2 Aydaad 16 - NABUWWA KEE MALIKWA

ISRAAYIL KABUK YEN GIBDAABINA

¹ Aasa malik yekkeemih soddom kee leceyhaytô sanat guffu hee saaku, Malik Baqsa Yuudâ-rasu warareeh, sinam Yuudâ-rasu awqe waytaah afak akah cule wayta innah, Raama deqsitta magaalat maro haam qimbise.

² Toh yuble waqdi, Aasa isi qarih adda kee YALLIH Qibaadah-Qarih addal daanat sugte lakqo kee dahooba wokkek yeyyeeqeeh, Damaskoh magaalal Suuriyah malikih yen Banihadad deqsita numuh ruube.

³ Afti farmoh ruubeemiih, «Duma ni abbobti qalla luk sugteeh; tonna'mmay ahaysa koo kee yoo ni abbobtik kaxxih, qalla haysinnaama. Ama dahab kee lakqo mattacoh koh ruubah an. Tonna'mmay Malik-Baqsay Israayil malikih yanihiyyak qaskar yi baaxok akah tawqe innah, kaa'lih lito qalla kaak targiqeemi» 'yaanam farmoh kaah ruube.

⁴ Malik Banihadad too farmo kaak oggoleeh, sarrak Israayil magaalooli yabbixeeni'gidih, qaskar abbobti kee qaskar ruube. Too qaskar Qiyon kee Daan kee Aabil-Beet-Maqka deqsitta magaalooli kee, inkih tan Naftaalih kedoh magaalooliy leek maaqo akak inxicca 'yaanam daanah elle sugtehiyya yibbixen.

⁵ Malik Baqsa a xaagu yoobbe waqdi, Raamâ-magaalay maro edde haak sugehiyya fanak cabe.

⁶ Baqsa gexek sarra, Aasa inkih yan Yuudah rasul tan ummattah seeco abba heeh, Baqsa Raamâ-magaalat maro haa'gidih baaheh suge xeet kee coox weerra heeh; sarrak Gabaq kee Mixfa deqsitta namma magaalah gaso maroh edde xise.

CANAANI DEQSITA NABI BAAHE FARMO

⁷ Too dabaanal, Canaani deqsita nabi malik Aasal yemeeteeh, kaak iyyeemih, «Atu YALLAY ku Dagelta kinnihiyyal hinna'mmay, Suuriyah malikih qaskaral kibaal hayteemih, Suuriyah malikih qaskar kok tisillimeh.

⁸ Macaa, mangah tu gactek, Kuus kee Liibiya loowo sinni gaariiray qaskar qeebi edde abtahiyya kee mango qaskaray faras amok qeebi abtahiyya luk tene'mmay, woo saaku YALLAL kibaal hayteemih sabbatah, YALLI keenik koo yiysiseh.

⁹ YALLI afqadook kaa yaamine marah qande yecee'gidih, inkih yan baadat cubbi le. Tonna'mmay ku tiyah tu gactek, duqur-taamat asseeh; tonna-leemiik ta saakuuk wadir carbi ku amok makata» kaak iyye.

¹⁰ Malik Aasa toh kaak iyye waqdi, nabam yinqibeh. Too waqdi, «Silsilatat kaa uxuya» iyyeeh kaa casbiseh. Too ayrok wadir sinaamak garabal umam baaha num yekke.

AASAL ELLECABOL TEKKEEMI

¹¹ Aasa reedda 'yeemiy rabba 'yam fanah abba heemii, ‹Yuuda kee Israayil Malikwah Aydaada› deqsita kitaabih addal tan.

¹² Malik edde yekke soddom kee sagalhaytô sanatat, ibak gibdi biyaakah biyaakiteeh, ellecabol aracal yekke. Woo biyak kaa yibbixe saaku kinni-way, catoh YALLAL makibalsitinnay dayla-aba fan gexe.

¹³ Namma sanatak lakal rabeeh,

¹⁴ Yarusalaamak Dawud-Magaala deqsita caafatal, boolok gubat isi bicsiteh suge kabrih addat kaa yoogoqen. Kaa yaaguqeenimik dumal, ginaada kaak qatri kee saliidit yuskuteeniih; kaxxa gira kay massakaxxah ursen.