1 Samuwel 3 - NABUWWA KEE MALIKWA

YALLI SAMUWELIH SEECE

¹ Samuweliy awkah yanihiyya Qeli-gubal anuk, YALLIH taamat yen. Too dabaanal YALLAK tamaate farmo daguk teneeh; kaak ooba wacyi kaadu daguk yen.

² Qeli intik boolaatak yen. Barak teena isi aracal xiinit yen waqdi,

³ Samuwel kaadu YALLIH Qibaadah-Qariy Yallih Qahdi addat akak yan Sandug elle yanihiyyal xiinit yen. Too bar faanus baruge'kal yan waqdi,

⁴ YALLI Samuwelih seeceh, «Samuwelow! Samuwelow!» kaak iyye. Samuweliiy, «Eeh! Ah yoo» axcuk,

⁵ arduk Qeli fanah gexe. «Yoh secteh; ah yoo» iyye. Qeliiy, «Aleey, anu koh maseeciyyok, gexay isi xiinih uduur» kaak iyye. Samuwel xiinih yuduure.

⁶ YALLI kaadu qagseh kaah seeceh, «Samuwelow!» iyye. Too waqdi kaadu ugutta 'yeh, Qeli fan gexeeh, «Ah yoo; yoh secteh emeeteh» iyye. Qeli kaadu iyyeemih, «Yi baxaw, anu koh maseecinniyok, gexay inaaqit» kaak iyye.

⁷ Samuwel ahaydumah qunxa numuk yeneeh, YALLA aaxaguk manannaay; tohuk gexxaamah a seeco YALLIH seeco kinnim maaxaginna.

⁸ YALLI sidochaytoh uddur kaadu qagseh, «Samuwelow» axcuk kaah seece. Too waqdi ugutta 'yeh Qeli fan gexeeh, «Yoh secteeh, ah yoo» iyye. Too waqdiiy Qeli kaah sectem YALLA kinnim yeexegeh,

⁹ Samuwelik iyyeemih, «Gexay away isi xiinih uduuraay, ahak wadir koh seecek, ‹YALLAW, ah yoo ku naqasu. Koo ankacisah anik, maca abooh?› inxic» kaak iyye. Samuwel qarkayto fan xiinih yuduure.

¹⁰ YALLI amma 'yeh wokkel sooleeh, duma seecak akah suge'nnah, «Samuwelow, Samuwelow» kaak iyye. Too waqdi Samuwel, «Yoo ku naqsi koo ankacisah yanik, maca aboo?» iyye.

¹¹ YALLI kaak iyyeemih, «Israayil ummattal, ayrok teena kaxxam umaamay sahda taabbu wayta waqdi akak wariggittu waytahiyya baaheyyo.

¹² Too ayro Qeli buxah maral, duma keenil baaheyyo inxicca exceh sugeemik tu macabaay inxicca excem inkih keenik abeyyo.

¹³ Kay maral oobisu waa digaala ahak wadir ken amol tanim dumaak kaah warseh. Ken akah digaalu waam, kay xaylo yi migaq akke sinni migaq yoh abteemih sabbata. Qeli kay xaylo aham abtam aaxaguk yene'mmay, maabina keenik maxcinna.

¹⁴ A dambi, faxe sadgat abaanamahaay faxe mattaco yeceenimih ahak wadir daayiman keenit cabe waamah kaah xiibiteh en» iyye.

¹⁵ Tohuk wadir, Samuwel maaca fan inaaqitak suge. Sarrak ugutta 'yeh, YALLIH Qibaadah-Qarik afa fakeh. Samuwel woo yuble wacyi Qelih warsaamak meysiteh.

¹⁶ Takkay immay Qeli, «Yi Samuwelow yaah!» iyye. Samuwel, «Eeh, ah yoo» iyye.

¹⁷ Too waqdi Qeli, «Yalli maca kok iyye? Kok iyyeemik tu yok maaqurin. Yok uqurra haytek, Yalli kot cabe way» kaak iyye.

¹⁸ Samuwel Yalli kaak inxicca 'yeemik tu kaak maaqurinnay inkih kaah warse. Too waqdi Qeli iyyeemih, «Usuk YALLAK, kay intit taysem abay» iyye.

¹⁹ Samuwel ambuk elle yambeemil YALLI kaa'lih yeneeh, Samuwel, ‹Akkele› akak iyyem inkih akkuk maacisse.

²⁰ Sarrak Israayil mari kulli kabuk inkih yakkeemiik, Samuwel YALLIH nabi kinnim yeexegeenih.

²¹ YALLI Siilo deqsita aracal Samuwelih amballayuk, kaa'lih yaabak yen.