1 Samuwel 4 - NABUWWA KEE MALIKWA

*FILISTIIN-MARI YALLIH-QAHDIH-SANDUG DANNABAH BEEN

¹ Samuwel, YALLI kaa'lih yaabe yab Israayil ummattah warisak yen. Too dabaanal *Filistiin-mari Israayilit qeebi abaana'gidih ugten. Israayil-mari Eeben-Qeder deqsita aracal yinfiddigeeniih; Filistiin-mariiy Afeek deqsita aracal yinfiddigen.

² Filistiin mari qeebi keenit abeeh; kaxxa qeebi ken fanal akkuk sugek lakal, Filistiin mari qeebil keenik yeyseeh, too qeebil Israayilik affara alfih num qiden.

³ Israayilik rabak raaqe mari isinni aracah yuduuren waqdi, Israayil makaabon inteemih, «YALLI a saaku Filistiin mara qeebil nek akah yiysiisem macak tan kaay? Siilo fan gexxa inneh, YALLIH Qahdi addat akak yan Sandug bahnaama. Toh abnek, YALLI ne'lih aneleeh, ni naqboytiitik nee aysiisele» 'yaanam iyyen.

⁴ Sarrak Nabaamak Naba YALLAY korsi akak galwa-leemik daga le kabu raqtehiyyak Qahdih-Sandug baahu waa mara Siilo fan ruuben. Qeli xayloh nammeyay migaaqah Cofni kee Fincas deqsittahiyya woo sandug baahe mara lih yemeeten.

⁵ Woo sandug baahen waqdi Israayil mari farcik gexxaamah baaxo edde engeyya inta xongoloh xongolen.

⁶ Filistiin mari a xongolo yoobbe waqdi iyyeenimih, «Qibraan marih aracal radda xongolo ankacisay, a xongolo macâ-xongolok tan teetiiy?» iyyen. Sarrak YALLIH Qahdi addat akak yan Sandug baaheenim yoobben waqdi,

⁷ Filistiin mari meysiteeh, «A warsan Yalli ken aracah yemeeteh yan! Hay, ni'kke tekkeh matanaa wohoysa! Ahaay dumah annah tanim net makkinna.

⁸ Ta way ta celeemah tan yallittek iyyi nee catele? Kamba tu nee tibbixeh tan! Aham duma Masri mara woo bacarih tan baaxol selte yallitte hinnaa!

⁹ Bas, Filistiin maraw, agiira tika! Qeebil agiira akke wayteenik, oson ni naqoosah akah sugen innah, nanu kaadu ken naqoosa akkennom ixiga. Qeebil labha tikay maboolaatina bas» tittak iyyen.

¹⁰ Sarrak qeebi rade waqdi, Filistiin mari Israayil marat kaxxa qeebi abeeh; Israayil mari isinni buxa fan yoowwen. Too saaku Israayil marak mangom tembexe. Israayilik soddom alfih qaskariiti rabe.

¹¹ Yallih Qahdi addat akak yan Sandug yintixibbixeeh; Qeli xayloh nammey Cofni kee Fincas too qeebit rabte.

¹² Benyam kedoh yooboke numuy woo qeebik yisillimehiyya tokkek arduk, Siilô magaala fan too ayrot edde yemeete. Tekkeemih abeh yan rookah gital sara isik qanxiseh yeneeh, amol kaadu siisa luk yen.

¹³ Woo num magaala gufe waqdi, Qeli, Yallih Qahdi addat akak yan Sandug gexeemih meysitak sugeeh; xaaguh giti-xaqul korsil daffeyak suge. Taaxige num tikka 'tem magaalâ-marah warse waqdi, inkih tan magaalal kaxxa booge radde.

¹⁴ Qeli ta weeqa yoobbe waqdi, «Sugay, a aabbem macâ-xongolooy?» iyye. Usuk toh inxicca 'ye waqdi, xaagu baahe num sissikuk Qeli fanah yemeete.

¹⁵ Qeli qumrik sagla-taban kee bacaarat yeneeh, namma inti weeh yen.

¹⁶ Xaagu baahe num kaal yemeeteeh, «Carbi elle yekke ikkek ta saaku emeeteeh, akak kudeh emeetem too carbi» kaak iyye. Qeli kaak iyyemii, «Hay yi baxaw, tekkem yoh warisey, xaagi macaay?» kaak iyye.

¹⁷ Xaagu baahe num, «Israayilik mango mari rabeeh, raqtem kuddeh. Ku xayloh nammay too qeebit rabte. Yallih-qahdi edde yan Sandug yibbixeenih dannabah been» kaak iyye.

¹⁸ «Yallih-Qahdih-Sandug beenih» kaak iyye waqdi, elle suge korsik magaala akak culan afah garil deerih rade. Idoolinni kaat yemeeteh yeneeh, xagar kaak kaadu gabuleh yeneeh; filli kaak yiddigilleh, edde rabe. Israayil mara morootom sanatah miraaciseh suge.

¹⁹ Qeli-baxay Fincas deqsitahiyyak barra soolimah teneeh; xalay teetit xayyooweh yen. Is Yallih Qahdi addat akak yan Sandug yintixibbixeeh, tet ballu kee baqala rabtem toobbe waqdi, lacawat raddeh xalteh.

²⁰ Too waqdi rabi teetit xayyoowem yublen waqdi, woo tet xalisak suge agbi, «Mameysitin lab baxa xaltek» teetik iyye. Takkay immay is aham maabbinnay tu elle magacisinna.

^21-22 Tonna'mmay sarrak qandeh yabteeh, «Yallih Qahdi addat akak yan Sandug beenik wadir, nabna Israayil rasuk teerreh» axcuk, yooboke awkak migaaqah «Ikabod» inte. Tohuk maqna nabna Israayilik teerreh 'yaanama. Toh akah intem Yallih Qahdi addat akak yan Sandug kee tet ballu kee baqala rabtem toobbeh teneeh, tohuh inte.