2 Aydaad 15 - NABUWWA KEE MALIKWA

YALLI AASA GABAT MUDE GITA

¹ Ayrok teena Qooded baxa Qadaryal Yallih Roocaaniyya obteeh;

² too num tohuk lakal malik Aasat matra'gidih gexe. Anay fayya heeh deero kaah abeeh, «Malik Aasaw, yoo ankacis. Yuuda kee Benyam maraw, kaadu yoo ankacisa. Isin YALLIH mara tekkeenik, YALLI kaadu sin lih anele. Niya kaa fanah hayteenik, kaa gee liton. Takkay immay darre kaat cabteenik, darre siinit cabele.

³ Mango dabaanah Israayil mari nummâ-Yallak yexxeereenih sugeeniih, kay xintok kaadu yexxeereenih sugen. Kay xinto ken barissa seeka luk masuginnon.

⁴ Takkay immay gadaama ken tibbixe saaku kaal yuduureeniih, YALLAY Israayil doore Dagelta kinnihiyya fan niya haysiten. Kaal yuduureeniih, kaa geen.

⁵ Too dabaanal kulli baaxol mango gibdaabina kee amaan-sinna teneeh; tonna-leemiik akak gexe ikke amaanah yaduure num masuginna.

⁶ Doolat doolatat xukkutakaay, magaalak teenal yan mari, gersi magaalal yan maral umam baahak yen. Tohum akah akkuk tenem, Yalli isi makkok gadaama kee gibdaabina sinaamal oobisak sugeemih sabbata.

⁷ A saakuh tu gactek, agiira takkeenim siinil taniih; niya siinik baxaqe waytaama. A saaku abtan taamah galto Yallak geetton» keenik iyye.

⁸ Aasa a nabi edde yaabe yab yoobbe waqdi, niya kaat gacteeh; tonna-leemiik Efrayim rasuk qaleela le aracal tan magaalooliy qeebit yibbixe kee, Yuuda kee Benyam rasul sugga 'te duyyeeyay gabak bicissa heenih aqbuduk sugeenihiyya wonnah baaxot qide. Sarrak YALLIH Qibaadah-Qarih daaratal suge mansafay YALLIH sadgatah saqa elle asguuduk sugeenihiyya yuqusbuuse.

⁹ YALLAY kay Dagelta kinnihiyya kay xaqut yanim yublen waqdi, Efrayim kee Manasse kee Simqaanal suggu 'ye mari usuk malikih elle yan baaxo yemeeteeniih, dabqah tokkel gacen. Sarra, Aasa too mara kee Yuuda kee Benyaamah yooboke marah seeco abe.

¹⁰ Too mari, Aasa malik edde yekke taban kee konoyhaytô sanatak sidochaytoh alsat Yarusalaam magaalal gaaboowen.

¹¹ Too ayro dannabah orbisen laa kee illi kee wadar YALLIH sadgatah qiden. Laak malcina boolih saga kee, illi kee wadarak kaadu malcina alfi yusguuden.

¹² Tokkelii, «Tahaysah, YALLAY nanu akak radne ni kaxxa abbobti doorehiyya baguuk aqbudenno» 'yaanam iyyeeniih, too tiyal sittin-gey haysiten.

¹³ Barak qunxa num takkay, idaltu takkay, say-num takkay, lab-num takkay, YALLAY Israayil doore Dagelta kinnihiyya aqbude waa numul rabi cokmi haanamal titta geen.

¹⁴ Anay fayya haak, «Ta saaku titta elle geyya hayneh madaqnemii, arac xagisennoomuh YALLIH migaaqal xiibinnah nan» 'yaanam axcuk xiibiten. Sarrak qaffaydah baanta yoogoren.

¹⁵ Too ayro gaabowwa 'ye mari, inkim axcuk ta tiyal isinni afqadook titta geenimih sabbatah, kaxxam ruffa iyyen. YALLA yaqbudeenim kaxxa rufto keenil tekkeeh; YALLI oson aban qibaada keenik raabiteh. Tonna-leemiik elle yanin baaxok kulli exxa amaan keenih abe.

¹⁶ Malik Aasak aboyyah ten barray migaaqah Maqka deqsitak teneh ‹Inah tan maliká› 'yaanam akah axcuk sugeenihiyya woo abbootanak kaleh. Tet abbootanak akah kalem, say-yalla akak iyyan duyyey migaaqah Aseera akah iyyaanahiyyah gurmudday umâ-yabulih-tani soolisseh sugte. Woo duyye wokkek kallaay iggiggilla heeh, Kidroon-goloh addal girat carrise.

¹⁷ Israayil baaxol kaak duma sugga 'te qibaada elle aban aroocay fayyat raqtahiyya inkih mabaysinna'mmay, addunyal sugem fanah, YALLAL leh yan imaan digga kaak luk yen.

¹⁸ Kay abba kaak dumal Yallih qibaadah orobta'gidih heeh suge duyye kee, usuk isih Yallih qibaadah taamat asisa'gidih rikeek heeh suge dahab kee lakqo kee gersi duyye bahha heeh, Yallih Qibaadah-Qarih addal hee.

¹⁹ Tohuk wadir Aasa malik edde yekke soddom kee konoyhaytô sanat guffa haam fanah baaxol carbi masuginna.