1 Samuwel 25 - NABUWWA KEE MALIKWA

SAMUWEL RABA

¹ Samuwel rabeeh too saaku Israayil mari yakkeemiik kay taqdiyyah yemeeteeniih too aracal kaah rookiten. Sarrak kay raysa Raama deqsita aracay usuk dabqah elle sugehiyyal kaa yoogoqen. Tohuk lakal Dawud Faaran deqsitta baaxoy sinam elle dagohiyya fan gexe.

DAWUD KEE NABAL BARRA

^2-3 Kaalib deqsita gulubuh yooboke numuy migaaqah Nabal deqsitahiyya yen. Too num gaddalih yan numuk teneeh, wadarak alfi takkem luk yeneeh, sidiica alfi yakke illi luk yen. Dabqi kaak Maqonul sugeeh, Karmel deqsita aracal baaxo luk yen. Kay barra migaaqah Abiigal deqsitak ten. Is qax-maqaane kee bagi-cubbi le barrak ten. Tet baqalah tu gactek, cillaale kee qaduwwi luk yen. Ayrok teena Nabal isi illik xagor kalak suge.

^4-5 Dawud toh yoobbe waqdi, sinam elle dago baaxoy elle sugehiyyak tabna furraynul Karmel deqsita arac fan farmo ruube. Farmoh ruube marak iyyeemih, «Karmelil yan Nabal fan gexaay, naharak yi migaaqal salaamatta kaal qida.

⁶ Intaanamah, ‹Ku qumri yaxxeeray. Koo kee ku buxah mara kee ku ahlih qaafiyat yacaay iyye› inxica.

⁷ ‹Illik xagor koh kala mara ko'lih yanim 'yaanam oobbe. Duma ama'kkel sugne saaku, ku saqih loynitte ne'lih sugteeh, too saaku meqe'nnal ken abbaxuk sugnem koh warisa nek iyye. Tonnah kaadu, Karmelil suggu inneemih midirik tu keenik bayi mahanninom kaah warisa nek iyye› inxica.

⁸ ‹Tohimih digga faxxek, ken esseraay oson koh warselon. Tonna'mmay edde nemeetem qiddi ayrok tanih tanik, qibnaytiinoh nee arcibisaay duddam yooy ku baxah yani kee ku masaakiinay kol ruubehiyyah tama maral neh rub kok iyye› kaak inxica» iyye.

⁹ Dawud mari, too farmoy usuk keenil ruubehiyya Nabalah warseenih, keenil gacsam yaabbeeni'gidih kaa qambaalen.

¹⁰ Sarrak Nabal iyyeemih, «Sugay, anu Dawud akak iyyan num inkinnah maabbiyo. Yiisâ-baxa akak intaanam iyyaay? Axayyu is yeddere marak kudda naqoosa isih waktiik temeggeh tanik!

¹¹ Gaqambo kee lee kee, illik xagor yoh kala marah usguude saq, ken cabba heeh, akak yemeeten ikke akak aaxige waa marah macah acee?» iyye.

¹² Dawud farmoh ruube mari Dawud fanah yuduureeh, usuk ken elle ruube num keenil gacsem kaah warsen.

¹³ Toh yoobbe waqdi Dawud isi marak, «Seef ittikiya» iyyeeh, isih isi seef ittikiyya heeh, affara boolih num is lih hayyaay, namma boolih numuy maaqoh amo wagtu waa wokkel elle cabba heeh daqaarime.

¹⁴ Nabal lih taamita marak tiyak teeni, Nabal-barray migaaqah Abiigal deqsittahiyya fanah gexxa 'yeh iyyemii, «Dawud woo sinam elle dago baaxok ni abbah farmo kee salaamatta ruubeeh, usuk too salaamattal xaafu kaal gacsem toobbee?

¹⁵ Dawud kee kay mara neh maquk sugteeh taqabi takkem nel mabaahinnon. Ken lih sugne saaku luk suggu inneemik tu nek magarqiminna.

¹⁶ Bar kee laqoh amo nek wagitak sugen. Ken lih nan way saqak amo neh wagitak sugen.

¹⁷ Tonna'mmay tamahak tuk teena abtam tayse. Tah ni abba kee kay mara kaxxam uma ikkeh bahtu waytaama. Ni abba uma numuuy; sahda kaa'lih yabta yab mayaabba» teetik iyye.

¹⁸ Toh toobbe waqdi, Abiigal namma boolih gaqamboyta kee, namma saaray qinabak bicsen kamrik kibuk yaniiy, illik konooyuy tusguudeh solal alassehiyyaay, alok koona kafaqaay, kafsen qinab-xaylok bool gaqamboyta kee, sublâ-xayloy kafseenihiyyak namma boolih gaqamboyta sissikuk danoonal eerra hayteh,

¹⁹ teetih taamita marak, «Isin yok naharat gexay suga; anu sin kataateyyok» inte. Takkay immay isi baqalah gexo mawarsinna.

²⁰ Sarrak too duyye danoonal eerra hayteh qale tawqem faxxa waqdi, Dawud kee kay maray tet fan amaatuk sugehiyya gital teetit garayen.

²¹ Too waqdi Dawud isi bagul, «Taway anu ta numih dabaq bacarih tan baaxol akah dacrisak sugem macâ sabbata? Usuk luk suggu 'yeemik tu garaqi mahanninooy, taway anu kaah abe catoh galtoh tah yol gacsa.

²² Maaci maacisaamak naharal kay marak num cabe'kal selli hee week, Yalli faxe umaane yol baahay!» 'yaanam isi bagul axcuk suge.

^23-24 Abiigal Dawud tuble waqdi, danan elle cabba hayteh gexxeeh, kay massakaxxah baaxok bagul qansah baaxo xagtam fanah Dawuduk ibi gubal qununte. Too waqdi inteemih, «Yi abbaw, axcem yok oobbey. Usuk baahem yol cab.

²⁵ Nabal kol baahem bagut kaah mahan; yaaxigem le num hinnak. Nabal akak iyyaanam duquruuy; kay migaq kay taamah bis le. Atu rubte ku mari yemeete saaku, anu wokkel masuginniyo.

²⁶ Away naqboytiitik cane gacse kee qide takkeemik koo waassam YALLA. Kol umam bahha haa mari, Nabal innah diggalsimeleemih YALLAY waarahiyyah migaq kee ku manol xiibita.

²⁷ Ku maganak away koh baahe duyye yok ibbixaay ku marah ucuy.

²⁸ Anu baahe qellat eellek, qafu yoh ab. Atu abtam YALLI kok aba iyye carbi kinniimih sabbatah, koo kee kok raddem inkih malikwa akketton. Addunyâ bagul tanim fanah, umaane elle geytinta num akke koo kalay.

²⁹ Qeebi kot abam faxaah koo qidam faxa num yenek, YALLAY ku Dageltah yanihiyya koo dacrisele. Num kicna duyye elle dacrisa innal, YALLI koo dacrisele. YALLI ku naqboytit wanxefit xeet elle qidan innal qidele.

³⁰ YALLI koh abeyyo iyyeh xagana koh akah culem koh abu waah, Israayilik malik koo abu waa saaku,

³¹ sabab maleh sahda qide kee kol yoysommeenimih ken digaalteh sugtaamal, toh nadaama kol akkuk ten. Tonna'mmay YALLI barkat kot hayu waa saaku, ku maganah yi abbaw, yoo mahawweenin» kaak inte.

³² Too waqdi Dawud teetik iyyemii, «YALLAY Israayil doore Dagelta kinni fayla taafay! A saaku yot matarta'gidih koo ruube.

³³ Atu a saaku umaanet ase yoo kalteeh, inni kasal sahdat abam faxak suge digaalak yoo raaqisse. YALLI koh yecee kasat yoh abte maqaanel barkat kot haay.

³⁴ YALLI yi gabat biyaakiti sin mahanna. Tonna'mmay atu sissikuk yot matre waytaamal, beera saaku sin labhak num cabe'kal sele raareemih, waara YALLAY Israayil ummatta doorehiyyah migaaqal xiibita» teetik iyye.

³⁵ Sarrak gabat mattacoh kaah bahte duyye teetik oggoleeh, «Intem kok oobbeeh, koh oggoleh. Ahaysa amaanah buxah uduuray mameysitin» teetik iyye.

³⁶ Tohuk wadir Abiigal, Nabal fan tuduureeh; elle tuduure ikkel kaxxa xiglah addat sugeeh, iskirra 'yeh kaxxa farcit suge. Too ayro yab kaa'lih maabinnaay,

³⁷ nammeyhaytoh ayro sikratak cissi geem ubulla hayte waqdi, tikka 'tem inkih kaah warisse. Toh yoobbe waqdi lubbi kaal yeedeeh, caxxi innah kafe.

³⁸ Tabna ayroh gide suggu 'yek sa, YALLIH utkah yumuttukkeeh rabeh.

³⁹ Dawud Nabal raba yoobbeeh, too waqdi iyyeemih, «Yooy kay naqasuh yanil ceele waytam baahe numul umam yoo baahe kaleeh yi aftok isih kaa digaale YALLA fayla taafay. Nabal baahe umaaneh YALLI kaa digaaleh» iyye. Tohuk lakal Dawud Abiigal rihimih abita'gidih, isi mara teetil ruube.

⁴⁰ Dawud mari Abiigalay Karmel deqsita aracal tanihiyya fan gexeeniih, tokkel teetik iyyeenimih, «Dawud rihimih koh abitam faxak, yoo fan am kok iyyah yan» teetik iyyen.

⁴¹ Abiigal baaxô bagul qununna 'teh inteemih, «Anu kay naqasoy kay gubal yan marih ibitte kaqlissuh bical tani kinniyo» inte.

⁴² Sarrak sissikuk ugutta 'teh dananal gacca 'teh, usuk ruube mara lih Dawud fanah gexxe. Teetih taamitak sugte koona barra tet lih gexxe. Is kaal temeeteeh, tohuk wadir kay barra tekke.

⁴³ Dawud teetik dumal Acinooqam deqsitta barra Yidraqel magaalal toobokehiyya barrah luk suge. Sarra Abiigal temeete waqdi, tet kaadu caggoytah haysite.

⁴⁴ Too saaku Saawul isi baxá Miikalay Dawuduh abeh sugehiyya Laysá-Faltih yeceeh suge. Falti, Gallim deqsitta magaalah numuk ten.