2 Aydaad 22 - NABUWWA KEE MALIKWA

ACADYA YUUDAL DARDAARE

¹ Duma Qarabak tu takke maritteeta Yuudâ-baaxo warar abte waqdi, Yahooram xaylok Acadya deqsita baxay barah inkih salafat yanihiyyak kalih xaylo inkih qideenih sugen. Tonna leemiik Yarusalaam magaalah mari, kay abbah aracal malikih kaa heen.

^2-3 Acadya qumrik labaatanna kee nammayhaytot yan saaku malik yekke. Yarusalaam inki sanat malikih suge. Acadya kaadu Malik Acab buxah marih raatat gexe. Toh akah abemii, Qatalya deqsitta barray Malik Acabak baxáh teneeh Malik-Qomri kaadu baxi baxák tenehiyya kaak inah ten. Is uma fayuy Yallak kaa yayxeerehiyya kaa fayisak ten.

⁴ Kay abba rabek sarra, Malik Acab buxah mari kaadu uma fayuh kaa fayisak yenen. Tonna-leemik, Acab buxah mari akah abak suge innah, Malik-Acadya kaadu YALLAL dambi lem baahe. Toh sarra baati kaah xalte.

⁵ Too marih fayuh Suuriyah malikiy Cadayel deqsitahiyya kee Israayil malikiy Yooram deqsitahiyya qeebi abte saaku, Israayil malikih qaxat gacca 'yeh Suuriyah malikit qeebi abe. Too qaskar Gilqad rasuk Raamot magaalal gaba kee gabah toome. Too qeebit Yooram mudduume.

⁶ Sarrakaa, mudumuk uram fanah Yidraqel magaala fanah yuduure. Acadya kaat boysita'gidih tokke gexe.

⁷ Acadya tokke Israayil malikit boysita'gidih abe gexo, Yalli baati kaal akah takke innah, abe. Usuk tokkel gexe waqdi, Yalli, kaa kee Yooramat, Nimsí-Yaahu deqsita num ruube. YALLI too num akah ruubem, Acab durruyyatih dardaarinna a numih gabat bayisa'gidik ten.

⁸ Yaahu, YALLI elle iyye innal, Malik Acab durruyyatih dardaarinnal taguude digaalat elle abak suge ikkel, Yuudâ doolatih abbobti kee Acadyâ nangaltay Acadya lih wakalih temeeteh sugtehiyya yubleeh, too waqdi yakkeenimiik ken qide.

⁹ Sarrak Acadya gorriseeniih Samaariyah magaalal yombooqoreh suge. Kaa geeniih, Yaahu fanah kaa beeniih tokkel raba kaal yuckumen. Takkay immay kay kaxxa abba Yacoosafat cormatah meqe magaqah kaa yoogoqen. Iyyeenimihii, «Kay kaxxa abba YALLI kicna taamah baguuk taamitak suge numuk ten» iyyen. Acadyâ-xaylo kee ramaday kay lakal dardaarahiyya maraaqinna.

QATALYA YARUSALAAMAL MALIKÁ TEKKE

¹⁰ Malik-Acadyah-inah ten Qatalya, tet baxa qideenim toobbe waqdi, Yuudâ marak dardaarinni elle amma axce raare mara inkih qidaanamih amri tecee.

¹¹ Takkay immay Acadya lih abba le barray migaaqah Yahoosebqa deqsittahiyya ten. Too barra abbaxuk tenem, Yoyadaq deqsita seekik ten. Too barra, Acadyâ-xaylok numuk teenay migaaqah Yooqas deqsitaah qide raareenihiyya kee, inah innal kaa dacrisak sugte barra beyya hayteh, Yallih Qibaadah-Qarih addat xinti-aracal ken hayte. Tokkel kaa tooqoreeh, Qatalyâ-gabat rabaamak kaa waddeh.

¹² Qatalya malikáh sugte laca sanat, tokket uqurat kaa sugusse.