1 Samuwel 26 - NABUWWA KEE MALIKWA

DAWUD QAGISAK SAAWULUK ROOCI WADE

¹ Diif-rasih-mari Saawuluy Gibqa deqsita aracal yanihiyya fan yemeeteenih iyyeenimih, «Dawud, Cakiilâ-qaley Yasimon deqsita aracak foocah tanihiyyal yan» kaak iyyen.

² Toh yoobbe waqdi qaskarak addak doorru hee sidiica alfih num gabat luk, Diif-rasuy sinam elle dagohiyyal Dawud gorrisa'gidih gexe.

³ Cakiila deqsitta qaley Yasimon deqsita aracak foocah raqtahiyyal giti qaxal yinfiddigen. Dawud elle suge ikkek mangayyinnay elle yeede. Saawul kay goranah yemeetem yoobbe waqdi,

⁴ gibah sinam ruubeeh, too mari Saawul yanim yismiteenih yemeeten.

⁵ Too xaagu gee waqdi xayuk ugutta 'yeh Saawul elle yinfiddige arac fan gexe. Saawul kee kay qaskarih abbay migaaqah Nér-Abner deqsitak yenehiyya xiinit elle yan arac yuble. Saawul elle yinfiddigen aracal qaskaray maroh kaat tanik addal xiinit yanim yuble.

⁶ Too waqdi Dawud Acimalek deqsita numuy Ciitâ-marah yooboke kee Abiisay deqsita numuy ina Yowab deqsita num lih luk yenehiyyak, «Sin nammayak Saawul xiinit elle yan arac yo'lih gexxu waytam iyya?» iyye. Abiisay too waqdi, «Anu gexeyyo» iyye. Abiisay Yowab toobokoytah yen. Ina keenik Dawud annak ten. Tet migaq Xaruyak ten.

⁷ Too bar Dawud kee Abiisay Saawul elle yan arac culeeniih, too waqdi Saawuluy elle yinfiddigen aracak gudel xiinit yanihiyya yublen. Kay macaxi kaak amô-ginat baaxot mudumuh yen. Abner kee usuk abbah akak yan qaskar Saawul deraafil xiinit ten.

⁸ Abiisay too waqdi Dawuduk iyyemii, «Ta bar Yalli ku naqboyta gabah addat kok qideh yanik, inki adda a abbixe macaxut kaa mudeh baaxot kaa xakbisay yoo m'intaa? Inki addah mudumut edde kaa qideyyok» iyye.

⁹ Dawud iyyeemih, «YALLI isih doore malikil umam baahe mara digaala YALLAK, umam kaal mabaahin!

¹⁰ Tonna'mmay YALLI Saawul amrih qide kee carbit qide akkeleemih YALLAY waarahiyyah migaaqal xiibita. YALLI isih kaa aatukeleh immay,

¹¹ YALLI isih malik abe num qidaamak yoo waaseh. Leeh afleyta kee macaxu kaak luk genxay» iyye.

¹² Too waqdi Dawud leeh afleyta kee macaxuy amô-ginat kaak sugehiyya luk kaak gexe. Oson abeenim tublem matan. YALLI kaxxa xin keenil ruubeeh; tonna-leemik Saawul kee kay qaskar inkih xiinit kaarisak elle raqte.

¹³ Sarrak Dawud woo golok addah obba 'yeh wonnah waqinah raqta qaleh amol eweqqa 'ye waqdi,

¹⁴ Saawul qaskar kee Abner deero abeeh, «Abnerow! Abnerow! Axcem yok oobbeey» iyye. Abner too deero yoobbe waqdi, «Sugay deero abtaah malik xiine kaltam iyyay?» iyye.

¹⁵ Too waqdi Dawud kaak iyyeemih, «Abnerow, sugay, atu Israayil rasul labhaytiino edde taadee num hinnitoo? Malikiy amoytah kok yanihiyya macah dacrise waytaah? Ku amoyta qida'gidih num taway isin elle tinfiddigen arac culeh suge.

¹⁶ Edde tan taamak boolatteh! Kee yaalo! Koo kee ku qaskar YALLI doore malik madacrisinniton. Tohuk gexxaamah rabi siinil yamaate. Taway meqehik, wagga hay! Malik macaxi ankel yanih? Kay amô-ginat ten leeh afleyta ankel tani?» iyye.

¹⁷ Too waqdi Saawul, Dawud anayal yeexegeeh, «Yi Dawudow, ah koo?» iyye. Dawud «Ah yoo kinnih, yi amoytaw.

¹⁸ Yi amoytaw, yooy ku naqasuh yanihiyya akah xakaake kaltam macaay? Maca kol baaheeh? Mannah yan biilu baaheeh?

¹⁹ Malikow, axcem yok oobbey. Yi amot koo haytem YALLA tekkek, kaah sadgat abnay nek oggolay. Hinna'mmay sahda koo edde asissam tekkek, too maral YALLIH abaaro obtay. Ta mari YALLI doore baaxok yoo yeyyeeqeeh marin baaxoy Yallih aftok gabak bicsen duyye uqbud yok elle iyyaanal yoo heen.

²⁰ Yoh tu gactek, YALLA elle aqbude waan baaxol rabam mafaxa. Tonnah tanim yol mabaahin. Israayil malik yooy kannaadi bis lehiyya akah qidam faxaamak sabab macaay? Ali innah admoh lakak yoo akah tayraddem maca?» kaak iyye.

²¹ Too waqdi Saawul kaal gacseemih, «Umam baaheh anik, yi Dawudow, ahaysa uduur. A bar rooci yok waddek sa, kol umam baahaanamat maqagita. Duquruk sugtem yoo. Kaxxam umam baahe» iyye.

²² Dawud kaal gacseemih, «Ku macaxi ah kaana, amoytaw. Ku marak numuk teena akah rub.

²³ Digga iyyeeh cakkit tanim aba num YALLAK galto mawaa. A saaku YALLI yi gabah gubat koo qideh suge'mmay, kooy YALLI malik abehiyyal umam mabaahinniyo.

²⁴ A saaku anu ku rooci elle wade innal, YALLI kaadu yi rooci waday; gadaamak yoo yayyaaqay» iyye.

²⁵ Saawul kaak iyyeemih, «Yalli barkat kot haay, yi baxaw! Abba haytam gabal kok bicele» iyye. Tohuk lakal, Dawud isi gexoh gexeeh; Saawul buxah yuduure.