2 Aydaad 1 - NABUWWA KEE MALIKWA

MALIK SULEEMAN QAKLI GEYA'GIDIH DOOQA ABE

¹ YALLAY Dawud baxa Suleeman doorehiyya, Suleeman lih yeneeh, kaxxa num kaa abe. Tonna-leemiik usuk kaadu is le kabuk isi abbootan nagay maqar bahsiise.

² Ayrok teena Suleeman, Israayilik alfi-alfi kee bool-boolul kurrunte qaskarak abbobtih yen mara kee, cokmi-abeenit kee inkih yan Israayilik kedoh abbobtih yan marah inkih seeco abe.

³ Too waqdi Gibqon deqsita magaalal yen aracay Yalla elle yaqbudeeni fan ken lih gexe. Tokke fan akah gexeenim, Yallih Nabnah-Siraq tokkel yen. YALLIH naqasuh yan Muusa addunyâ-bagul yen saaku, bacarih tan baaxol woo siraq bicseenih yenen.

⁴ Yallih Qahdi addat akak yan Sandug Yarusalaam magaalal Malik Dawud soolise siraq addat daanat yen. Malik Dawud a Sandug Kiryat-Yaqaarim deqsitta magaalay elle sugehiyyak bahha heeh, Yarusalaam magaalal hee.

⁵ Takkay immay nacaasak bicsen mansafay Yallih sadgat elle abaanahiyya Gibqon deqsita aracal Yallih Nabnah-Siraqih foocal sooliseenih yenen. Too mansaf bicissem, Baxalal deqsita numuk ten. Baxalal, Uuri akak iyyan numuk baxak teneeh, Cuur akak iyyan numuk baxi baxak ten. Suleeman kee kaa'lih temeete Israayil ummatta Yalla elle taqbudem too aracak ten.

⁶ Suleeman Yallih Nabnah-Siraqak foocal yen nacaasak bicsen mansafak bagul YALLAH sadgat abe. Inkitanuuk cado akak cararisan sadgatak alfi takkem YALLIH sadgatah woo mansafih bagul cararise.

⁷ Too bar Yalli Suleemanah soonol yumbulleeh, kaak iyyeemih, «Maca koh abam faxxaah, yoo esseritey» iyye.

⁸ Suleeman Yallak iyyemii, «Yi abba Dawuduh kaxxa kacanu luk sugteeh, yoo kaadu kay lakal kay aracal malikih hayte.

⁹ Dageltah yan YALLAW, naharak yi abbah culte xagna yoh duudussam kok faxa. Ku ummattay mangah loowo akak duudume waytahiyyah abba yoo abteh tan.

¹⁰ Tonna-kinnuk, Dageltah yan YALLAW, ta mara inkih edde xiinissa haa kas kee ixxiga yoh ucuy. Too kas aalle week, a axxul le ku mara qadlit xiinisam maduuda» iyye.

¹¹ Yalli too waqdi kaak iyyemii, «Meqem dooritte. ‹Gaddaliino faxa› maxaccitooy, ‹Mango midir faxa› maxaccito. ‹Migaq-gexxo faxa› kaadu maxaccitooy, hinnay kaadu, ‹Naqboytiitih yok yan mara yoh qid› yok maxaccito. Kaadu ‹Qumri yok eyxeer, yi Dageltaw› 'yaanam yok maxaccito. Tohuk tu yoo messerinnitoy, ‹Atu abba yoo akak abteh tan ku mara edde xiinisa'gidih kas kee ixxiga yoh ucuy› yok inte.

¹² Too atu faxxe kas kee ixxiga koh aceeyyooh; toh lih kaadu, faxe malik duma luk suge weeh, sarra geyak raaqe wayu waa mango gaddaliino kee kaxxa midir kee migaq-gexxo koh aceeyyo» kaak iyye.

¹³ Sarrak Suleeman Yallih Nabnah-Siraq elle yen Gibqoonuk Yarusalaam magaala fan yuduure. Tokkel anuk Israayil mara xiinisak yen.

SULEEMAN LUK SUGE MIDIRI

¹⁴ Suleeman alfi kee affara bool takke gaariiray faaris beyta kee, taban kee namma alfih farasay qeebi abtahiyya gaabossa hee. Tohuk tu takkem Yarusalaamal abbaxuk yeneeh, wohuk kalihim mango magaaloolil kaak ten.

¹⁵ Suleeman dabaanal lakqo kee dahab xeet manga luk teneeh; *sariidâ coox kaadu, mango-koomaami le baaxol tan *sublah innah qadad cabeh yen.

¹⁶ Malik afak yen mari faariisa akak xaamak yenem, Masri baaxo kee Kiiwu deqsita aracak ten.

¹⁷ Faaris-gaariira kaadu Masrik baahak yenen. Inki gaari lica boolih garsih keenik xaamakaay, faras kaadu bool kee kontom garsih keenik xaamak yenen. A mari sarrak Ciita kee Suuriyah malikwal inkih a duyye aylammuk yenen.