2 Aydaad 11 - NABUWWA KEE MALIKWA

SAMAQYA TAKKU WAYTAAMAT YAABE

¹ Malik Racabqam Yarusalaam magaala gufe waqdi, Benyam kee Yuudâ kedoh addak bool kee bacra-tabanih alfi takke qaskaray dooro lehiyyah seeco abeeh, inki'kkel ken gaaboyse. Toh akah abem, kilbat le kabut raqta Israayilih ummattah amol malikih gacam faxak yen.

² Takkay immay too qaskar qeebih ruubaamak dumal, YALLI nabi-Samaqya lih yaabeeh,

³ Malik Racabqam kee, Yuuda kee Benyaamah yooboke marah farmo ruube.

⁴ «Keenik intaamah, ‹Israayilih mari sin tooboko'mmay, qeebi keenit maabinaay; away tikka 'tem inkih yi fayxik tekkeemi'mmay, takkeenimik inkih isinni buxah uduura› keenik inxic» iyye. Too mari YALLIH amri oggoleenih, yakkeenimik isinni buxah yuduuren.

RACABQAM MAGAALOOLIT MAROH GASOOSA HEE

⁵ Tohuk wadir Racabqam Yarusalaamal elle raaqe. Tokkel gacca 'yeh Yuuda kee Benyam magaaloolit gaso maroh hee.

⁶ Gaso maroh edde heemii, Beetlacam kee Qetam kee Takooqa kee

⁷ Beet-Xur kee Sooko kee Qadullam kee

⁸ Gat kee Mareesa kee Diif kee

⁹ Adoraayim kee Laakis kee Qadeeka kee

¹⁰ Xorqa kee Ayyaalon kee Cebron deqsitta magaaloolik ten.

¹¹ Too magaaloolit hee gasoosa kaxxam maqar luk ten. Kulli magaalak abbah qaskar abbobti hee. Kulli magaalal leek maaqok xagga hoonu waanam keenih hee. Tohuk kalah caxâ xaylok bicsen *zeyti kee qinabak bicsen kamri kulli magaalah adda keenih bahsiiseh yen.

¹² Gob kee macaxuk faxxintah gide too magaalah addal abbaxuk yen. Tohuk gexxaamah Yuuda kee Benyam mara kee ken baaxo isi gubat abbaxuk yen.

SEEKAAY LEEWIH YOOBOKE MARI YUUDÂ-BAAXOL GACE

¹³ Israayil rasul sugga 'ta Leewih yooboke mara kee seeka tokke cabba hayteh, gabbi-qaxat raqta Yuudah baaxo fanah yemeeten.

¹⁴ Leewih yooboke mari, Israayil-rasul luk sugen qarwa kee lacti malaalah baaxo cabba heenih, Yuudâ rasu kee Yarusalaam fanah yemeeten. Toh akah abeenimii, wokkel malikih suge Yarobqam deqsita malik kee kaak ciggilte malikwa, seekay YALLIH taamat sugtehiyya a taama abe kaleeniih; tohih faxe waytih Israayil rasu cabeenih Yuudâ-rasu fan yeerren.

¹⁵ Malik Yarobqam isih malikih elle suge baaxol, Yallih aftok duyyeeya elle yaqbuden aroocay fayyat raqtahiyyal isih doorite maray seeka akak iyyahiyya hee. Too aroocal dabeela kee daheltih ceelo aqbuduk yenen. A ceeloola akak bicseenim, cooxuuy xeet kee dahabak ten.

¹⁶ Inkih yan Israayil marih addakaa, isi afqadook YALLAY Israayil doore Dagelta kinnihiyya yaqbudem faxa mari, YALLAY oson akak raden ken kaxxa abbobti doorehiyyah sadgat abaana'gidih, Leewih yooboke marih lakat Yarusalaam magaala fan gexen.

¹⁷ Too mari malikih suge Suleemán-Racabqam cateeh; tohuk gexxaamah, Yuudâ-baaxo maqar baahak maacisse. Tonnal, sidooca sanatah, Dawud kee Suleeman raat katayak xiinen.

RACABQAM BUXAH MARA

¹⁸ Racabqam Mahlat deqsitta barra digibih abite. A barra Yerimot deqsita numih baxák ten. Yerimot Dawud baxak ten. Mahlat Dawuduk baxi baxák ten. Ina teetik Abicayil deqsitta barrak ten. Abicayil kaadu Aliyab akak iyyen numih baxák teneeh; Yiisa deqsita numuy Dawud xalehiyyak baxi baxák ten.

¹⁹ Racabqam a barrat xaylok sidoc luk yen. Migaaqah Yaqus kee Samarya kee Daham deqsitak yenen.

²⁰ Sarrak kaadu Absalaam baxá abteeh; too awká migaaqah Maqka deqsitak ten. Too barrat lab-xayloh fereey xale. Migaaqah Abiyya kee Qattay kee Diida kee Seloomit keenik axcuk yenen.

²¹ Racabqam-agbi tittat taban kee bacra akkuk yeneeh, wohuk kalah kaadu, caggô-gubih caggoh nikaacat yabbixe agabuk lactam luk yen. Xaylok kaadu lab-urrih labaatanna kee bacra kee say-urrih lactam luk yen. Nikaacat abbaxuk yen agabuk inkihii, kacanuh Maqkah lafitak yen.

²² Xaylok kaadu Abiyya deqsita lab-baxah lafitak yeneeh; kay lakal malik yakke'gidih xaylok addak kaa doore.

²³ Racabqam abam kasat abak yen. Xaylo elle gactu wayta arooca kee abbootan meqe innal keenih kureeh; Yuuda kee Benyam rasul tan magaalooliy gasoosi maroh edde tanihiyyak kulli numuh elle gacu waa magaala kee yaallu waa abbootan naharal elle keenih yecee. Cindah mango mattaco keenih yeceeh, mango agabu digibih keenih abe.