2 Aydaad 24 - NABUWWA KEE MALIKWA

YOOQAS YUUDÂ-BAAXOL DARDAARE

¹ Yooqas malik yekke saaku karmak malcina sanatat yen. Sarrak Yarusalaam magaalal morootom liggida malikih suge. Kay ina Xibya deqsitta barrak teneeh; elle toobokem, Bersabaq-magaalak ten.

² Yooqas, sek Yoyadaq addunyal yanim fanah, YALLI kicna taamat asak suge.

³ Sek Yoyadaq namma barra doorru heeh rihimih kaah abe. Too agbi lab-xaylo kee say-xaylo kaah xale.

⁴ Malik Yooqas waqlak wadir, YALLIH Qibaadah-Qari yaqusbuuseemit yemeete.

⁵ Too waqdi seeka kee Leewih yooboke marah seeceeh, keenik iyyemii, «Yalla kinni sin Dageltih Qibaadah-Qarih aqusbuusiyyah sanatal faxxinta lakqo kobxissaana'gidih, Yuudâ-rasul enna 'ta magaalooli fan xayuk gexxa xicay, tama lakqo gaaboysa» keenik iyye. Takkay immay Leewih mari gexok udurruteh.

⁶ Tah yuble waqdi, sek Yoyadaqay keenik abbah yanihiyyah secca 'yeeh, «Leewih marak, ‹YALLIH naqasuh yen Muusa amriseh cabe lakqoy ummatta Yallih Nabnah-Siraqih catoh gabbarah tayyaaqehiyya, Yuudâ-rasul yan mara kee Yarusalaamal yan marak gaaboysay baaha› keenik exceeh; too mari uxih magexinnay elle yanik; ahak tuk teena m'intaa?» kaak iyye.

⁷ Too dabaanal, Qatalya deqsitta barray taama akak toomehiyyah gita kataatak suge mari, Yallih Qibaadah Qari abuuruseenih sugeeniih, addal akak sugte duyyey taahirik tanihiyya wokkek beyya heenih, Baqal akak iyyaanamay yallah loonuhiyyah qibaadah heenih yenen.

⁸ Sarrak Malik Yooqas Leewih marak iyyeemih, «Gexay gabbarah yayyaaqen lakqo edde qidan sandug bicissa haay woo Qibaadah-Qarik culmal haa» keenik iyye.

⁹ Sarrak, Yarusalaam magaala kee inkih yan Yuudah rasu fan farmo ruube. Iyyemii, «Yallih naqasuh yen Muusa, Israayil mari bacarih tan baaxol yen saaku, Yallih Nabnah-Siraqih catot assa'gidih ummatak salaqe lakqo, a saaku salaqqa haay ruuba» 'yaanam farmoh ruube.

¹⁰ Ta farmo akah ruuben ummatta kee baaxoh abbobti ruffa 'teeh, lakqo salaqqa heenih baaheeniih, a lakqoh Qibaadâ-Qarih culmal heen sandug kibeenih.

¹¹ Kulli ayro sahda gexxa 'te waqdi, Leewih mari sandug malik gubal taamita maral acayuk yenen. Sandug lakqok kibbiiminnaan waqdi, malik kutbe-abeena kee kaxxa seekih afak yan num sanduguk lakqo eyyeqqa hayteh, sandug elle suge ikkel gacisak yenen. Tonnal abak mango lakqo gaaboysen.

¹² Malik kee sek Yoyadaq too lakqo YALLIH Qibaadah-Qari bicsa marih amol yan marih gabal haak yenen. Qarik tiddigille arooca xeetik xisa maraay coox bicsa mara kee biriita kee nacaasak tu bicsa mara a taamah doortem keenik ten.

¹³ Ta taamat hayya heen mari Yallih Qibaadah-Qari meqe innal bicseeniih, duma xisen saaku elle suggu 'ye innah heen.

¹⁴ Bicsak tonnal gaba kalla heen waqdi, lakqo kee dahabak raqtem malik kee sek Yoyadaqal yeceeniih; malik kee sek too lakqo kee dahabak sacnitte kee faxxinta mingilwa YALLIH Qibaadah-Qaril haana'gidih akak bicsen. Sek Yoyadaq addunyal suggu 'yem fanah, Qibaadâ-Qaril sadgat kulli saaku abak yenen.

¹⁵ Sek Yoyadaq barak bool kee soddom liggida guffu heeh kaxxam idoolite saaku, Yallih amri kaal yemeete.

¹⁶ Sek Yoyadaq rabe saaku, Dawud-Magaala deqsita caafatal malikwa elle yoogoqen ikkel kaa yoogoqen. Toh akah abeenimii, usuk Israayil marah meqem abeh, Yalla kee Yallih Qibaadah-Qarih meqem abe.

¹⁷ Sek Yoyadaq rabek wadir Yuudah abbobti malikit culla 'teh, sekti gita hinna'mmay, isinni malah kaa heen.

¹⁸ Tonna-leemiik ummatta YALLAY oson akak raden ken kaxxa abbobti elle aamanuk sugtehiyyah xisen qaril abak sugen qibaada cabba heenih, xeet kee cooxuk bicsen duyyeeya kee Aseera deqsittaamay yaqbudeenihiyyah astah soolisen gurumuudah qibaadat gacen. Oson too umaanet aseenim, Yuuda kee Yarusalaam maral Yallih naqabu bahte.

¹⁹ YALLI, uma gitak ken waasaana'gidiy kay fan ken gacsaana'gidih, nabuwwa keenil ruube'mmay, ummatah tu gactek, ken yab aabbe cineenih.

²⁰ Sarrakaa, seekik raaqe baxay Zakariyya migaq luk yenehiyyal Yallih Roocaaniyya obte. Too sek sinam kaa elle table ikkel solla 'yeeh, anay fayya haak, «YALLI siinik iyyaamah, ‹Ummatey, yi amri akah cintaanaah bala isinnil akah oobissaanam macaa? Yoo cinteeniih anu kaadu sin cineh› siinik iyyah yan» iyye.

²¹ Malik Yooqas edde anuk, ta seekik aboonu waanamal malissa heeniih; tohuk wadir malik «Kaa qida» 'yaanamih amri yecee. Too mari YALLIH Qibaadah Qarih daaratal kaa qiden.

²² Malikii, Zakariyyah abba maqaanek kaah xiqeh gide hawwenna heehii, kay baxa qidsiisaamat ase. Zakariyyal rooci kaxkaxah yan waqdi, anay fayya heehii, «Abtaanam YALLI siinik yabalay! Sin akah digaalay» 'yaanam iyye.

²³ Too sanatat sugum yemeete waqdi, Suuriyah qaskar Yuudâ-rasu kee Yarusalaam magaalat qeebi abeeniih, abbobtih suggu 'ye mara inkih qiden. Mango duyye keenik dannabah Damasko fan orbisen.

²⁴ Suuriyah qaskar Yuudâ-qaskarak daguk tene'mmay, YALLI makkok keenik ken yiysiiseh. YALLAY ken kaxxa abbobti aqbuduk tenehiyya toh keenik akah abem, kaa cineemih sabbata. YALLI, Malik-Yooqas tonnal digaale.

²⁵ Qeebit kaxxam mudduumeh raaqe. Sarra Suuriyah qaskar baaxok tewqe waqdi, kay gubal doolat abbobtih ten namma num kaal malisseeh; Sek-Yoyadaqah baxat abe qidimih caneh, isi kaqaadal yan waqdi kaa qiden. Magaq magaalak Dawud-Magaala deqsita caafatal kaa yoogoqen. Takkay immay dardortih aracat kaa maagaqinnon.

²⁶ Kaal malisseh kaa qiddemii: Dabad deqsita numuy Qammon marih barrah baxah yeneyii ina akak Simqat deqsitak tene kee, Yahodbad deqsita numuy Mooyab barray migaaqah Simrit deqsittahiyya baxak tenehiyyak ten.

²⁷ ‹Malikwah Abina› deqsitta kitaabih maybalaalaqal, Malik Yooqas xayloh aydaad kee, kaat takku waytaamih giddinaamak nabuwwa edde yabte yab kee, usuk Yallih Qibaadah-Qariy yiddigilleh sugehiyya elle bicsiise innih aydaadi yan. Kay lakal kay baxay migaaqah Amaxya deqsitak yenehiyya malik yekke.