1 Samuwel 5 - NABUWWA KEE MALIKWA

QAHDI-SANDUG FILISTIIN BAAXOL SUGE SAAKU TEKKEEMI

¹ Filistiin mari Yallih Qahdi addat akak yan Sandug Eben-Qeder deqsita aracak isinni magaala fan been. Ken magaala migaaqah Asdood deqsitak ten.

² Too magaalal Daagon migaq akah aban duyyey yaqbudeenihiyyah qibaada elle abaana'gidih bicsen qari yen. Yallih Qahdi addat akak yan Sandug bahha heenih, woo Daagon akak iyyaanamih ceeloy yaqbudeenihiyyak xaqut missossa heenih caben.

³ Maaca dibroh yemeeten waqdi, oson Daagon akak iyyaanamay yaqbudeenihiyya, YALLIH Qahdi addat akak yan Sanduguk foocal gommoh raddeh keenih sugte. Ugussa heenih, elle suge ikkel akah suge innah, soolissa heenih caben.

⁴ Nammeyhaytoh ayro kaadu yemeeten waqdi, woo ceelo gaboobi kee amo keenih luk masuginnaay; YALLIH Qahdi addat akak yan Sanduguk foocal raddeh keenih sugte. Amo kee namma gaba akak tiddigilleh sugteeh, Daagon qibaadah bicsen qari akak culan afal raddeh keenih sugte.

⁵ Tohuk gexxaamah a saaku fan, woo Daagon seeka kee woo Asdood magaalal enna 'ya maray kaa yaqbudehiyya, woo aracat ibah mayaaqitaanaay amo akak makoran.

⁶ YALLI, Asdood mara kee keenik dariifal tan baaxol yen mara gibdi digaalah digaaleeh, cunxo keenil ruube. Ken digaaleeh, laahi-baxxi biyak keenit ruube.

⁷ Oson ahat raden waqdi iyyeenimii, «Israayil doore Dagelti, nee kee ni yalla Daagon digaalah yaniih, neh yaabbeh mayanak, Yallih-Qahdih-Sandug rubnam tayse» iyyen.

⁸ Tohuk lakal woo Filistiin baaxok koona malikih seeco aben. Gaaboowen waqdi keenik iyyeenimii, «Israayil doore Dageltih-qahdi addat akak yan Sanduguk maca abnooh?» iyyen. Osonuuy, «Gat magaala fan beya» iyyen. Gat kaadu Filistiin magaalak ten.

⁹ Too magaala been waqdi, YALLI kaadu woo magaalat kaxxa ceya ruubeeh, idoola kee furraynat inkih laahi-baxxi dalka keenil oobise. Gibdi cunxo ken tibbixeh, adaadareenih.

¹⁰ Tohih sabbatah woo sandug woo magaalak Ekron deqsita magaala fan ruuben. Ekron kaadu Filistiin magaalak ten. Too sandug tokke baahen waqdi, woo magaalah mari, «A mari nee qida'gidih, a Israayil doore Dageltih-Sandug nee fan baahaanah yanin» iyyeenih, uma-xaw keenit xaawen.

¹¹ Sarrak qagseenih woo Filistiin malikwah farmo ruubeeniih iyyeenimii, «A Sanduguy Israayil doore Dageltih-qahdi addat akak yanihiyya nee kee ni buxah mara akah ambaxe wayna'nnah, elle suggu 'ye ikke fan gacisa» iyyen. Yalli gibdi digaalah ken digaaleeh; tohuk gexxaamah inkih tan magaalah mari abam waagiseh qaxxaagiteenih.

¹² Woo dalkah rabe wee marih agantah a laahi-baxxi biyak luk yeneenih, ken xongolo kee weeqi qaran fan gufe.