1 Samuwel 7 - NABUWWA KEE MALIKWA

¹ Toh yoobbe waqdi Kiryat-Yaqaarim mari yemeeteh, woo sanduguy YALLIH Qahdi addat akak yani beeniih, Abinadab deqsita numih buxah been. Abinadab guubuh koomah amol yen. Kay baxay migaaqah Alqedar deqsitak yenehiyya, woo sandugih dacayrit akah gaca'nnah, YALLIH garil taahirik yan num kaa aben.

² YALLIH Qahdi addat akak yan Sandug Kiryat-Yaqaarim addal mango wakti suge. Labaatanni sanatih gide wokkel suge. Ta sandug wokkel suggu 'yem fanah, Israayil mari weeqak, YALLAL gacaanam faxak sugen.

SAMUWEL ISRAAYIL MAKAABANTU YEKKE

³ Sarrak Samuwel Israayil marak annah iyye, «YALLAL baguuk taduureenim faxxeenik, a duyyeeyay gersi mari yalla 'yeh yaqbudehiyya kee, yalla akak intan Qastarot akak iyyaanamih ceeloy gabat litoonuhiyya wonnah qida. Dudda haytaanam kee, niyak elli haytaanamaak, YALLAL gactaanamaay dibuk kaa uqbuda. Filistiin marih gabak sin cattu waytam, inki Dagelta» keenik iyye.

⁴ Toh oggoleeniih, aqbuduk sugen Qastarot akak iyyan duyye kee Baqal akak iyyan duyyeeyay aqbuduk sugeenihiyyak raaqeenih, YALLIH qibaadah gacen.

⁵ Tohuk lakal Samuwel, «Mixfa deqsita aracal YALLA siinih kallaca'gidih, wokkel gaaboowa» iyye.

⁶ Oson too waqdi yakkeenimiik wokkel gaaboowen. Lee quleenih, YALLAH mattaco takke'gidih woo lee baaxol caxen. Sarrak too ayro soomuh asen. «YALLAW, dambi lem kol bahneh nan» iyyen. Samuwel makaabantu yekkeh; Israayil fanal sittin-way rada waqdi keenik elle kalak yenem, Mixfa deqsitta magaalak ten.

⁷ Filistiin-mari Israayil-mari Mixfal gaaboowem yoobben waqdi, Filistiin koona malik is kee isi marah qeebi keenit abaana'gidih gexen. Israayil mari ah yoobbe waqdi meysiteh.

⁸ Too waqdi Samuwelik, «YALLAY ni Dageltah yani, Filistiin-marak nee cata'gidih neh xaqtam macabin» kaak iyyen.

⁹ Too waqdi Samuwel anaqtu qideeh, woo anaqtu elle yani'nnaak YALLIH sadgatah cararise. Sarrak YALLI Israayil ummatah nasri yecee'gidih dooqa abe. YALLI too dooqa kaah oggoleh.

^10-11 Samuwel Yallih sadgatih abittot yan waqdi, Filistiin-mari ken yabbixe'gidih keenit xayyooweh yen. Too waqdi YALLI qaraanaak kakkaqo keenil ruube. Too waqdi aben wariggah fixixeenih, mariiy kabul keenik gexe. Toh yublen waqdi, Israayil mari Mixfa deqsita aracaak keenit aben ardat Beet-Kaar deqsitta magaala fan ken baahen. Gital mango mara keenik qideenih, keenik yayseenih.

¹² Tohuk lakal Samuwel xaa bahha heeh, Mixfa kee Seen deqsita aracak fanal soolise. Too waqdi iyyeemih, «YALLI ta udduruh amma 'yaanam nee cateeh; tonna leemik ahaysa a xaak migaaqah ‹Catô-xaa› deqsitele» iyye.

¹³ Israayil-mari qeebil Filistiin-marak yeyseeh, Samuwel sugem fan Filistiin-mari Israayil baaxo culak masuginna.

¹⁴ Filistiin-mari yibbixe magaalooliy Ekron magaala kee Gat magaalah fanal tanihiyya Israayil marah gacseenih, keenik beenih sugen baaxo inkih gacseenih. Israayil kee Amoora deqsita marih fanat kaadu wagri gace.

¹⁵ Samuwel suggu 'yam fanah Israayil makaabantuh suge.

¹⁶ Kulli sanatal Beetal kee Gilgal kee Mixfa fan gexak sugeh, too baaxooxal titta waak suge mara bicisak suge.

¹⁷ Tokkeek Raamal tan isi buxa fan adaaruk yen. Tokkel kaadu titta wee marih fan mekelak yen. Raamal YALLAH sadgat elle aban arac bicse.