2 Aydaad 20 - NABUWWA KEE MALIKWA

EDOMUL YEKKE CARBI

¹ Ayrok teena Mooyab kee Qammon qaskar Maquunim deqsita maray qalla lih luk yeneenihiyya lih gacca 'yeenih, Yuudâ-rasu wararen.

² Farmoh sinam temeeteeh, Yacoosafatak iyyeenimih, «Kaxxam mango qaskar Edom baaxok Rabe badih tattabak gacca 'yeenih qeebi siinit abaana'gidih yemeeteenih yanin. Caxaxon-Tamaari deqsitta magaala gufeenih» kaak iyyen. Ta arac kaadu Qengeedi migaq luk suge.

³ Toh yoobbe waqdi Yacoosafat cunxo hayteeh, YALLAL gita essereemit yemeete. Sarrak inkih yan rasul sinaamak sooma iyyeeh amri yecee.

⁴ Inkih yan Yuudah rasuk sinam Yarusalaam fanah temeeteeh; akah temeetem, YALLAL cato esseraana'gidik ten.

⁵ Too magaalal YALLIH Qibaadah-Qarik qusbih bicsen daaratal gaaboowen. Malik Yacoosafat gaaboowe marih foocal solla 'yeh,

⁶ anay fayya haak dooqa abe. Dooqah iyyeemih, «YALLAW, nanu akak radne ni kaxxa abbobti doore Dageltaw, qaraanal cokmi lem kooy; inkih yan baad xiinissam koo. Qande leeh cayla le Dagelta kinnitooh; kot missowtaah koo aleltam matana.

⁷ Ni Dageltaw, Israayil ummatay isi mara abtehiyya a baaxo fanah yemeete saaku, akkel suge mara eyyeqqa hayteh, isi maray isi kataysa Abraahimik radehiyyah ikoytah tecee.

⁸ Akkel dabaaqah gaceeniih, koo elle yaqbudeeni'gidih ku Qibaadah-Qari xisen.

⁹ Xisen waqdi iyyeenimihii, ‹Digaalah carbi net yekkek, dalkay sahdat taban-tabtahiyya nee tibbixek, hinnay kaadu, qulul nel rade yekkekii, a Qibaadah-Qariy koo elle yaqbudeenihiyyah foocal solla inneh dooqa abenno. Gadaama nee tabbixe saaku koo kallacitnek, atu woo kallaci neh oggolettooh, nee wadetto› 'yaanam iyyen.

¹⁰ «A saaku hay, Qammon kee Mooyab kee Edom mari titta geyya heeh qeebi net abah yan. Nanu akak radne ni kaxxa abbobti Masrik tewqeeh akke temeete saaku, too marih baaxol culaanam oggolteh masuginnito. Ni kaxxa abbobti dariifa keenik gacca 'yeenih gexeeniih immay ken mabaysinnon.

¹¹ A saaku wohuh galtoh atu neh tecee baaxok nee yayyaaqeenim faxan.

¹² Ni Dageltaw, a axxul le qaskaray qeebi net abahiyyat edde kalalinna qande mannu immay, ken neh digaal. Kook sah nee cattam matanaay; abnam manaaxigaay, catoh waginnam koo» iyye.

¹³ Too waqdi Yuudâ-marak ginnaaqot yan agabu kee urrih agantah num raaqeh manannaay, YALLIH Qibaadah-Qarih afal soolak yenen.

¹⁴ Gaabooweh suge marih addak Leewih yooboke numuy migaaqah Yacadiyel deqsitahiyyal YALLIH *Roocaaniyya obte. A num Asaf akak iyyan gulubut raaqak yen. A gulub elle muggaaqiseenim, Asaf deqsita numuk teneeh; Asafak rade Mattanya Yaqiiyal xaleeh, Yaqiiyal Banaaya xaleeh, Banaaya Zakariyya xaleeh, Zakariyya ta numuy YALLIH Roocaaniyya elle obtehiyya xale.

¹⁵ Too waqdi Yacadiyel iyyeemih, «Amoytaay, Yuuda kee Yarusalaam ummatey, YALLI siinik iyyamaa, ‹A qaskaray kaxxam mangohiyyak mameysitinaay niya siinik addigille waytaama. Carbi Yalli siinih abele'kkal isin mabtan.

¹⁶ Beera Xiix gitak gaceenih yamaatoonu waan waqdi, qeebi keenit abtaana'gidih foora. Yaruwel magaalah deraafil tan bacarih tan baaxo edde taade exxal tan golo guffu haan waqdi ken geetton.

¹⁷ A carbih qeebi maabinay, inki aracal missowwa 'xicay elle idiya. Too waqdi YALLI siinih yacayu waa nasri isinnih abletton. Tonna'mmay Yuuda kee Yarusalaam magaalah maraw, meysi kee bagbaggoowiyya cabba haay, qeebih eweqa; YALLI sin lih yanik» 'yaanam keenik iyye.

¹⁸ Toh yoobbe waqdi, Yacoosafat Yallih assakaxxah qansa kaak baaxo xagtam fanah qununna 'yeeh; gaabooweh suge mari kaadu usuk abba heem aben. Tokkel suggu 'ye mari gommoh radeeh YALLA yuqbude.

¹⁹ Leewî-kedok Kohat kee Korac akak iyyan mari anay fayya haak, YALLAY Israayil doore Dagelta kinnihiyya faylisen.

²⁰ Nammeyhaytô-saaku dibroh ugutta 'yeenih, Takooqa deqsitta magaala elle tan bacarih tan baaxo fan gexoh ugten. Gexo qimbisen waqdi, Malik Yacoosafat ken lih yaabeeh keenik iyyeemih, «Yuuda kee Yarusalaam magaalah ummatey, siinik axceemihii, YALLAY sin Dagelta kinnihiyyal kibalsita. Tonnal maqar baahetton. Away kay nabuwwa sin lih edde yabte yab eemenaay, tonnal nasri geetton» keenik iyye.

²¹ Yacoosafat isi mara lih malissa heek lakal, Yallih saare aba marak, «YALLIH Qiidih ayro edde gactan sarat gacca 'xicay qaskarak foocat, ‹YALLIH kacni mayambaxak, tohul candu kaah gacisa›, axcuk YALLA saarisak gexa» iyye.

²² Ta mari Yallih saare qimbissa hee waqdi, qeebih keenih amaatuk sugte qaskarat YALLI badit abe.

²³ Qammon kee Mooyab qaskar Edom qaskarat qeebih gexxa 'teeh bayissa ken heen. Tohuk wadir qeebih tittal ufkunna iyyen. Ibak gibdi qeebi tittat aben.

²⁴ Yuudâ-qaskar woo bacarih tan baaxo akak yablen ikke guffu heenih, taaxige qeebih keenih tamaate qaskar fanah wagga heen waqdi, yakkeenimiik baaxok bagul qangalaylut yan maray rabehiyya yublen. Num keenik raaqe'kal yembexeenim keenik yublen.

²⁵ Toh yublen waqdi, Yacoosafat kee kay qaskar ken fanah gexxeeh, keenik raqte duyye buuben. Mango laa kee maaqiddaay, sartan kee, wohuk kalah tan duyyey mango tuxxiq lehiyya keenit geen. Sidooca ayro too duyyeh gaaboysat sugeeniih, ellecaboh duyyê-mangak gexxaamah onkoysoonu efferra heenih elle caben.

²⁶ Fereyhaytoh ayro Beraaka deqsitta golol gaabowna heeniih; too ayro tokkel YALLI keenih abeemih kaa faylisak asen. Too arac tohuk wadir Beraaka deqsitak raaqe.

²⁷ Yacoosafat kee kay qaskar YALLI naqboytiitik keenih yecee nasrih afracuk Yarusalaam fanah yuduuren.

²⁸ Magaala guffu heen waqdi, *begena kee kirar aagarukuuy *baanta kaayisak, YALLIH Qibaadah-Qari fan gexen.

²⁹ Israayil naqboytiitil YALLI baahem toobbe doolatwa inkih cunxitak raaqen.

³⁰ Tohuk gexxaamah Yacoosafat isi baaxol amaanah ackumuk yeneeh; Yalli kulli kabuk kay baaxo amaan abe.

YACOOSAFAT-REEDAK ELLECABO

³¹ Yacoosafat malik yekke saaku qumrik soddom kee koona liggidat yeneeh, labaatanna kee koona sanat Yarusalaam magaalal abbootan luk suge. Kay ina Qaduuba deqsitta barrak teneeh, Silci deqsita numih baxák ten.

³² Kay abba Aasak kaxxih, YALLIH garil cakkik tan taamah taamitak yen.

³³ Tonna'mmay diini-maleela elle taqbude aroocay fayyat raqtahiyya kay dabaanal baateh mananna. Ummat kaadu, isi afqadook ken kaxxa abbobti doore Dageltah qibaadat gaceenih manannon.

³⁴ Ahak kalah taniimiy Yacoosafat malik tikka 'yeemiy rabba 'yem fanah abba heehiyya, Canaaní-Yaahuh Aydaaday Israayil Malikwah Aydaada deqsita kitaabak exxak teenah yanihiyyal geytima.

³⁵ Yacoosafat kaadu Acadya deqsita numuy Israayil malikih yeneeh qamal umaane luk yenehiyya lih qalla haysiteh yen.

³⁶ Qexyon-Gabar deqsita boorul kaxxa badal gexa maraakib bicsen.

³⁷ Too waqdi Elqeeder deqsita numuy Mareesâ magaalal yooboke Doduwaahu baxak yenehiyya Yacoosafak iyyeemih, «Acadya lih qalla haysitteeh, tohuk gexxaamah YALLI atu xissem kok baysele» 'yaanam axcuk garci kaah kale. Woo maraakib yiddigilleeh, badal gexak maraaqinna.