2 Aydaad 2 - NABUWWA KEE MALIKWA

SULEEMAN QIBAADÂ-QARI AKAK XISAN DUYYE KOBXISE

¹ Malik Suleeman, YALLA elle yaqbuden qari xisam faxeeh; isih kaadu elle gaca malik-qari xisam faxe.

² Too xisne abaana'gidih, faxxinta duyyeeya xayyoosa marak malcina-tabanih alfih num bical hee. Bacra-tabanih alfih num kaadu qaleela mango rasul xisnê-xeet oraah missoysa'gidih bical hee. Ken taamak amo wagita marak sidiica alfi kee lica boolih num amol keenik hee.

³ Sarrak Suur deqsitta magaalah malikiy migaaqah Curam deqsitak yenehiyyah farmo ruubeeh, kaak iyyemii, «Duma yi abba Dawud isi qari xise saaku edde xise sariidâ-coox kaah rubteh teneeh; a saaku kaadu yoh tonnah tanim abtam kok faxa.

⁴ Anu YALLAY yi Dagelta kinnihiyyah massakaxxah qari xisam faxa. Xisu waa qari taahirik yan qariy kaa elle yaqbudeeni akkele. Suruy meqe qerto YALLAH elle ruubennooh; kulli ayro kaadu taahirroysen-gaqambo too qaril heenno. Kulli ayro maaca kee carra kaadu kay sadgatah cado akak carrisan saq too qaril asguudenno. Tonnah kaadu sabti ayro kee alsi biloh qiid kee, wohuk kalah tan ayrooray YALLIH qiidih edde asaanahiyya YALLIH migaaqal cado akak cararisan sadgat too qaril abenno. YALLI Israayil ummatak, ‹Taham waarta madqa› 'yaanam iyyeh yan.

⁵ Ni Dagelti, nek kalih mari yalla axcuk yaqbuden duyyek inkih, muxxo le Dagelta kinniimih sabbatah, kaah xisu waa qari kaxxam naba qari akkele.

⁶ Tonna'mmay Yalla tikka 'ya qaran kinni-way yabbixu maduuda. Tonna-leemiik sahdayti kaa yabbixe qari xisu maduuda. Tonna-kinnuk, anu kaah sadgat elle abaanamak fula qari xisam maduuda.

⁷ Toh too tiya'mmay taway kok axcemii, duyyeeyâ-bagul kutbe haah, dahab kee lakqooy nacaas kee birti bicsa yaaxigeeh, tonnah kaadu, kuclinan kee qasdiiminaanaay qisik sari bicsa yaaxige num yoh rubtaama. Too num rubta waqdi, yi abba dumaak abbaxuk suge gabâ naggaarinna le maray Yuudâ-baaxo kee Yarusalaam magaalal yanihiyya lih taamitele.

⁸ Ku mari, coox-garuq kee missoysiyyal nagay tan ixxiga loonum keenik aaxigeh immay, Lubnaan rasuk sariida kee saagan kee gersi coox irgiqay yoh ruubetto. Anu inni kabuk ken catu waa mara ruubeyyo.

⁹ Ta mari, coox-bicsa ku mara luk abele. Xisam faxa qari qax-meqe weeloy nabahiyya aalleleeh; mango coox faxxiimele.

¹⁰ Too taamat yoh tamsissu wayta marah qasbih, namma malyoonih kiilo takke kamadi kee, namma malyoonih kiilo takke gabru deqsitta darooy, affara boolih alfih litri yakke kamriy qinabak bicseenihiyya kee, caxâ xaylok bicsen *zeytik affara boolih alfih litri ruubeyyo» 'yaanam farmoh kaah ruube.

¹¹ Malik Curam too farmol raddi kaal gacseeh iyyeemih, «YALLI isi mara kicna Dagelta kinniimih sabbatah, koo ken malik abe.

¹² YALLI, Malik Dawuduh kas le baxay bagi cubbi leeh, ixxiga akak dudda lehiyya yeceeh yan. Tonna-leemiik kay baxi YALLA elle yaqbuden qari xisaamat yemeeteeh; isih kaadu malik-qari xisaamat yemeeteh yan. YALLAY Israayil doore Dagelta kinnihiyyay qaran kee baaxo yuklukehiyyah fayla taafay.

¹³ Taway yoh rubte farmo yoo gufteeh, kaxxa kas leeh gabâ-naggaarinna kaadu kaxxam le numuy migaaqah Curam-abi deqsitahiyya koh ruubah an.

¹⁴ Ta num abuusam, Daan deqsitta kedooy; kay abba elle yoobokem, Suur deqsitta magaala. Dahab kee lakqooy nacaas kee biriita elle bicsan inna nagay yaaxige. Xeet elle oran inna kee qari xisnet bica coox elle yargiqen inna nagay yaaxige. Tohuk kalah kaadu, kuclinan kee qasdiiminan kee qisik sara elle bicsan inna nagay yaaxige. Tonnah kaadu, *baftak meqe sara elle bicsan inna yaaxige numu. Xeetik bagul taswiir kee kutbe elle haan inna yaaxigeeh, aba kaak axcinnaan taama elle faxxa haan innal abam yaaxige. Ta num yamaate saaku ku maray naggaarinna lehiyya kee duma ku abbah taamitak suge mara lih taamitay kaa axcetto.

¹⁵ Toh tiyaay, tonna leemik anu a num koh ruubah ani'mmay, atu koh ruubeyyo inte kamadi kee gabru deqsitta daro kee qinabak bicsen kamri kee caxâ xaylok bicsen *zeyti (saliid) neh ruubetto.

¹⁶ Lubnaan qaleelal yan sariida kee gersi cooxuk atu faxxa haytah gide irgiqqi heenih koh ruuba, axceyyo. Too coox tittat uxuyya heenih damâ-gurral badal akah tamaate innah abelon. Yaffâ-magaala fan badal koh amaatele. Tokkel matarra akah inteenih, tokkeek Yarusalaam fan ku mari beele» 'yaanam raddih kaah ruube.

¹⁷ Sarrak Malik Suleeman duma kay abba akah abe innah, Israayil addal tan allahih-baaxoh marak loowo takke gide, loowo akak abu waa mara ruube. Too mara lowwa heen waqdi, bool kee kontom kee sidiica alfi kee lica boolih num akkuk sugen.

¹⁸ Too marak malcina-tabanih alfih num a namma qari edde xisan duyye baahaanamih taamat heeh; bacra-tabanih alfih num kaadu qaleelak xeet yaggileeniih missoysaanamih taamat hee. Too mari meqe innah missat taamitem kee taamite weem wagtu waa marak amol, sidiica alfi kee lica boolih num keenik hee.