1 Samuwel 9 - NABUWWA KEE MALIKWA

SAAWUL SAMUWELIT YONGOOROWE

¹ Gaddalih yan numuy sahda yab akak taabbehiyyay migaaqah Kees deqsita yeneeh; usuk akah yoobokem, Benyam kedok ten. Kees Abiiyel deqsita numuk baxak teneeh; Xaaror deqsita numuk kaadu baxi baxak ten. Afiyác-Bakorat deqsita gulubuh aabakuk yen.

² Usuk lab-baxay migaaqah Saawul deqsitahiyya luk yen. A awki xagar maqaane kee furrayniino luk yeneeh; xexxaarah kaa aleltam Israayil addal mananna.

³ Keesik okaale cerritteh morbinna. Too waqdi Kees Saawuluk, «Taamâ-marak numuk teena is lih hayya haay, okaaley bayte gorris» kaak iyye.

⁴ Num wakalih is lih hayya heeh, qaleela le Efrayim baaxo kee Saliisa deqsita baaxo fan gexen. Tokkel woo okaale magennon. Tokkeek Saqlim deqsita aracal kaadu gorriseeniih magennon. Sarrak Benyam baaxo akah gexeenih gorriseeniih, tokkel kaadu magennon.

⁵ Tohuk wadirii Xuuf deqsita baaxoh yemeeten waqdi, Saawul wakalih kaa'lih yan kay taamat yan numuk, «Yi abba nee weeki, okaale hinnaay ni-amoh cisab kaa abbixelek, ahaysa buxah nee gacis» kaak iyye.

⁶ Kaa'lih yan num, «Sug! Ama magaalal Yallih numuy kaxxam yassakaxxeenihiyya yaniih, usuk akkele inxicca 'yem inkih takkek, kaa fan nee bey; usuk okaale elle geyna'kke neh warsam takkek» iyye.

⁷ Saawul, «Kaal genxa waqdi maca kaah aceenno? Olot luk sugne maaqo tembexeeh, Yallih numul foyyâ-gabah genxam mameqek, gabat tu maay lino?» iyye.

⁸ Kay taamat yan numuu, «Lakqok dagoom gabat abbixeeh; woo lakqo kaah aceenno. Too waqdi woo okaale elle geynu wayna ikke neh warsele» iyye.

^9-11 «Ah meqe yaabak, nee bey hay» iyye. Too waqdi woo Yallih num elle yani'kke fan gexen. Woo magaala elle tan koomah amo awaquk sugen waqdi, lee baaha'gidih gexa baxuw keenit yongoorowe. Woo baxuuwuk, «Tu-yaaxigi magaalal elle yanii?» iyyen. Woo dabaanal Israayil baaxol nabik ‹Tu-yaaxigi› axcuk yeneenih, num Yallal tuk teena esseram faxek, ‹Tu-yaaxigil nee bey› axcuk yenen.

^12-13 Woo baxuwuuy, «Yeey yanih, away siinik foocat gexe. Sissikuk gexxeenik, kaa gee liton. Magaala akah culten innaak kaa geetton. A saaku ummatta Yallih migaaqal sadgat elle aban aracal sadgat abeloonuuh; tohih sabbatah usuk magaala yemeete. Woo arac akah seecen mari, usuk amma 'yeh dooqa abe'kal, woo sadgatih maaqo mayakman. Taway gexxeenik, maaqo makumuh woo sadgat elle aban qale awqe'kal siinih sugele» keenik iyyen.

¹⁴ Saawul kee kay taamat yen num woo magaala fan gexan waqdi, Samuwel woo sadgat elle aban arac fan gexa'gidih, ken fanah amaatih yublen.

¹⁵ Naharsi ayro YALLI Samuwelik,

¹⁶ «Beera ta uddur Benyam kedoh yaabuke num kol ruubeyyok, Israayil amoyta yakke'gidih kaa uskut. Usuk Filistiin marih gabak Israayil catele. Yi mari abe biyak kee catô-goranah aben weeqa keenik oobbeh an» 'yaanam iyyeh yen.

¹⁷ Away kaadu Samuwel Saawulut radda 'ye waqdi, YALLI annah kaak iyye, «Amah koh warse numuuy; yi mara xiinissu waytam kaa» kaak iyye.

¹⁸ Sarrak Saawul Samuwel fan amma 'yeh, « ‹Tu-yaaxigi› elle yanim mankeey?» kaak iyye. Too waqdi Samuwel gasoh afal suge.

¹⁹ Samuweliiy, «Tu-yaaxigi ah yoo» kaak iyye. «Woo sadgat elle aban arac yok naharat gexay suga. A saaku sin nammayak maaqo yo'lih akmetton. Beera saaku, lito esseroora koh gacsek wadir, isinni gexoh gexetton.

²⁰ Woo sidiica ayrok duma baateh sugte okaaleh tu gactek, woo okaaleh macisabbootin; geytintehik» kaak inxicca 'yeh; tonna luk kaadu kaak iyyeemih, «Israayil mari kaxxam faxam miyyaay? Israayil mari faxam koo. Koo kee ku abbah buxah mara» kaak iyye.

²¹ Too waqdi Saawul iyyemii, «Anu akah aabukem, Benyam kedoy Israayilil enna 'ta kedoodak inkih dagohiyya. Yi buxah mari kaadu woo kedok inkih gaca mara kinni waqdi, annah yan yaabah mannah yo'lih yabtaa?» kaak iyye.

²² Tohuk lakal Samuwel, Saawul kee kay taamat yan num adda naba qari culussa heeh, kaxxa-kaxxa maray soddom yakkehiyya elle daffeya aracal miizik naharsi aracal ken hee.

²³ Sarrak woo nabsi bicsa numuk, «Woo rikeek haa kok exce cadoytah exxa baahey» kaak iyye.

²⁴ Maaqo bicsa num lak bahha heeh, Saawuluk foocal hee. Too waqdi Samuwel, «Ah koh daanat sugte cadoytak ukum. A cadoytah exxa, a saaku a qibina lih akkel takme'gidih, koh raaqiseh suge» kaak iyye. Too ayro Saawul maaqo Samuwel lih xage.

²⁵ Sarrak too aracak magaala gexen. Samuwel isi buxal qarik amo kaa eyyeqqa heeh tokkel kaa'lih walale.

SAMUWEL SAAWUL AMOYTA ABE

²⁶ Maaci ifu rubbu hee waqdi, Samuwel, Saawuluy qari amol yanihiyyah seece. Kaak iyyeemih, «Ahaysa isi buxa gexxa'gidih ugut» kaak iyye. Saawul gexoh bical gaceeh; too waqdi afa fanah Samuwel kaa'lih gexe.

²⁷ Sarrak magaalak afa fanah titta lih gexak sugen waqdi, Samuwel Saawuluk iyyeemih, «Taamâ-numuk, ‹Nek foocat warrayay suga› inxic» iyye. Taamâ-num gexek lakal, Samuwel, «Akkel yo'lih aadetto. Yallih farmoy koh warsam faxa liyok» kaak iyye.