tooboke keenan le caxâ-baxa *sariddoh farmo rubte, iyye. ‹Ku baxá yi baxah digbis› 'yaanam rubte, iyyen. Tohut yanin waqdi, kaxxa ali yemeeteeh taaxige caxah-baxat taqqa 'ye waqdi, itqat edde tet yiggiggile, iyyen.

¹⁹ Hay taway too missilah, duma Edom-marak teysek sah, geyte iisa koo maxiqtay kaxxiinah qubbuy intaa? Yoo qeebih suumutaanam koo kee Yuuday ku marah yanihiyyah baati xalelem mataaxigaa? Maabinay isi aracal elle idiy, qeebi hinnak» 'yaanam kaah ruube.

²⁰ Amaxya a fayu kaak cineh. Yalli Amaxyah a qeebil gacam looweh yen. Duma Edom marak kaa yiysiiseh immay, a saaku a qeebil kaa gacsiisaamal gaba kaleh yen. Toh akah kaak abaamat akah yemeetem, Edom marih baaxok baahe duyyey xeet kee cooxuk bicseenihiyya yuqbudeemih sabbata.

²¹ Sarrak Yahoqas fayu kaak cinem yuble waqdi, qeebih kaah gexe. Yuudâ rasuk Beet-Semes deqsitta magaalal yongoorowen.

²² Amaxyâ-qaskar qeebil gacteeh, qaskar takkeemik kudak isinni buxaaxih fan gacen.

²³ Israayil malikih yen Yahoqas, Amaxya yibbixeeh, Yarusalaam fanah kaa bee. Yarusalaam magaalat maroh tan gasok Efrayim-Afak xabba haanamaay Rukni-Afa deqsita aracah amma 'yaanam tan gaso butukka hee. Too arac xexxaarah namma boolih gide mitrik takke baaxok ten.

²⁴ Yallih Qibaadah-Qarih addal suggu 'ye dahab kee lakqo Samaariyah magaalah fan dannabah orbise. Yoobad-Edom deqsita numuk dacayrih edde suge duyyey Qibaadâ-Qaril sugga 'te kee, malik-qarik-duyye-elle-daanisan-aracal sugte duyye weerra heeh bee. Tohuk kalah kaadu, carbit yibbixe mara seewah Samaariyah magaala fan gabat bee.

²⁵ Malik Amaxyay Yuudâ-malikih yenehiyya, Israayil malikih yen Yahoqas rabek sarra, taban kee koona sanat suge.

²⁶ Tahak kalih qaaday Amaxya reedda 'yeemiiy rabba 'yam fanah abba heem inkih, ‹Yuuda kee Israayil Malikwah Aydaada› deqsita kitaabal tan.

²⁷ Yallih yab cinna heeh isih faxaamih abittot gace ayrook wadir, Yarusalaam magaalal sinam kaak abta waytaamat malisak sugte. Sarrak Laakis deqsitta magaala fanah awyah gexe. Takkay immay kaa niqibuk yen mari tokke fanah lakal kaak gexxa 'yeenih kaa qiden.

²⁸ Ginaada kaak farasal hayya heenih Yarusalaam fanah beeniih, tokkel Dawud-Magaala deqsita caafatal malik buxah mara edde yoogoqen kabrit kaa yoogoqen.