1 Samuwel 28 - NABUWWA KEE MALIKWA

¹ Too ayrooral Filistiin-mari Israayilit qeebi aba'gidih qaskarak elli haanam gaaboysen. Sarrak Aakis Dawuduk iyyemii, «Koo kee ku mara yi qaxat gacca 'teenih qeebi abettoonum taaxigem hinnaa?» iyye.

² Dawuduu, «Yeey macah iginno. Yooy ku taamat yani abu waam isih abletto» kaak iyye. Too waqdi Aakis, «Meqeh hay; tonnal atu anim fan yot dacayrih gacetto» kaak iyye.

SAAWUL KALLUWALLEL GEXE

³ Samuwel rabeemih waqla taturte. Israayil mari inkih too saaku kay rabah rookite. Magaqah elle yooboke Raamah magaalal kaa heen. Takkay immay Samuwel yen saaku, Saawul ginnili kee kalluwalley Israayilil sugga 'tehiyya baaxok dirkih yeyyeeqeh yen.

⁴ Filistiin qaskar gaabowwa 'teh temeeteeh, Suunem deqsita aracal yinfiddigen. Saawul isi qaskar gaabossa heeh, Gilbowaq deqsitta qaleh xaqul yinfiddigen.

⁵ Saawul Filistiin qaskar yuble waqdi wariggiteh, meysih axaxiteh.

⁶ Too waqdi, «YALLAW, maca aboo?» axcuk, YALLAL fayu essere. YALLI tu kaal magacisinna. Soonol kaal gacsem maliiy, hinnay kaadu, *Urim kee Tummim kabuk kaal gacsem maliiy, nabuwwâ kabuk kaal gacsem mali.

⁷ Sarrak Saawul kay gubal yan marak, «Kalluwalle elle tani ikke yoh gorrisa; teetil gexeh fayu tet esseram faxak» iyye. Too mari, «Inki barra Endor deqsita aracal tan» kaak iyyen.

⁸ Too waqdi Saawul fooca isik qellissa heeh aki sarat gacca 'yeh, ditet isi marak namma num is lih hayya heeh, kalluwallel fayu essera'gidih gexe. Kalluwan le barrak, «Kalluwaanal fayu yoh esseraay, takku waytam yoh waris. Anu migaq akak xagu waa numih roocaaniyyah sec» iyye.

⁹ Kalluwan le barra kaak intemii, «Malik-Saawul abem maabbitoo macaa? Ginnili kee kalluwalle baaxoh addak dirkih yeyyeeqem toobbe koo. Toh toobbek, oflot yoo maqidinaay malik gabat yoo maqidsiisinay ahak raq» kaak inte.

¹⁰ Too waqdi Saawul qahdi teetih cule. «YALLAY waarahiyyah migaaqal xiibitaah, ah abteemih akah madiggalsinta» teetik iyye.

¹¹ Kalluwan le barra, «Hay, iyyah koh seeco?» kaak inte. Usukuuy, «Samuwelih yoh sec» teetik iyye.

¹² Woo barra Samuwel tuble waqdi deero abteeh, Saawuluk, «Numow, yoo akah ayrissam macaa? Atu Malik-Saawul kinnito way!» kaak inte.

¹³ Malik Saawul, «Mameysitinaay, away tublem macaay?» teetik iyye. Kaak inteemih, «Roocaaniyya baaxoh addak awaqih uble» inte.

¹⁴ «Ma ceelo luk teneh?» teetik iyye. Isiiy, «Idaltuh yan numuy rarayto xagarat lehiyyak ten» kaak inte. Too waqdi Saawul tohum Samuwel kinnim yeexegeeh, kay massakaxxah baaxok bagul gommoh rade.

¹⁵ Sarrak Samuwel Saawuluk annah iyye, «Aade macah yoo kaltaah, addunya macah yoo gacissa?» kaak iyye. Saawul iyyemii, «Anu kaxxa gadaamah addat an. Filistiin mari qeebit yoo yabbixe. Yalli yo'lih mayanaay, soonol tu yol gacisu cineeh, hinnay kaadu, nabuwwâ kabuk yol gacsam aalle cineh. Tonna-leemik abeh meqem yoh warissa'gidih koh seece» 'yaanam kaak iyye.

¹⁶ Samuwel kaak iyyeemih, «YALLI koo cabeeh naqboyta kok yekkem teexegek, hay yoh macah secte?» kaak iyye.

¹⁷ Qagseh iyyemii, «YALLI kot abu waam dumaak yoh warseh sugeeh, taway kot abem tohu: amoytiinu kok beeh Dawuduh yecee.

¹⁸ Atu YALLIH amri cinteeh Qamaalek mara kee oson luk suggu 'yeenim inkih mabaysinnito. YALLI away ah kol akah baaham, tohih sabbata.

¹⁹ Koo kee Israayil mara Filistiin marih gabal hee. Beera koo kee ku xaylo yo'lih gacetton. YALLI Israayil qaskar Filistiin marih gabal heele» 'yaanam iyye.

²⁰ Toh yoobbeemih wariggah, Saawul yinnikisseeh baaxok bagul qangalaalah raaqe. Too ayro laqo kee barah maaqo afah maxaginnaay, tonna-leemik boolaateh yen.

²¹ Taaxige kalluwan le barra kaal temeeteeh wariggat yanim kaak tubleh. Too waqdi kaak intemii, «Ku maganah, amoytaw, atu yok aba intem abeeh, inni rooci oflot hee raare.

²² Taway atu kaadu ku maganah anu kok ab axcem oobbey. Maaqo koh bicisu waak, safar akah affare wayta'nnah, takmeemi» kaak inte.

²³ Saawul teetik cineeh, «Maaqo makma» teetik iyye. Takkay immay kaa'lih yen mari kaadu maaqo yakme'gidih kaa kallacen. Sarrak oggoleeh baaxok ugutta 'yeh qarkaytol daffee.

²⁴ Taaxige barra sissikuk gexxa 'teh, buxah addat le mulkuqusse dahalto kaah qidde. Sarrak buluula arqussa hayteh, kamiir sinni gaqambo akak bicisse.

²⁵ Too maaqo Saawul kee kay marih foocal xayyossek lakal, yokmeenih, sarrak too barat edde gexen.