2 Aydaad 13 - NABUWWA KEE MALIKWA

ABIYYA, YAROBQAM LIH ABE CARBI

¹ Yarobqam Israayil malik edde yekke taban kee bacarhaytô sanatat, Abiyya Yuudâ-malik yekke.

² Yarusalaamal sidiica sanatah malikih suge. Kaak ina Mikaaya migaq luk teneeh, tet abba Uriyel deqsita numuy Gibqa deqsitta magaalal yoobokehiyyak ten. Ayrok teena Abiyya kee Yarobqam fanal carbi rade.

³ Abiyya too carbih affara boolih alfih qaskariita ugseeh; Yarobqam kaadu is le kabuk bacra boolih alfih qaskariita ruube.

⁴ Carbi keenik elle radem, Efrayim rasuk qaleela mango aracak ten. Malik Abiyya Xamaraayim migaq le qaleh amol bukka 'yeeh tokkeek Yarobqam kee Israayil marah deerise. Keenik iyyeemih, «Israayil maraw, yoo ankacisa.

⁵ YALLAY Israayil doore Dagelta kinnihiyya, Dawud kee Dawuduk rade marah way baye waa xagana culeeh, ‹Sin durruyyat baxi-baxih dabaanah Israayil-malikwa akkele› keenik iyyem kassa mahaytaana?

⁶ Nabat baxa Yarobqam duma Malik Suleemanay isi amoytah sugehiyyak qaduwwih suge.

⁷ Sarrî-daban kaadu anfiqe sinni maritteeta gaabossa heeh, kaak raaqe baxay woo saaku qunxaaneey ixxiga boola kee kasih dagna lehiyyat qeebi abe.

⁸ Ta saaku kaadu isin Dawuduk rade maray YALLI isih dardaarinna akah yeceehiyyat qeebi abtaanamal malissen. Kaxxam mango qaskar haysittaay dahabak bicissen daheelah ceeloy Yarobqam siinih bicseeh yalla axcuk taqbudeenihiyya haysitta hayteeniih,

⁹ YALLIH seekay Haaruunuk raddehiyya baaxok xiiriyteenih Leewih yooboke mara kaadu baaxok teyyeeqeenih, ken aftok Yalla maleela akah abta innah, isinnih dooritten maray seekâ-samad alle waahiyya yallah liton duyyeeya elle taqbuden aracal seekah haysitten. Dahaltu kee malcina maruw baahinnaan numuk, ‹Isin seeka tekkeenih› intan.

¹⁰ «Ni tiyah tu gactek, YALLAY ni Dageltah yanihiyya naqbudeeh kaak maxxeerinnino. Sek Haaruun-duruyyat uxih seekah linooh, Leewih yooboke mara ken catot nabbixe.

¹¹ Kulli saaku kee carra carra YALLIH qibaadah qaydarus qeerisnaah kay sadgatah inkih tan cado akak carrisna saq nasguude. Seeka YALLIH sadgatah miiz amol haak yenen taahirroysen-gaqambo uxih hayta. Magribik wadir dahabak bicsen caxxay daabiseenihiyyah bagul tan faanusway kaadu dahabak bicseenihiyya ursan. Nanu YALLAY ni Dagelta kinni nee akah amrisem abnah immay isin kaa cine mara tekken.

¹² Qeebil Yalli isih nee miraaciseleeh; kay seeka qeebi sin lih abnu wayna waqdi, taaguru wayta *baanta taagure'gidih bical tan. Tanna'mmay Israayil ummatey, siinik axceemihii, YALLAY isin akak radden sin kaxxa abbobti doorehiyya lih qeebih abtaanam maduddaanak mataqabina» 'yaanam keenik iyye.

^13-14 Usuk too yaabat yan waqdi, Yarobqam isi qaskarak tu takkem ruubeeh, «Gexay darre le kabuk gacca 'xicay qeebi keenit elle abtoonu waytan ikket sasot suga» iyye. Yuudâ-mari Yarobqam fanah afkunuk sugeeh, darre le kabuk tamaate qaskar garciteenih. Sarrak wonnah darre le kabu wagga heen waqdi, Israayil-qaskar marot ken tabbixem yublen. Too waqdi, «YALLAW nee cat» axcuk Yallat xaaqimen. Seeka qeebi qimbisa 'yaanamih astah baanta toogoreeh;

¹⁵ qaskar qeebih tirtirisse. Too waqdi too qeebil Yalli, Abiyya kee Yuudâ mara, Yarobqam kee Israayil qaskarak yiysiiseh.

¹⁶ Israayil-mari, Yuudah yooboke marak yoowwe. Yalli Yuudâ-marih gabal ken hee.

¹⁷ Abiyya kee kay qaskar kaxxa qawwalayla keenit abteeh, Israayil qaskarak koona boolih alfi takkem qiden.

¹⁸ Too qeebil Yuudâ mari kaxxa nasri geeh; too nasri akah geenimii, YALLAY ken kaxxa abbobti doorehiyyal imaan heenimik ten.

¹⁹ Abiyya Yarobqam qaskar lakak ayradduk xiiriyya ken hee. Yarobqam abbootanah amol akak yen magaaloolik tu takkem yibbixeh. Tohumuu, Beetal kee Yasaana kee Qefron kee too magaaloolih dariifal ten gaandoodik ten.

²⁰ Yarobqam tohuk wadir Abiyya malikih suggu 'yem fanah, luk suge milki luk maraaqinna. Sarrak YALLI uma rabah kaa qide.

²¹ Abiyyah tu gactek, abbootanah aysuk yeyse. Addunyal suge saaku xaylok lab-xayloh labaatanna kee nammay kee, say-xayloh taban kee lecey xale. Agabuk taban kee affara barra abite.

²² Tahamak kalihimiy Abiyya abba heehiyya kee edde yaabe yab Nabi-Qiddoh-Aydaada deqsita kitaabih addal tan.