1 Samuwel 8 - NABUWWA KEE MALIKWA

UMMAT, «MALIK FANXA» INTE

¹ Samuwel idoolite saaku Israayilil isi xaylo cokmaabah hee.

² Kay xayloh nammayak naba awki migaaqah Ayyuqel deqsitak yeneeh, qunxa awki Abiyya deqsitak yen. Oson Bersabaq deqsitta magaalal cokmaabah yenen.

³ Tonna'mmay, oson isinni abbah gita kataata marak manannon. Lakqô-fayxi kaxxam luk yenen. Tonna-leemiik sahdak guqul beyak yeneeniih, ummattah yab gitah meklak manannon.

⁴ Sarrak Israayilik saqoltih yan mari gaabowwa 'yeh, Samuweliy Raamal yanihiyya fan gexen.

⁵ Too waqdi kaak iyyeenimii, «Atu ahaysa idoolitak idoolittah taniih; ku xaylo kaadu atu abak tenem abtah matanak, ahaysa kulli baaxoh mari malik akah le innah, neh kaadu malik reedis» kaak iyyen.

⁶ Takkay immay Samuwel oson, «Malikih num neh reedis» kaak iyyen waqdi, tohut ruffa maxcinna. Tonna-leemiik YALLA kallace.

⁷ YALLI too waqdi annah kaak iyye, «Ummatta kok axcinnaanim oobbey! Cinaanam koo hinna yoo ikkal.

⁸ Masri baaxok ken eyyeeqeemiiy akke yoo cabba heenih yi aftok amixxige waytam aqbuduk sugen. Away kok abaanam yok dumaak abak sugeenimi.

⁹ Tonna'mmay iyyaanam keenik oobbeyaay numma keenil acuy. Ken malikwa ken elle xiinissu wayta innak adda nagay keenih waris» kaak iyye.

¹⁰ Sarrak Samuwel woo maray malik neh reedis kaak iyyehiyyah YALLI kaak inxicca 'yem inkih warse.

¹¹ Ken malik ken elle xiinisu waa inna keenih warseeh; iyyemii, «Xaylo siinik isi qaskarah heele. Garab keenik usuk qeebi edde aba gaariirah taamat gaceleeh, garab kaadu faras amok qeebi abta qaskar akkele. Aki garab kaadu usuk qeebih gexa way amot akak yan gaariirah foocat ardelon.

¹² Tonnah kaadu, sahdak tu takkem alfi takke qaskarih abbobtih heele. Aki mara tonnah kontom takke qaskarak abbobtih heele. Sin xaylo kay buqre abqurele; kay buqrek daro orbisele. Kay silaacih-bicsat gacele; kay gaariirah-duyyeeya oson bicselon.

¹³ Say xaylo siinik kay qatrih bicsat gacele; kay saalo oson bicselon; kay maaqo kaadu oson alayselon.

¹⁴ Tayse buqre kee qinab kee *daytuun xala coox elle taysubuken baaxo siinik beeleeh, doolatak fayya 'ta abbobtih aceele.

¹⁵ Buqrek orobta darok tabanhaytoh af kee, qinab xaylok kaadu tabanhaytoh af siinik beyya heeh, doolat-abbobti kee qaskar abbobtih aceele.

¹⁶ Siinih taamita marak labim kee sayimiiy, sin labhak qande le labha kee, sin danoonak tayse danoona siinik beeleeh, isi taamat heele.

¹⁷ Liton saqak tabanhaytoh af isih haysitele. Isin 'sinnih kay naqoosa akketton.

¹⁸ Toh isinnih ubulla haytan saaku, isinnih dooritten malik siinil baaheemit yaabetton. Takkay immay YALLI too geyto siinik moggola» 'yaanam keenik iyyeeh, malik keenil baahu waamih adda keenih warseh.

¹⁹ Ummatta Samuwel ken lih yaabe yaabat maqal mahaysitinnoonuuy, «Aleeyyah! Woh tu hinna. Nanu malik fanxa bas» iyyen.

²⁰ «Gersi baaxoh marak kaxxih ni amol gaca malikiy qeebi yakke waqdi gaaduh nee beyah carbi nee absiisahiyya fanxa» iyyen.

²¹ Samuwel oson kaak inxicca iyyeenim ankacisak suggu 'yeh, sarrak wohim YALLAH warse.

²² YALLI kaak iyyeemih, «Oson faxaanam keenih abaay malik keenih reedis» kaak iyye. Too waqdi Samuwel keenik iyyeemih, «Ahaysa inteenim oobbehik, isinni buxah uduura» iyye.