2 Aydaad 21 - NABUWWA KEE MALIKWA

¹ Yacoosafatal Yallih amri yemeeteeh; Yarusalaamak Dawud-Magaala deqsita caafatal malikwâ-buxah mara edde yaaguqen magaqat kaa yoogoqen. Kay lakal kay baxay migaaqah Yahooram deqsitahiyya malik yekke.

YACOORAM YUUDAL DARDAARE

² Yahooram lica toobokoyta luk yen. Migaaqah Qadarya kee Yaciyel kee Zakariyya kee Qadariyaahu kee Mikaayil kee Safatya deqsitak yenen.

³ Ken abba mango dahab kee lakqo kee wohuk kalah tan duyyey mango tuxxiq lehiyya keenih yecee. Kulli num keenik Yuudâ magaalooliy gaso maroh edde tanihiyyah abba abe. Barah keenik inkih Yahooram saqalah yeneeh; tonna-leemiik ken abba isi lakal malik kaa abe.

⁴ Yahooram isi abbootan maqar bahsiisek lakal, lab-tooboko inkih kee Israayilil abbobtih yen marak tu takkem qidsiiseh.

⁵ Yahooram qumrik soddom kee nammayhaytot yan saaku malik yekkeeh, Yarusalaamal bacra liggida malikih suge.

⁶ Malik Acab kee wohuk kalah tan Israayil malikwak kaxxih, Malik Yahooram uma-taama abak suge. Tohut akah asem, Acab baxá rihimih abiteemi. YALLAL dambi lem baahe.

⁷ Takkay immay YALLI, Dawuduk raaqe dardaarinni samad cabsiisam mafaxinna. Toh akah tekkemii, YALLI, Dawudukuu, «Ku reeda baxak baxal tabele ikkal bayya m'inta» 'yaanam axcuk tohul xagna kaah culeh yen.

⁸ Yahooram malikih yen saaku, Edom mari gaadileh kaat ugteeh, sarrak isi amô-baxxaaqqa kaak geenih isinni malikih gubat xinta doolat yekken.

⁹ Tohuk gexxaamah Yahooram kee kay qaskar qeebi abta faras-gaariira lih Edom rasuh gaaden. Edom mari maro keenit hee'mmay bari yekke waqdi, Yacooram kee kay qaskar keenik tuftuceh tisillime.

¹⁰ Tohuk wadirih, Edom mari currih gace. Tonnah kaadu too dabaanal Libnâ-magaalah mari gaadileh yewqe. Toh akah tekkem, Yahooram YALLAY usuk akak rade kay kaxxa abbobti doorehiyya cineh yeneemih taaga.

¹¹ Yuudâ-rasuk fayya le baaxol, Yalla maleela xeet kee coox elle taqbude arooca bicse. Yuuda kee Yarusalaam magaalah ummat, Yallih garil dambik keenil loowintu waytaamat asise.

¹² Nabi Eliyyas warkat kaah ruube. Too warkatal kaak iyyeemihii, «YALLAY ku kaxxa abba Dawud aqbuduk yenehiyya atu abta umaane kok niqbah. Macaay intek, ku abbah yen Malik-Yacoosafat katayak suge gita makatayinnitooy, ku kaxxa abbah yen Malik-Aasa katayak suge gita makatayinnito.

¹³ Ken gita cabba hayteh, Israayil malikwa abak tenem abta. Yuuda kee Yarusalaam magaalah mara Yallak teyxeereh. Malik Acab kee kay lakal malikwa yekke mari Israayil mara Yallak akah yeyxeeren innal, atu Yuuda kee Yarusalaam mara Yallak teyxeereh. Tohut macabinnitoy ku toobokoy kok aysuk tenehiyya qidde.

¹⁴ Tohuk gexxaamah YALLI ku maraay ku xaylooy ku agabu kee edderri hayteemil bala oobisele.

¹⁵ Atu isih ulqi-lakimah biyaakitettooh; too biyak ayrook ayro lafak koo lafele» kaak iyye.

¹⁶ YALLI, Filistiin mara kee Qarab marak tu takkemiy Kuus mari dabqah elle yan ikkeh xaqul tenehiyya, Yahooram-marat qeebi akah aban innah ken uguuguse.

¹⁷ Too mari Yuudâ-baaxo warareeh malik qari buuben. Malik gennaaqoh agabu kee lab-xaylo seewah kaak orbisen. Raqtem dibuk kay xaylok barah inkih qunxuk yen awkay migaaqah Acadya deqsitahiyya.

¹⁸ Toh inkih kaat tikka 'tek sarra, YALLI ulqi lakimay kaxxa biyak lehiyya kaat ruube.

¹⁹ Too biyak namma sanatih gide kaxxa biyaakah kaa biyaakak sugeeh, ellecabol uma-rabah akah rabe. Duma kay kaxxa abbobtih akah abak yenen innah, kay rabah gira muurusinnon.

²⁰ Yahooram soddom kee nammayhaytot yan saaku malik yekkeeh, sarrak Yarusalaamal bacra sanat malikih suge. Rabe saaku kay rabah rookittem matan. Magaalak Dawud-Magaala deqsita caafatal kaa yoogoqeeni'mmay, malikwa edde yaaguqen magaqat kaa maaguqinnon.