2 Aydaad 14 - NABUWWA KEE MALIKWA

MALIK AASA, KUUS RASUK QEEBIL YEYSE

¹ Malik Abiyya rabe saaku, Dawud-Magaala deqsita caafatal kaa yoogoqen. Kay baxi kay lakal malik yekkeeh; migaaqah Aasa deqsitak yen. Malik Aasa malikih suge tabna sanatih addat kay baaxo amaanah xiinak sugte.

² Aasa YALLAY kay Dagelta kinnihiyya kicnam abakaay cakki gitat gexa malikik ten.

³ Kaak duma sugte mansafittey sadgat elle abak sugeeni kee fayyat raqta aroocay duyyeeya elle aqbuduk sugeenihiyya wokkek kaleh. Taahirik tan qamidwa akak iyyan qamidway xeetik bicseenihiyya kee Aseera deqsittaamay yaqbudeenihiyyah astah heenih sugen gurumuuda bayseh.

⁴ Yuudâ-marak, «Ummatey, YALLAY nanu akak radne ni kaxxa abbobti doorehiyya faxam aba. Kay xinto intam kee kay amri duudusa» axcuk yen.

⁵ Yuudâ-magaaloolik kaak duma sugte diini-maleela qibaada-elle-aban-aroocay fayyat raqtahiyya kee qaydarus elle qeerisak sugen arooca bayisak sugeeh; tohuk gexxaamah usuk malikih suge saaku kay baaxo amaanah sugte.

⁶ Baaxo amaanah sugte sanoota Yuudâ-magaaloolit gasoosa maroh hee. YALLI kay baaxo amaan kaah abeemih sabbatah, too sanoota kay rasul qeebi kee carbi masuginna.

⁷ Yuudâ marak iyyeemihii, «Ninni magaaloolit gaso maroh haynaay; fayya 'ta aroocay takkem akak nablehiyya amol akak xisnaay; gasot magaala akak culan afay fanxa way faknaah fanxa way alifna akah haynay. Tonnal faxe waynam magaalah adda culi mahayna» iyye. Qagseh keenik iyyeemih, «Ninni baaxo ninni milkih nabbixeeh; toh akah kinnim, YALLAY ni Dageltah yanihiyyah amri duudusneemih taaga. Kay fayxi oggolneemih taagah kulli kabuk dacayrit nee yabbixe» keenik iyye. Too mari toh oggoleeh; xiseeniih, ken gabal bicteh.

⁸ Sidooca boolih alfi qaskariitay Yuudah yoobokehiyya luk yeneeh; yakkeenimiik gob kee macaxu tikiyah luk yenen. Benyam kedoh yooboke marak kaadu namma bool kee bacra-tabanih alfih qaskariita luk yeneeh; silaacah gob kee gaysê-baxa luk yenen. Yakkeenimiik nagay tan qaskaray baritto kee agiirinna lehiyyak yenen.

⁹ Ayrok teena Dara deqsita numuy Kuusuh yoobokehiyya malyoon qaskariita kee sidiica boolih faras-gaariy qeebi edde abaanahiyya haysitta heeh, Yuudâ-rasu yabbixe'gidih, Mareesa deqsitta magaala xaqu yemeete.

¹⁰ Aasa qeebi kaat aba'gidih, elle suge ikkek yemeete. Sarrakaa, Dafaata-Golo deqsita aracay Mareesâ magaalat xayuk raaqahiyyal fooca kee foocah gacca 'yeenih qeebih bicsiten.

¹¹ Tokkel qeebi radaamak dumal, Aasa YALLAY isi Dagelta kinnihiyya fan dooqa abeeh; dooqah iyyeemih, «YALLAW, boola-le-qaskar cayla-le-qaskarak qeebil taysiisem koo. Nanu, ni Dageltaw, kibaalah linom koo kinnuk, a gid takke qaskaray loowo sinnihiyyat qeebi abna'gidih ku migaaqal ugunneh nan. YALLAW, nee cat; nee doortem koo. Kok taysem matana» iyye.

¹² Sarra qeebi radeeh; Yuudâ-qaskar ken dadahteeh qeebi keenit abte. YALLI qeebil Kuus marak ken yiysiiseenih; Kuus mari kudeh.

¹³ Aasa kee kay qaskar lakak ken ayradduk Giraar-magaala ken baahen. Kuus qaskarak mangom rabteemih sabbatah, amo sittal gacissa heenih wadir qeebi elle aban inna luk maraaqinnon. YALLIH qande ken lih teneemih sabbatah, Yuudâ-mari keenik yeyseeh mango duyye keenik buuben.

¹⁴ Tohuk lakal Giraar dariifal ten magaalooli keenik bayseeniih; wokkel suge mari YALLIH abitto yoobbeenih yeneenih, tonna-leemiik cunxoh axaxitak gaba gacsitoonu yeffereenih. Qaskar magaalal sugga 'te duyye keenik buubeeniih mangom dannabah keenik orbisen.

¹⁵ Tohuk kalah gaala kee illi elle orbisak sugen arooca buubeeniih, gaala kee illik mangom dannabah keenik orbisen. Tohuk wadir Yarusalaam magaala fanah yuduuren.