2 Aydaad 19 - NABUWWA KEE MALIKWA

NABI-YAAHU YACOOSAFATAH SAHTEH

¹ Sarra, Malik Yacoosafat amaanah isi buxay Yarusalaamal tanihiyya fan yemeete.

² Canaaní-Yaahu deqsita nabi kaal yemeeteeh too waqdi kaak iyyeemih, «Uma-taama abaah YALLIH naqabu xagarat le mara lih gacaanam gitah abtem kot celtaa? A saaku atu abtem YALLIH naqabu koh xalteh tan.

³ Tohu'mmay away uxih Yallih garil maqaanek baxaysite num hinnito. Aseera deqsittaamay yaqbudeenihiyyah astah sooliseenih sugen gurumuuda bayisseh. Yallih gita katayak sugte» kaak iyye.

YACOOSAFAT TAYSEEMIT SAHDA ASISE

⁴ Malik Yacoosafat dabqah Yarusalaamal yene'mmay, inki aracal maadayinnay ummattah adda gexam gexak yen. Gabbi-qaxak Bersabaq magaalak xabba haanamaay kilbat le kabuk Efrayim rasuk qaleela mango aracak ragidih amma 'yaanam tan baaxo fan fiiruk geerah safarak suge. Elle gexaamal ummatak, «YALLAY isin akak radden sin kaxxa abbobti doorehiyyal uduura» axcuk ummatah seeco abak suge.

⁵ Yuudâ-magaalooliy gaso maroh edde tanihiyyak kulli magaalal cokmaaba hee.

⁶ Sarrak taama elle aboonu waan inna keenih warse. Keenik iyyeemih, «Cokmi abtan waqdi cubbusak aba. Sin gabal heem, num isih elle faxe innal cokmi akak aba abbootan hinnaay, aham YALLIH taama kinnukuu, cokmi elle teceen aracal, YALLI sin lih yanim mahabbaalina.

⁷ Cokmi abtan waqdi, YALLIH meysi taalleenimi; abtan cokmi cubbusak abtaanama. Macaay inteenik, YALLAY ni Dageltah yani cokmil sinam yadlumeenim kee, isinnih akah faxen marah iyyaanam kee, guqul beyaanam maqansiisa» 'yaanam keenik iyye.

⁸ Yarusalaam addal Yacoosafat Leewih yooboke mara kee seeka cokmaaba reedise. Tohuk kalah, baaxô-xaylok tu takkem cokmaaba abe. Too reeda keenih akah yeceemii, YALLIH xinto intam abe cinee kee, hinnay kaadu, magaalah addal yan marak titta waa mari yenekii, yab keenih abaana'gidih ken hee.

⁹ Too marah kaadu too taama elle aboonu waan inna warse. Keenik iyyeemih, «A taama abtan waqdi YALLIH meysi xagarat taalleenim faxxintaah, abba haytaanam isinni afqadook qadaalatat abtaanama.

¹⁰ Sin toobokok faxe num takkuu, faxe magaalak takku, nabsit aseh suguu, hinnay kaadu, faxe madqa kee Yallih xinto intaamak amo koreh sugek, sin fan ken baahan waqdi, isin cokmi abtan waqdi YALLIH garil qellat le mara akah akke waan innah meqe gita ken barisa. Toh abe wayya hayteenik, Yallih naqbi sin kee ken maade'kal maraaqa. Takkay immay isinni taama meqe innal gexsisseenik, qellatak cattiimetton.

¹¹ Kaxxa seekih yan sek Amarya diini qaada wagga haytaamak abbah siinik yan. Yuudâ-kedoh abbah yan Ismaaqíl-Dabadya ayyunta wagga hayta qaadak tu edde taadee saqalah siinik yan. Leewih mari yekke cokmi abinal asem kee ase weem wagita marah yanin. Tonna'mmay tahaysa niya siinik salace ikkal ta taama digga luk abtaanama; YALLI cakkih taamita mara lih siinik yanay» keenik iyye.