1 Samuwel 30 - NABUWWA KEE MALIKWA

DAWUD QAMAALEK MARAT QEEBI ABE

^1-2 Namma ayrok lakal Dawud kee kay mara Xiklag magaala gufte. Qamaalek-mari gabbi-qaxat raqta Yuudâ-baaxo gaadeeniih Xiklag-magaala yibbixen. Woo magaala carriseeniih, agabu kee xaylo inkih yibbixen. Sugga 'teemik num maqidinnoonuy seewah gabat luk gexen.

³ Dawud kee kay mara Xiklag gufen waqdi, woo magaala keenih cararteh sugteeh, ken agabu kee xaylo seewah beenih sugen.

⁴ Toh yublen waqdi, Dawud kee kay mara weqteeh, weeqak cawalla 'yaanam fan boogisak sugen.

⁵ Dawuduk namma barray migaaqah Acinooqam kee Abiigal deqsittahiyya been marat seewah beenih sugen.

⁶ Dawud maray xaylo seewah akak beenihiyya kaxxam bagcarriteenih yeneenih; Dawud xeetit qidaanam faxak yenen. Tonna-leemik kaxxa gadaama Dawud tibbixe. Takkay immay YALLAY kay Dagelta kinnihiyya kaa cateh, agiirite.

⁷ Too waqdi Dawud Acimalek baxa sek Abiyataarak, «Ama rikeek tan saroy YALLI faxam elle yaaxigeenihiyya yol baahey» kaak iyye. Abiyataar woo saro kaal baahe.

⁸ Sarrak Dawud YALLA essereemih, «A gaadileh lakat maay gexo? Gexek ken abbixeyyo'nnaa?» iyye. YALLI kaal gacsemii, «Lakat keenik gex. Ken abbixettooh seewah been mara catettok» kaak iyye.

⁹ Too waqdi Dawud isi maray mangah lica bool yakkehiyya luk fooreeh; sarrak Basor deqsitta golo gufen waqdi, keenik tu takkem wokkel elle raqte.

¹⁰ Dawud raaqe affara boolih num lih gexeeh; namma boolih num taqbi gexxaamah woo golok bisoh tabaanam yefferen.

¹¹ Dawud lih bisoh gexe mari Masrih yooboke awka barril geeniih, woo awka Dawud fan baahen. Sarrak gaqambo kee lee kaah yeceen.

¹² Toh lih kaadu sublâ-xayloy kafseeni kee qinab-xayloy kafseenihiyya kaah yeceen. Tohim yokmek lakal, inti kaak fakkinteh. Inkih tan sidiica ayro lee kee maaqok tu afah baaheh masuginna.

¹³ Sarrak Dawud woo awkak, «Koo lem iyyaay? Mankeh num kinnitooh?» kaak iyye. Awkiiy, «Anu Masri-num kinniyo. Qamaalek-marih-naqasu kinniyo» iyye. «Anu lakmisak sugeemih sabbatah, yi abbah yan num sidooca ayrok duma yoo cabeh gexe.

¹⁴ Yuudâ-baaxok gabbi-qaxat raqta baaxoy Kereet mari elle yani gaadneeh, kaadu Kaalib deqsita gulubih baaxo gaadneh, Xiklag-magaala cararisneh» iyye.

¹⁵ Dawud too waqdi, «Hay woo gaadile fan yoo beettoo?» kaak iyye. Awki kaal gacsemii, «Yallih migaaqal yoo qide waytuuy, hinnay kaadu, yi abbah gabal yoo hee waytuh Yalla-kee-xagana yoh cultek, ken fan sin beeyyo» kaak iyye.

¹⁶ Sarrak woo awki Dawud wokke fan bee. Taaxige gaadileey Filistiin kee Yuudâ marak mango duyye buubeenih yeneeniih; tohih sabbatah fixixih kulli aracal makmo kee maaqabat yenen.

¹⁷ Dawud nammeyhaytoh ayro carri tikka 'yam fanah qeebi keenit abak sugeeh, sarrak ken yibbixeh. Affara boolih furraynuy gaali amot sugtehiyyak kalih marak num maasilliminna.

¹⁸ Dawud Qamaalek mari beyya heemik isi namma barrah agantah

¹⁹ tu keenit maruubinnay raaqiseh. Tonna-leemik kaa kee kay mari isinnim dudda luk geen. Dawud isi marak seewah beenih sugen lab-xaylo kee say xaylo raaqiseh. Keenik buubeenih sugeenimik tu keenit maruubinnaay raaqise.

²⁰ Illiiy wadar kee laa keenik gacseenih. Too waqdi Dawud mari keenik been midir foocat isinnik hayya heenih lakak katayen. Too waqdi, «Aham Dawud imi» iyyen.

²¹ Tohuk lakal woo namma boolih numuy kaxxam tecleh tenehiyya keenik elle raqte'kke fan yuduuren. Woo namma boolih num elle raqteh tenem, Basor deqsitta golok ten. Oson Dawud kee kay marah matraana'gidih ken fan yemeeten. Too waqdi Dawud keenih garayeeh salaamatta keenih abe.

²² Sarrak uli maray Dawud lih gexeh sugehiyyay bagi-umaane kee tuxxiq sinna inkih lehiyya annah inte. «A mari ne'lih magexinnaay; tonna-leemik away dannabah bahne saqak tu keenih manaca. Isinni xaylo kee agabuy seewah keenik beenih sugeenihiyya beeteenih gexxaasitoonay» iyyen.

²³ Takkay immay Dawud keenik iyyemii, «Yi toobokoy, YALLI neh yeceemih bagul annah tanim abnam mabicta. YALLI nee amaanah raaqissaay nee buube marak iysiissa nee hee.

²⁴ Isin intaanam oggoltam matan. Kulli numuh inki gidel kurenno. Sakayi dacrisak raaqe mari woo carbi-booxa gexe mari geeh gide ken lih geele» 'yaanam keenil gacse.

²⁵ Dawud tohuk wadir tohum qaada abeeh; tohuk wadir Israayil-mari tohim qaadah haysite.

²⁶ Dawud Xiklag-magaala yuduure waqdi, dannabah orbisen duyyek tu takkem kataysis kee Yuudâ-makaaboonuh afti farmo lih hayya heeh ruube. «YALLIH naqboytiitik buubneh bahne duyye mattacoh siinih rubna» 'yaanam iyye.

^27-31 A farmo Beetalal yan marah ruubeeh, Yuudâ-rasuk gabbi-qaxat raqta Raamot magaalal yan mara kee, Yattir magaalal yan maraay, Qarooqer kee Sifmotuuy Estamowaq kee Raakalal yan marah inkih too mattaco ruube. Tohuk kalah kaadu, Yeracmaqil deqsita gulub kee Keena deqsitta kedooy, Corma kee Borasan kee Qatak kee Cebron deqsitta magaalal yan marah inkih woo mattaco ruube. Too mattaco kaa kee kay mara ibah elle gexxa 'te baaxoh marah inkih yecee.