1 Samuwel 6 - NABUWWA KEE MALIKWA

QAHDI-SANDUG ISRAAYIL BAAXO FAN GACSEN

¹ YALLIH Qahdi addat akak yan Sandug *Filistiin rasul malcina alsih gide sugeek lakal,

² Filistiin mari isinni seeka kee baab-abeenitih seeco abeenih keenik iyyeenimii, «YALLIH Qahdi addat akak yan Sanduguk maca abnooh? Akak baahen aracah gacisna waqdi, woo sandug lih maca hayneh rubnooh?» iyyen.

³ Too waqdi too mari keenil gacsemii, «Israayil doore Dageltih-qahdi addat akak yan Sandug gacissan waqdi, abten dambik qafu geytaana'gidih, mattaco lih hayteenih rubtaanama. A Qahdih-Sandug foyyah gexam mameqe. Mattaco lih hayteenih rubteenik, dalkak urettoonuh, sin akah digaalak sugem kinnim aaxigetton» keenik iyyen.

⁴ Oson, «Hay, abne dambik qafu geyna'gidih, mannah tan mattaco kaah rubnooh?» iyyen. Too mari keenil gacseemih, «Laahi-baxxi ceelok bicsen koona dahab kee, hantuuti ceelok bicsen koona dahab bicisa. Woo konooyuk kulli tiiy Filistiin baaxoh koona malikih migaaqak loowimele. Sin kee Filistiin koona malikil raddem inki bala.

⁵ A laahi-baxxa kee hantuutay baaxo siinik bayissak sugehiyyah ceelo bicissaanam meqeeh, Israayil doore Dagelta kaadu tassakaxxeenim meqe. Usuk sin kee sin yallitte kee sin baaxok digaala yayseedem takkeh.

⁶ Isin Masri malik kee Masri marih innah, yab cine mara makkina. Israayil-mari Masrik eweqqa 'yam fan, Yalli Masri-mara elle duquurusak suge inna, kassa haa.

⁷ Hay taway, gaari kee ahaydumah buqre edde abe ween namma sagay qunxa xaylo lehiyya baaha. Woo namma saga beyay woo gaarit uxuya. Woo laahih xaylo saq edde haan aracah gacisa.

⁸ YALLIH Qahdi addat akak yan Sandug baahay, woo gaarih amot haa. Woo abten dambik cabsu geytaana'gidih rubtan dahabak bicsen laahi-baxxa kee hantuuti ceelo edde tan sandug, Qahdih-Sandugih xaqut haa. Tohuk gaba kalla haytan waqdi gaari isih gexxay inxica.

⁹ Gexxa waqdi wagitak raaqa. Too waqdi Beet-Semes magaala fan gexxam tubleenik, woo bala nel rubtem Israayil YALLA kinnim elle ixigaay; wonna hinna'mmay, wokke fan gexe waytek, usuk nel ruubem hinnay, isih nel tekkem kinnim elle aaxigenno» keenik iyyen.

¹⁰ Oson too mari keenik akah inxicca iyye innah aben. Namma sagay qunxa xaylo lehiyya bahha heenih woo gaarit yoxeen. Laahi-xaylooy beyya heenih saq edde haan gasot heen.

¹¹ YALLIH Qahdi addat akak yan Sandug kee, hantuuta kee laahi-bexxi ceelok bicsen dahab addat akak yan sandug woo gaarih amol heen.

¹² Too waqdi too gaari woo kabul magexinnaay, a kabul magexinnay, gita xabba hayteh, Beet-Semes fan gexxe. A laahi elle gexaamal garadak gexe. Too waqdi Filistiin koona malik Beet-Semes magaalah caddoh amma 'yaanam fan lakal keenik gexen.

¹³ Beet-Semes magaalah mari YALLIH Qahdi addat akak yan Sandug temeete waqdi, goloh addal tooboke darok kamadi orbisak sugen. Garciik, wonnah wagga heen waqdi, Qahdih-Sandug yublen. A sandug elle tamaate inna yublen waqdi ruffa iyyen.

¹⁴ A gaari, Yoosuwa deqsita numuy dabqih Beet-Semes magaalal yenehiyyah buqre fan amma inteeh, tokkel yen kaxxa xixxaqih garil solla inte. Too waqdi woo mari woo cooxuk bicsen gaari godmat yirgiggiqeeniih, woo laahih nammay sadgatah qiden. Cado akak YALLAH sadgatah cararisen.

¹⁵ Tohuk lakal Leewih yooboke mari YALLIH Qahdi addat akak yan Sandug kee, dahabay laahi-baxxa kee hantuuti-ceeloh gurral bicseenihiyya addat akak yan sandug beyya heenih woo kaxxa xixxaqih bagul heen. Tokkel too ayro woo magaalah mari, cado akak cararisan sadgoota kee aki sadgoota YALLAH aben.

¹⁶ Filistiin koona malik, a mari ah abe waqdi ken wagitak sugeeh, sarrakaay too ayrot edde Ekron fanah yuduuren.

¹⁷ Filistiin mari a koona dahabay laahi-baxxi-ceelok bicseenihiyya akah ruubeenim, Asdood kee Gat kee Askalon kee Gaada kee Ekron deqsitta magaaloolih mari abe dambik qafu geyaana'gidik ten.

¹⁸ Woo hantuuti ceelok bicsen dahooba kaadu akah ruubeenim, woo koona malik abbah akak tan magaalooli migaaqal tiya tiyah bicseenimih sabbata. Oson abbobtih akak yeneenim, gaso maroh edde tan magaalooli kee gaso sinni gaandoodiy Filistiin rasul geytimtahiyya. Woo kaxxa xixxaqay Beet-Semes magaalal Yoosuwa deqsita numih buqreh addal woo saaku YALLIH Qahdih-Sandug bagul akak heenihiyya, woo saaku tekkeemih sumaaqah, a saaku fan wokkel elle yan.

¹⁹ Beet-Semes mari woo Sanduguy YALLIH Qahdi addat akak yanihiyyah adda wagten waqdi, YALLI malcina-tabanih num keenik qide. YALLI a axxul le mara keenik qideemih, wokkeh mari rookiteh.

QAHDI-SANDUG, KIRYAT-YAQAARIM RUUBEN

²⁰ Tohuk gexxaamah Beet-Semes mari iyyemii, «YALLAY *kudduusuk yan Yallah yanihiyyah foocal, iyyi soolu duudaah? Ninnik kaa nayxeeri'gidih, manke kaa rubnaah?» iyyen.

²¹ Kiryat-Yaqaarim marah fan farmo ruubeeniih iyyeenimii, «Filistiin mari YALLIH Qahdi addat akak yan Sandug gacseenihik, amay beya» keenik iyyen.